بۇكىل الەمدى سارساڭعا سالعان ۆيرۋس ەلىمىزدىڭ بارلىق ايماعىنا تاراپ, قارقىن الىپ كەلەدى. اسىرەسە وتكەن اپتادا 5 وڭىردەگى ءوسىم قاتتى بايقالدى. اتاپ ايتساق, كوروناۆيرۋس ينفەكتسياسىن جۇقتىرۋدىڭ ءوسىمى بويىنشا شىعىس قازاقستان وبلىسى – 62,24%, سولتۇستىك قازاقستان وبلىسى – 59,11%, قوستاناي وبلىسى – 41,23%, اقمولا وبلىسى – 39,33% جانە پاۆلودار وبلىسى 34,80%-دى كورسەتتى.
جالپى, 29 ماۋسىمداعى جاعداي بويىنشا قازاقستاندا 21 327 ادام ىندەتتىڭ قۇرىعىنا ىلىنگەن. ولاردىڭ ەمدەلىپ شىققانى – 13 008, جان تاپسىرعانى – 183. ال ستاتيستيكاعا قوسىلماعان كوروناۆيرۋستىڭ بەلگىلەرى جوق 16 639 تاسىمالداۋشى تىركەلگەن.
وسىلايشا, ناۋقاستاردى دەرتتىڭ بەلگىلەرى بار-جوعىنا قاراي ءبولۋ ارقىلى بارىنشا قولدان كەلگەن كومەك كورسەتىلىپ جاتىر. ياعني ىندەتتىڭ جەڭىل تۇرىنە ۇشىراعاندار ۇيلەرىندە وقشاۋلانىپ, ءوز اۋماعىنداعى ەمحانا دارىگەرلەرىنىڭ كەڭەسىمەن ەم-دوم قابىلداۋدا. ال اۋرۋحانالار مەن ارنايى ستاتسيونارلارعا تەك جاعدايى اۋىر جانە ورتاشا اۋىر ناۋقاستاردى جاتقىزۋعا تۋرا كەلىپ تۇر.
سونىڭ وزىندە ارناۋلى ستاتسيونارلاردا توسەك-ورىن تاپشىلىعى قاتتى سەزىلۋدە. وتكەن اپتانىڭ سوڭىنا قاراي نۇر-سۇلتان قالاسى قوعامدىق دەنساۋلىق ساقتاۋ باسقارماسى باسشىسى ساۋلە قيسىقوۆا ناۋقاستاردىڭ سانى ءۇش ەسەگە دەيىن وسكەنىن, جۇقپالى اۋرۋلار جانە پروۆيزورلىق اۋرۋحانالاردا جاتقان ادامداردىڭ سانى 2,5 مىڭعا دەيىن جەتكەنىن مالىمدەگەن ەدى. جوعارىدا ايتقانداي, اۋرۋحاناعا تەك ءحالى ناشار جۇرت ءتۇسىپ جاتىر.
ونىڭ ايتۋىنشا, 12 ماۋسىمنان باستاپ نۇر-سۇلتان قالاسىنداعى مەديتسينالىق ۇيىمداردىڭ توسەك-ورىن قورىن قايتا قۇرۋعا بايلانىستى جۇقپالى جانە پروۆيزورلىق اۋرۋحانالارداعى توسەك-ورىن سانى 1351 ورىنعا ۇلعايتىلدى. ءۇش كۇندە قوسىمشا 830 توسەك-ورىن دايىندالعان. ونىڭ ىشىندە ۇلتتىق عىلىمي مەديتسينالىق ورتالىقتىڭ بازاسىندا تاعى 200 ينفەكتسيالىق توسەك-ورىن دايىندالدى. بۇگىندە ەلوردادا كوروناۆيرۋس ينفەكتسياسىمەن كۇرەسۋگە 3 135 توسەك-ورىندىق 12 دەنساۋلىق ساقتاۋ ۇيىمى جۇمىلدىرىلدى.
ميلليوننان اسا تۇرعىنى بار استانادا ىندەتتى تەجەۋ وڭاي تيمەي تۇر. بۇل كەسەلدىڭ كەلەڭسىزدىگىنە ەرتە قامدانعان باس قالانىڭ وزىندە جاعداي ۋشىققاندا, باسقا وڭىرلەردەگى احۋالدىڭ اۋىرلاعانىن باعامداي بەرۋگە بولادى.
ىندەت ەلىمىزدە ەندى ەتەك الا باستاعاندا ەلوردادا 13 كۇننىڭ ىشىندە كوروناۆيرۋسپەن اۋىرعان ادامداردى ەمدەۋگە ارنالعان جۇقپالى اۋرۋلار ورتالىعى اشىلعان ەدى. 200 توسەك-ورىنعا شاقتالعان بۇل مودۋلدىك ورتالىق قازىر تولىپ تۇر دەۋگە بولادى.
اتالعان ورتالىقتىڭ ديرەكتورى مىندەتىن اتقارۋشى ءلاززات رۋسپەكوۆا بۇگىندە بۇل جەردە 176 ناۋقاس جاتقانىن اتاپ ءوتتى. ونىڭ ىشىندە 20 ناۋقاس جان ساقتاۋ بولىمىندە جاتىر ەكەن. جان ساقتاۋ بولىمىندە بارى دا وسى – 20 ورىن. ياعني بۇل ءبولىم لىق تولىپ تۇر. سوعان قاراپ ءومىر مەن ءولىمنىڭ اراسىنداعى ناۋقاستار جاتاتىن بولىمگە ادامدار سىيماي جاتۋى دا مۇمكىن ەكەنىن, جاعدايى مۇشكىل ازاماتتار از ەمەس ەكەنىن اڭعاردىق. دەگەنمەن بۇعان دەيىن جۇقپالى اۋرۋلار ورتالىعى العاش اشىلعاندا وندا 200 توسەك-ورىننىڭ 100-ىندە جاساندى تىنىس الۋ قۇرىلعىسى ورناتىلعانى ءمالىم بولعان ەدى. سوندىقتان ناۋقاستاردىڭ ءومىرىن ساقتاپ قالۋ ءۇشىن دارىگەرلەردىڭ ايانىپ قالماسى انىق.
– قازىر ورتالىقتا 20 شاقتى بوس ورىن بار. بىراق مۇندا كۇن سايىن ناۋقاستار اكەلىنىپ جاتقاندىقتان, ورىن جەتكىلىكتى دەپ ايتا المايمىز. بىزگە كوبىنە ءحالى ناشار ناۋقاستاردى جاتقىزادى. بۇگىن ورتالىققا 5 ادام ءتۇستى. جازىلىپ نەمەسە جاعدايى ەداۋىر ءتاۋىر بولىپ شىعىپ جاتقاندار دا بار. مۇندا جاتقان ناۋقاستاردىڭ كوبىنىڭ وكپەسى قابىنعان. جالپى كوروناۆيرۋس ينفەكتسياسى پنەۆمونيامەن اۋىراتىنداردىڭ دەرتىن ودان سايىن كۇشەيتىپ جىبەردى, – دەدى ءلاززات رۋسپەكوۆا.
ول وسىنداي قىسىلتاياڭ كەزدە ءومىرىن تاۋەكەلگە تىگىپ, كۇنى-ءتۇنى قىزمەت ەتىپ جۇرگەن مەديتسينا ماماندارى دا ىندەت جۇقتىرىپ, قىزمەتكەرلەر تاپشىلىعى كۇشەيە تۇسكەنىن ايتتى. توسەك-ورىن تابىلعانىمەن, ناۋقاستارعا قارايتىن دارىگەرلەر جەتىسپەي, ولاردىڭ دا اۋىرىپ قالعانى جىعىلعانعا جۇدىرىق بولىپ تۇر. الايدا قىزمەتىنە ادال, حالىققا قامقور ابزال جاندار قالايدا تەز ساۋىعۋدىڭ قارەكەتىن جاساپ, قاتارعا قايتا قوسىلىپ, جۇمىسىنا كىرىسىپ كەتىپ جاتىر. مىسالى, ءبىز ءسوز ەتكەن ەلورداداعى جۇقپالى اۋرۋلار ورتالىعىنىڭ اۋىرىپ قالعان مەديتسينا ماماندارى بەتى بەرى قاراعاننان كەيىن, ەكى اپتا جاعدايىن تاعى باقىلاپ, ودان سوڭ جۇمىسقا قايتا شىعىپ جاتىر ەكەن.
استاناداعى جاڭادان سالىنعان جۇقپالى اۋرۋلار ورتالىعىنىڭ ديرەكتورى اننا تسەپكەنىڭ دەنساۋلىعىنا بايلانىستى ونىڭ مىندەتىن ۋاقىتشا ءلاززات رۋسپەكوۆا اتقارىپ وتىر ەكەن. ءلاززات رۋسپەكوۆا – نەگىزىندە نۇر-سۇلتان قالاسىنداعى №2 قالالىق ەمحانانىڭ باس دارىگەرى. جاڭا ورتالىقتاعى قىزمەتتى اتقارا باستاعانىنا ءبىر اپتاداي بولعانىن ايتقان ول بۇعان دەيىن ءوزى جۇمىس ىستەيتىن №2 ەمحانادا دا ىندەتپەن كۇرەس بەلسەندى جۇرگىزىلىپ جاتقانىن اتاپ ءوتتى.
ىندەت جۇقتىرعانداردىڭ سانى ازايار ءتۇرى جوق. وكىنىشكە قاراي, جۇرتتىڭ كوبى ءالى دە بەيساۋات, بەيعام ءجۇر. ساقتىق شارالارىن قاتاڭ ۇستاۋدى, كوپشىلىك جەردەن مەيلىنشە اۋلاق بولۋدى ەسكەرە بەرمەيمىز. سونىڭ سالدارىنان جاقىندارىمىز قيىن جاعدايعا ءتۇسىپ, سان سوعىپ قالىپ جاتىرمىز. اراقاشىقتىق ساقتاعانىمىز – اعايىننان الشاقتاعانىمىز ەمەس, اينالامىزدىڭ اماندىعىن ويلاعانىمىز. وسىنى جەتە ءتۇسىنىپ, تەرەڭ سەزىنە بىلسەك, بۇل بالەكەتكە بوگەت بولا الاتىن قوعامدىق يممۋنيتەتىمىز دە كۇشەيە تۇسەر ەدى.
