بيىل ەلەكتر ەنەرگياسىن ءوندىرۋ سەكتورىنا 80 ملرد تەڭگە ينۆەستيتسيا تارتىلۋعا ءتيىس. الايدا بۇل قاراجات ستانسا جابدىقتارىن جاڭعىرتۋعا جەتپەيدى. ال ستانسالاردىڭ توزۋ دەڭگەيى جىلدان-جىلعا ارتىپ بارادى. قازىر شامامەن 60% ەسكىرگەن. ياعني ەلەكترمەن جابدىقتاۋ ساپاسىنا قاۋىپ ءتونىپ تۇر دەۋگە بولادى.
– بۇل فاكت ەلەكتر قۋاتتارىنىڭ اپاتتىق ىستەن شىعۋى, تۇتىنۋشىلاردى ەلەكترمەن جابدىقتاۋ ساپاسىنىڭ تومەندەۋى سياقتى وقيعالاردىڭ جيىلەۋىنە, سونداي-اق كورشى ەلدەرگە تاۋەلدىلىكتىڭ ۇلعايۋىنا سەبەپ بولىپ وتىر. مىسالى, بىلتىر 3 996 تەحنولوگيالىق بۇزۋشىلىقتارعا جول بەرىلگەن. بيىل تەحنولوگيالىق بۇزۋشىلىقتار سانى 1,3%-عا ازايدى. بىراق جىلۋ بەرۋ كەزەڭىندە ەڭ كوپ جابدىق ىسكە قوسىلعاندا 135-كە نەمەسە 6%-عا ارتىپ وتىر, – دەيدى ايدوس دارىباەۆ.
ونىڭ ايتۋىنشا, بۇل جاعداي قازاقستاندىق تۇتىنۋشىلاردى كورشى ەلدەردەن ەلەكتر قۋاتىن رەتتەۋ جونىندەگى قىزمەتتەردى جىلىنا 8 ملرد تەڭگەدەن استام سوماعا ساتىپ الۋعا ماجبۇرلەيدى. بۇل دا ەلەكتر ەنەرگياسىنىڭ تۇپكىلىكتى باعاسىنا اسەر ەتەدى.
بيىل ەنەرگيا ءوندىرۋشى ۇيىمداردىڭ شەكتى تاريفتەرىنىڭ ورتاشا ۇلعايۋى 16% دەڭگەيىندە بولجانۋدا. بۇل رەتتە قازاقستاننىڭ بارلىق ايماعىندا ەلەكتر ەنەرگياسىن تاراتۋدى ىسكە اسىراتىن ەكىباستۇز گرەس-1 شەكتى ءتاريفى 0,7%-عا وسەدى. ەلەكتر ستانسالارىنىڭ شەكتى تاريفتەرىن ۋاقتىلى تۇزەتۋ الداعى كۇزگى-قىسقى كەزەڭدەردەن تابىستى وتۋگە مۇمكىندىك بەرەدى. سونداي-اق 27 مىڭ جۇمىس ورنىن ساقتاۋعا جاردەمدەسپەك.
