Toraighyrov University ءباسپاسوز قىزمەتىنىڭ مالىمدەۋىنشە, ەرەجەگە سايكەس, قاتىسۋشىلاردىڭ دەنساۋلىعى مەن قاۋىپسىزدىگى قاتاڭ باقىلانىپ, ۋنيۆەرسيتەت بازاسىندا تۇلەكتەر 2 شىلدەگە دەيىن ۇبت تاپسىرادى.
"بۇگىن ەمتيحاندى 251 تۇلەك تاپسىرۋدا. تاپسىرۋ پۋنكتى تالاپكەرلەردى قابىلداۋعا تولىق دايىن. مەملەكەتتىك كوميسسيانىڭ, قۇقىق قورعاۋ ورگاندارىنىڭ, تج جانە مەديتسينالىق كومەك بريگادالارى ۇيىمداستىرىلدى. دەزينفەكتسيالىق تۇنەل, سانيتايزەرلەر, وڭدەۋ قۇرالدارى, بەتپەردەلەر جانە قولعاپتار دايىندالدى. اۋديتوريالاردا باكتەريتسيدتى قۇرالدار مەن اۋا رەتسيركۋلياتورلارى ورناتىلعان", - دەدى ءباسپاسوز قىزمەتىندە.
اتا-انالارعا, مۇعالىمدەرگە جانە باسقا دا ءۇشىنشى تۇلعالارعا ۋنيۆەرسيتەت اۋماعىنا كىرۋگە تىيىم سالىنعاندىقتان ent-online.kz سايتىندا تاپسىرۋ بارىسىن باقىلاۋعا بولادى.
ەسكە سالايىق, بيىل پاۆلودار وبلىسىندا مەكتەپ تۇلەكتەرىنىڭ سانى 3772 ادامدى قۇرايدى. ونىڭ 86,2 پايىزى, ياعني 3250 تۇلەك ۇبت-عا قاتىسۋعا ءوتىنىش بەردى. بيىل العاش رەت تەستىلەۋگە كىرەر الدىندا تۇلعالاردى تۇرىنە قاراپ تانيتىن Face ID تەحنولوگياسى قولدانىلۋدا.
وسى ۋاقىتقا دەيىن وبلىسىمىزدا 17 تەست تاپسىرۋشىدان تىيىم سالىنعان زات تابىلىپ, ولاردىڭ ناتيجەلەرى جويىلدى. ەندى ولار 1 جىل بويى جوو-عا تۇسە المايدى. سونداي-اق اۋديتوريالارداعى بەينەجازبالار 25 تامىزعا دەيىن قايتا قارالىپ, تىيىم سالىنعان زاتتاردى پايدالانعان تۇلەكتەر انىقتالسا, ولاردىڭ دا ناتيجەلەرى جويىلادى.
سونىمەن قاتار, بيىل ەپيدەميولوگيالىق جاعدايعا بايلانىستى ۇبت-عا دايىندىق قاشىقتىقتان جۇرگىزىلدى. ۇبت سۇراقتارىنان 11-سىنىپتىڭ 4-توقسانىنداعى تاقىرىپتاردىڭ سۇراقتارى الىنىپ تاستالدى.
ايتا كەتەيىك, بيىل ۇبت تاپسىرعاندارعا ەلەكتروندى سەرتيفيكات بەرىلەدى.
