"جىگەر" مۇمكىندىگى شەكتەۋلى ازاماتتاردى قۇقىقتىق جانە الەۋمەتتىك قورعاۋ جونىندەگى الماتى وبلىستىق قوعامدىق بىرلەستىگى 2011 جىلدان بەرى جۇمىس ىستەپ كەلەدى. ونىڭ باستى باعىتى - جۇمىسسىز ايەلدەردى جۇمىسقا ورنالاستىرۋ. بىرلەستىك بازاسىندا توقىما قايتا وڭدەۋ بويىنشا تىگىن تسەحى جۇمىس ىستەيدى. 2019 جىلى قوعامدىق بىرلەستىك الەۋمەتتىك كاسىپكەرلىك جولىمەن ءجۇرۋدى شەشتى, "ەسكى زاتتاردىڭ جاڭا ءومىرى" جوباسىن ازىرلەدى جانە "ارەكەت" جوباسى اياسىندا "Samruk-Kazyna Trust" الەۋمەتتىك جوبالاردى دامىتۋ قورىنان گرانت ۇتىپ الدى.
گرانت قاراجاتىنا ونەركاسىپتىك تىگىن جابدىعى ساتىپ الىندى, ول جۇمىس ورىندارىنىڭ سانىن كەڭەيتۋگە مۇمكىندىك بەردى. حالىقتىڭ الەۋمەتتىك وسال توپتارىنان 12 ايەل جۇمىسقا ورنالاستىرىلدى. كاسىپورىن توسەك-ورىن جانە ءۇي توقىماسىن شىعارۋدى, سونداي-اق بالالار كيىمىن تىگۋدى جولعا قويدى. الايدا پاندەميا ءوز اسەرىن تيگىزبەي قويمادى. "جىگەر" كومانداسى بىردەن جاۋاپ بەردى: ءوندىرىس توقتاعان جوق, بىراق قايتا جانداندى. ەندى كوپ رەتتىك قورعانىش ماسكالارىن شىعارۋ كەرەك دەپ شەشىلدى.
"قاتاڭ كارانتيندىك شارالار قابىلدانعانعا دەيىن ءبىز تسەحتا جۇمىس ىستەدىك. ساپالى ماتەريالداردى پايدالانىپ, ماسكالار تىگىلدى. ءبىز بىردەن ءونىمنىڭ ءبىر بولىگىن قايىرىمدىلىققا – كوپ بالالى جانە از قامتىلعان وتباسىلارعا, زەينەتكەرلەرگە تابىستايمىز دەپ شەشتىك", - دەيدى "جىگەر" قب جەتەكشىسى اجار قىدىرالينا.
كارانتين كەزىندە 10 000 ماسكا تىگىلىپ, 4 000 ماسكا قايىرىمدىلىققا بەرىلدى, قالعاندارى ساتىلدى. تابىس ماتەريال ساتىپ الۋعا جانە تسەح قىزمەتكەرلەرىنىڭ ەڭبەگىنە اقى تولەۋگە جۇمسالدى.
"توتەنشە جاعداي رەجيمى جاريالانعاننان سوڭ ءبىز قىزمەتكەرلەردى ۇيدەن جۇمىس ىستەۋگە جىبەرىپ, ولارعا تىگىن ماشينكالارىن تاراتىپ بەردىك. ءبىز ءۇشىن كارانتين لايىقتى تۇردە جەڭىپ شىققان سىناق بولدى. ءبىزدىڭ قىزمەتكەرلەرىمىزدىڭ ەشقايسىسى جۇمىستان ايىرىلىپ, جۇمىسسىز قالعان جوق", - دەيدى اجار قىدىرالينا.
قازىر ماسكالار شىعارۋ توقتاتىلدى, ال تىگىن تسەحىنىڭ قىزمەتكەرلەرى دەكور ەلەمەنتتەرىن دايىنداۋمەن اينالىسۋدا: ولار ءوز قولدارىمەن بويلىق جانە ۇستەلدىك شامدار, سەبەتتەر جاسايدى, سونداي-اق ەسكى زاتتاردى قايتا وڭدەيدى جانە قالپىنا كەلتىرەدى. وندىرىلەتىن ءونىم جەرگىلىكتى تۇرعىندار اراسىندا ساتىلادى, ءونىمنىڭ قۇنى 8 000-نان 20 000 تەڭگەگە دەيىن, ولاردىڭ بارلىعى - ەكسكليۋزيۆتى.
"اسىرەسە وڭىرلەردە جۇمىسسىزدىق ماسەلەسى وزەكتى بولىپ قالۋدا جانە بۇل ماسەلەنى ەلەمەۋ دۇرىس ەمەس بولار ەدى. "ەسكى زاتتاردىڭ جاڭا ءومىرى" جوباسى ادامداردى جۇمىسپەن قامتاماسىز ەتۋگە باعىتتالعان جانە مۇندا حالىقتىڭ الەۋمەتتىك جاعىنان وسال توپتارىنان شىققان ايەلدەرگە ەرەكشە كوڭىل بولىنەدى. جالاقى ولارعا ساتىلاتىن ءونىم ەسەبىنەن بەرىلەدى. الەۋمەتتىك كاسىپكەرلىك وسىلاي جۇمىس ىستەيدى", - دەيدى "Samruk-Kazyna Trust" قورىنىڭ رەسمي وكىلى ميراس ىرگەباەۆ.
"جىگەر" قب-ءنىڭ جوسپارى - تالدىقورعان قالاسىنىڭ جۇمىسسىز ازاماتتارىنا جۇمىس ورىندارىن ۇسىنىپ, ءوز ءوندىرىسىن كەڭەيتە وتىرىپ, ءارى قاراي وسە بەرۋ.
