قاۋىپتى ىندەت اۋىلدىق ەلدى مەكەندەرگە دە كوشىپ جاتىر. وڭىرلىك جەدەل اقپارات شتابى بەرگەن سوڭعى مالىمەتتە COVID-19 جۇقتىرعان 27 ناۋقاستىڭ قارابالىق, ۇزىنكول جانە قوستاناي اۋداندارىنىڭ تۇرعىندارى ەكەنى ايتىلعان. بۇعان دەيىن بەيقامدىققا بوي الدىرىپ كەلگەن جۇرت ىندەتكە قارسى جاپپاي جاسالىپ جاتقان امالدىڭ اسا ماڭىزدى ەكەنىن ەندى عانا تۇسىنە باستاعانداي. ويتكەنى ەكىنىڭ ءبىرىنىڭ جاقىن تۋىسى, تانىسى, ارىپتەسى «جامان تۇماۋ» جۇقتىرىپتى دەگەن جامانات حابار جەلدەي ەسىپ تۇر.
ايماقتاعى كۇردەلى احۋالعا بايلانىستى اۋرۋحانالاردى جەدەل تۇردە جاڭا مەديتسينالىق قۇرىلعىلارمەن جابدىقتاۋ شارالارى قولعا الىنىپ, بۇل ماقساتقا بيۋدجەتتتەن 2 ملرد تەڭگە قارجى ءبولىندى. دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆانىڭ ايتۋىنشا, ەمدەۋ مەكەمەلەرى ءۇشىن بۇگىنگە دەيىن توسەك الدىنا قويىلاتىن 60 مونيتور, 40 جاساندى دەمالدىرۋ قۇرىلعىسى, 20 لارينگوسكوپ, 20 دەفيبريللياتور, 3 قانداعى گاز قۇرامىنا تالداۋ جۇرگىزەتىن اپپارات, 170 تەرمومەتر, 11 مىڭ قورعانىش كوستيۋمى, 3,5 مىڭ قورعانىش كوزىلدىرىگى, 800 دەزينفەكتسيا قۇرالى مەن 10 مىڭ بەتپەردە ساتىپ الۋ تۋرالى كەلىسىمشارت جاسالعان. بۇل قۇرىلعىلاردىڭ ءبىرازىن قازىر قالالىق جانە اۋداندىق اۋرۋحانالار پايداعا اسىرىپ جاتىر.
– قازىر كوروناۆيرۋسكە قارسى قوسىمشا ەمدەۋ ورىندارىن كوبەيتۋدى قولعا الىپ جاتىرمىز. بۇگىندە وبلىستا ىندەت جۇقتىرعان ناۋقاستارعا, ولارمەن بايلانىستا بولعاندارعا جانە كوروناۆيرۋسكە ۇقساس اۋرۋ بەلگىسى بار ادامدارعا ارنالعان 1488 توسەك-ورىن بار. ينفەكتسيالىق ستاتسيونارلاردا COVID-19 جۇقتىرعان 474 ورىن بار ەدى. كەشە عانا 250 ورىندىق جاڭا ەمدەۋ مەكەمەسىن جابدىقتادىق. مەن وبلىس تۇرعىندارىن سابىر ساقتاۋعا شاقىرامىن. قازىر وبلىس دارىگەرلەرى كۇشەيتىلگەن رەجىمدە جۇمىس ىستەپ جاتىر. باستىسى, باس سانيتارلىق دارىگەردىڭ نۇسقاۋىن ورىنداۋ ارقىلى بىزگە كوپ كومەك تيگىزەتىندەرىڭىزدى تۇسىنىڭىزدەر. جاسىرىن جيىن وتكىزۋدى, قوناققا بارۋدى, قوناق شاقىرۋدى قويۋ كەرەك. ۇيدەن بەتالباتى شىقپاڭىزدار. جاقىندارىڭىزدى, تۋىس-تۋعاندارىڭىزدى قورعاڭىزدار, – دەدى ا.بەكسۇلتانوۆا.
29 ماۋسىم كۇنى ءتۇس اۋا وبلىس ورتالىعىنداعى قالالىق اۋرۋحانا سۋىق تيگەن, تۇماۋ جۇقتىرعان جانە وكپەسى قابىنعان ادامداردان باسقا ناۋقاستاردى قابىلداۋىن توقتاتىپ, 250 ورىندىق پروۆيزورلىق ستاتسيونار قىزمەتىن اتقارا باستادى. دەنساۋلىق ساقتاۋ باسقارماسى ارنايى بۇيرىق شىعارىپ, باسقا ەمحانالارداعى دارىگەرلەر مەن مەدبيكەلەردى وسى جەرگە قوسىمشا جۇمىلدىردى. قازىر بۇل اۋرۋحاناداعى سالالىق دارىگەرلەردىڭ ءبارى پروۆيزورلىق ناۋقاستاردى قابىلداپ, تەك سولاردى ەمدەۋمەن اينالىسىپ جاتىر.
دارىگەرلەردىڭ پىكىرىنشە, سوڭعى كەزدەگى احۋال ايماقتا كارانتين شارالارىن قاتايتۋدى قاجەت ەتەدى. «مەملەكەت باسشىسى قاسىم-جومارت توقاەۆ ىندەتتىڭ تارالۋىنا قارسى كۇرەس شارالارى جونىندەگى كەڭەستە كوروناۆيرۋس پاندەمياسىنىڭ ۇزاق مەرزىمىنە دايىندىقتى باستاۋدى جۇكتەدى. مۇنىڭ سىرتىندا, زەرتحانالىق زەرتتەۋلەردىڭ تيىمدىلىگىن, پتر زەرتحانالارىنىڭ سانى مەن قۋاتىن ارتتىرۋدى تاپسىردى. وسى ورايدا, ۇكىمەتكە حالىقتى ءدارى-دارمەكپەن قامتاماسىز ەتۋ ماسەلەسىن بەس كۇن ىشىندە شەشۋدى, ال ەكى كۇننىڭ ىشىندە وسى جىلدىڭ ناۋرىز-مامىر ايىنداعىداي قاتاڭ كارانتين شارالارىن ەنگىزۋ بويىنشا ۇسىنىس ازىرلەۋ كەرەكتىگىن دە قاداپ تاپسىردى. پرەزيدەنتتىڭ اسىرەسە كارانتين شارالارىن كۇشەيتۋ تۋرالى ويىمەن ءبىز دە تولىق كەلىسەمىز. ويتكەنى تۇرعىنداردىڭ ساقتىق شارالارىنا بەيجاي قاراۋىنىڭ سالدارىنان قاۋىپتى دەرت دەندەپ بارادى. قازىردىڭ وزىندە وبلىستا اۋرۋدى جۇقتىرعاندار سانى 500-گە جەتىپ وتىر. مۇنىڭ ءبارى ساقتىق شارالارىنا نەمقۇرايلىلىق تانىتقاننىڭ كەسىرى, – دەدى وبلىستىق اۋرۋحانانىڭ كارديولوگيا ءبولىمىنىڭ مەڭگەرۋشىسى ءابۋناسىر سۋحانوۆ.
بۇگىنگە دەيىن وبلىستا 232 ناۋقاس ىندەتتەن ايىعىپ, 3 ادام كوز جۇمعان.
قوستاناي وبلىسى
