وڭتۇستىك قازاقستان وبلىسى شاردارا سۋ قويماسى تۇبىنەن ەجەلگى قالانىڭ ورنى تابىلدى. بۇل تۋرالى Otyrar.kz حابارلادى.
عالىمدار وسى ەجەلگى قالانىڭ ورنىن قاڭلى مەملەكەتى داۋىرلەگەن كەزەڭگە جاتقىزىپ وتىر. ال 1958-1963 جىلدار ارالىعىندا رەسەي ساراپشىلارى وسى توڭىرەككە زەرتتەۋ جۇمىسىن جۇرگىزگەن ەكەن. وكىنىشكە وراي, شاردارا سۋ قويماسىنىڭ سالىنۋى سەبەپتى باستالعان ءىس اياقتالماي قالعان كورىنەدى. «ماسكەۋدەن, الماتىدان كەلگەن ارحەولوگتاردىڭ پىكىرىنشە, بۇل ءوڭىر كونە تۇركى تايپالارىنىڭ مەكەنىنە جاتادى. ەندى تاريحي جادىگەرلەردى ساقتاپ قالۋدىڭ قامىن جاساۋىمىز قاجەت. بۇل ءىس جاقىن ارادا قولعا الىنادى دەگەن سەنىمدەمىن», - دەيدى شاردارا اۋداندىق ولكەتانۋ مۇراجايىنىڭ مەڭگەرۋشىسى نۇرلان سمايلوۆ.
نۇرلان سمايلوۆتىڭ الاڭداۋىنىڭ ءجونى بار. بۇل جەردە قازىر جاتقان باعالى قولونەر بۇيىمدارىن شاردارا سۋ قويماسىنان كوتەرىلگەن سۋ شايىپ كەتۋى مۇمكىن. باستىسى, عالىمدار ەجەلگى قالا توڭىرەگىندەگى تۇجىرىمداردى ابدەن ساراپتاۋدان وتكىزىپ, ونى ساقتاپ قالۋدىڭ جولدارىن قاراستىرۋى قاجەت.
دانيار تۇيمەباي.
