اتقارىلىپ جاتقان جۇمىستار تۋرالى قارجى ءمينيسترىنىڭ مىندەتىن اتقارۋشى بەرىك شولپانقۇلوۆ, ۇلتتىق ەكونوميكا ءمينيسترى رۋسلان دالەنوۆ, قر قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا جانە "اتامەكەن" ۇكپ باسقارما توراعاسىنىڭ ورىنباسارى ولجاس ورداباەۆ باياندادى.
قازاقستان 2025 جىلعا قاراي كولەڭكەلى ەكونوميكا دەڭگەيىن ءجىو 20%-نان تومەن دەڭگەيگە جەتكىزۋ مىندەتىن قويدى. قابىلدانىپ جاتقان شارالاردىڭ ناتيجەسىندە قر باقىلاۋدان تىس ەكونوميكاسىنىڭ ۇلەسى 2019 جىلدىڭ قورىتىندىسى بويىنشا ءجىو-گە 27%-دان 23,62%-عا دەيىن تومەندەدى. بۇل بيۋدجەتتىڭ كىرىس بولىگىن 1,5 ترلن تەڭگەگە قوسىمشا ۇلعايتۋعا مۇمكىندىك بەردى.
قر-دا باقىلاۋدان تىس قىزمەتتى زاڭدى اينالىمعا تارتۋدى ىنتالاندىرۋ, كەدەندىك جانە سالىقتىق اكىمشىلەندىرۋدى جاقسارتۋ ارقىلى زاڭنامالىق بازانى جەتىلدىرۋ بويىنشا تۇراقتى جۇمىس جۇرگىزىلۋدە. ماسەلەن, بيزنەسكە قولايلى بولۋى ءۇشىن جانە يمپورتتان نەمەسە وندىرىستەن باستاپ بولشەك ساۋداعا دەيىن تاۋاردىڭ قوزعالۋ اشىقتىعىن قامتاماسىز ەتۋ ءۇشىن "ۆيرتۋالدى قويما", "تاڭبالاۋ" مودۋلدەرىمەن "استانا-1", "ەلەكتروندىق شوت-فاكتۋرالار" كەشەندى اقپاراتتىق جۇيەلەرى ىسكە اسىرىلۋدا. تەكسەرۋلەر سانىن, بيزنەسپەن بايلانىستى ازايتۋ, سونداي-اق تەكسەرۋدى تاعايىنداۋ كەزىندە ادامي فاكتورعا جول بەرمەۋ ءۇشىن "تاۋەكەلدى باسقارۋ جۇيەسى" اقپاراتتىق جۇيەسى ىسكە قوسىلدى.
ۇكىمەت باسشىسى زاڭسىز ەكسپورتتىق-يمپورتتىق ۆاليۋتالىق وپەراتسيالاردى جويۋ بويىنشا ۇسىنىستار ەنگىزۋدى, قىزمەتتەردى تسيفرلاندىرۋدى جەتىلدىرۋ, اقپاراتتىق جۇيەلەردى ودان ءارى ينتەگراتسيالاۋ, قر اۋماعىندا تاۋارلاردى قاداعالاۋ جونىندەگى جۇمىستى جالعاستىرۋدى, سونداي-اق تولەمدەر مەن تولەم جۇيەلەرى تۋرالى ارەكەت ەتىپ تۇرعان زاڭناماعا ەلەكتروندىق اقشا يەلەرىن مىندەتتى تۇردە سايكەستەندىرۋگە باعىتتالعان وزگەرىستەر مەن تولىقتىرۋلار ەنگىزۋ مۇمكىندىگىن قاراستىرۋدى تاپسىردى.
پرەمەر-مينيستر مەملەكەتتىك قولداۋ شارالارىن جەتىلدىرۋ, ارتىق تالاپتاردى قىسقارتۋ, قارجىلاندىرۋدىڭ قولجەتىمدىلىگىن ارتتىرۋ, اكىمشىلىك كەدەرگىلەردى ازايتۋ, ناقتى اكىمشىلىك سالىق سالۋ ارقىلى بيزنەستىڭ كولەڭكەلى سەكتوردان شىعۋىن ەكونوميكالىق ىنتالاندىرۋ جونىندەگى جۇمىستى جالعاستىرۋدى تاپسىردى.
"بيزنەستى اشىق جۇرگىزۋ ەكونوميكالىق تۇرعىدان ءتيىمدى بولۋى ءتيىس", — دەپ تۇيىندەدى ا. مامين.
