جوبا ماقساتى – قول جەتىمدىلىكتى قامتاماسىز ەتۋ جانە ىقشام مەديتسينالىق امبۋلاتوريالاردىڭ اشىلۋى قاراستىرىلعان ەمحانالار جەلىسىن دامىتۋ. وتباسىلىق دەنساۋلىق ورتالىعى "ۇيدەگى دارىگەر" جوباسى اياسىندا جاقىن ماڭداعى تۇرعىندارعا مەديتسينالىق كومەكتى جاقسارتۋعا جانە جاقىنداتۋعا باعىتتالعان. №9 قالالىق ەمحانا ەلوردانىڭ سول جاعالاۋىندا, قارقىندى دامىپ جاتقان اۋداندا ورنالاسقان. قازىرگى ۋاقىتتا قىزمەت كورسەتۋ اۋماعى 10 شاقىرىمنان اسادى. اسىرەسە, بوكەيحان, ۇلى دالا كوشەلەرىنىڭ اۋدانىندا حالىق تىعىز قونىستانعان, ول جەردە كوپتەگەن جاڭا تۇرعىن ءۇي كەشەندەرى سالىنۋدا. تىركەلگەن ەرەسەكتەر مەن بالالارعا مەديتسينالىق كومەك تەگىن مەديتسينالىق كومەكتىڭ كەپىلدەندىرىلگەن كولەمى اياسىندا كورسەتىلەدى.
"نۇر-سۇلتان قالاسىندا "ۇيدەگى دارىگەر" جوباسى 2018 جىلدان باستاپ قولعا الىنۋدا. بۇگىن №9 ەمحاناعا كومەك رەتىندە ءبىز وسى ىقشام اۋداندا "ۇيدەگى دارىگەر" اشامىز. مۇندا 17 مىڭعا جۋىق ادام تۇرادى. ونىڭ ىشىندە 4,8 مىڭى – بالالار.
وتكەن جىلى ءبىز "ۇيدەگى دارىگەردىڭ" 12 دارىگەرلىك امبۋلاتورياسىن اشتىق. بيىل ءبىز تاعى 10 دارىگەرلىك امبۋلاتوريا اشۋدى جوسپارلاپ وتىرمىز, ولار شامامەن 50 مىڭ ادامدى قامتيدى. مىندەت – وتە مۇقتاج تۇرعىندارعا العاشقى مەديتسينالىق كومەك. ءار كەڭسەدە ءار ناۋقاسقا بەلگىلى ءبىر باعىت بويىنشا ەمشارا جاسالادى", – دەدى نۇر-سۇلتان قالاسى اكىمىنىڭ ورىنباسارى باقتيار ماكەن "ۇيدەگى دارىگەر" امبۋلاتورياسىنىڭ اشىلۋ راسىمىندە. 2019 جىلى نۇر-سۇلتاندا وسىنداي 12 دارىگەرلىك امبۋلاتوريا اشىلدى. بيىل بۇل جۇمىستار جالعاسادى.
