ەڭ الدىمەن ءتىلدىڭ – قۇبىلىس, ءتىلدىڭ – قۇندىلىق, ءتىل – ۇلتتىڭ ەڭ باستى تىرەگى ەكەنىن جان دۇنيەسىمەن سەزىنە الاتىن جاڭا زامان كەلە جاتقانى ءبىزدى ەرەكشە مەرەيلەندىرەدى.
قازاق ءتىلى دەگەن ءسوز – قازاق ادەبيەتى دەگەن ءسوز! قازاق ءتىلى – ول ابايدىڭ ءتىلى!
ءتىل ساياساتىن جۇرگىزگەندە جاداعايلىققا ۇرىنباعانىمىز ءجون. ءتىل ماسەلەسى كوشەدە دە ەمەس, كابينەتتەردە دە ەمەس, قازاق ادەبيەتىنىڭ كەڭ قانات جايۋىمەن وركەندەيدى! اباي رۋحىن تولىق سەزىنە بىلگەن جۇرتقا انا ءتىلىن ارداقتاۋ مارتەبەگە اينالادى! ءبىز سول جولدا مۇرات-مۇددەمىزدى بىرىكتىرە ءبىلۋىمىز كەرەك.
جالعان ۇران جارعا جىعاتىنىن ۇمىتپاعانىمىز دۇرىس. قازىر دە قازاق ءتىلىن قولداۋ دا بار دا, قولدانۋ دا بار. ونى مەملەكەت باسشىسى ءوز سوزىندە «وسى وتىز جىل ىشىندە قازاق ءتىلىن دامىتۋعا قاتىستى ەشتەڭە ىستەلگەن جوق دەۋگە بولمايدى. تۋعان ءتىلىمىزدىڭ قولدانۋ اياسىن كەڭەيتۋ ءۇشىن كوپ جۇمىس اتقارىلدى. وعان داۋ جوق. مۇنى سىرت كوز – سىنشىلار دا ايتىپ ءجۇر. بىراق ولاردىڭ كەيبىرى مۇنداي ۇردىسكە اسا قۋانا قويمايدى. ويتكەنى ەندى قازاق ءتىلىنىڭ دامۋىن تەجەپ, ەل ىشىندە كەڭ ءورىس الۋىن توقتاتۋ مۇمكىن ەمەس ەكەنىن سەزەدى», دەپ اشىق ايتادى.
وتىز جىلداعى اتقارىلعان سول اۋقىمدى جوبالاردىڭ ءبىرى – «بابالار ءسوزىنىڭ» 100 تومدىعى دەر ەدىك. جادىمىزدا جاڭعىرعان جاۋھار جىرلارىمىزدى جيناقتاۋ, ەرتە زاماننان بۇگىنگە جەتكەن ەرتەگىلەرىمىزدى ەكشەۋ, ونى ۇرپاق يگىلىگىنە اماناتتاۋ – انا ءتىلىنىڭ اياسىن كەڭەيتۋ ەكەنىن ايتا ءبىلۋىمىز كەرەك.
انا ءتىلىن ايالاۋدا الاش يدەياسىن, ءاليحان بوكەيحان, احمەت بايتۇرسىن ۇلى باستاعان قازاق زيالىلارىنىڭ ايقىن جولىن تەمىرقازىق ەتسەك ەل ەرتەڭىنە جاڭا ەسىكتەر اشىلارى ءسوزسىز!
ءتىل – اداممەن ادامدى عانا بايلانىستىرىپ قويمايدى, زامانالار مەن ۋاقىتتاردى, قۇرلىقتار مەن ۇلى وركەنيەتتەردى, الەم ادەبيەتتەرىن بايلانىستىراتىن جاندى قۇبىلىس.
وسى ارالىقتا قازاق ءتىلىنىڭ قادامى نىق, بولاشاعى ايقىن, مۇراتى بيىك بولعانى اربىرىمىزگە امانات.
قازاق ءتىلى انانىڭ عانا ءتىلى ەمەس, ادامزاتتىڭ ءتىلى, قازاق تىلىندە مىڭجىلدىقتاردىڭ باي مۇراسى ساقتاۋلى جاتىر.
قازاق ءتىلى – ۇلتتىڭ جانى!
ارينە قاسىم-جومارت كەمەل ۇلى ايتقانداي, تىلدىك پروبلەمانىڭ ۇلكەن ساياسي ءمانى مەن ماڭىزى دا جوق ەمەس. ء«تىل ماسەلەسىنە بەيجاي قاراپ, نەمقۇرايدىلىق تانىتاتىن بولساق, مەملەكەتتىگىمىز بەن ۇلتتىق قاۋىپسىزدىگىمىزگە قاتەر ءتوندىرىپ الۋىمىز مۇمكىن. بۇعان ۋكراينانى مىسالعا كەلتىرسەك تە جەتكىلىكتى دەپ ويلايمىن. مەملەكەتتىك ءتىلدى دامىتۋ ىسىندە قىزبالىققا سالىنىپ, ونىڭ قولدانۋ اياسىن كۇشپەن كەڭەيتۋگە ۇمتىلۋدىڭ كەرى اسەرى بولارى انىق. ويتكەنى ونىڭ سوڭى ۇلتارالىق ارازدىققا دەيىن جەتۋى مۇمكىن. سونىمەن قاتار بۇل تۇرعىدا گەوساياسي جاعدايدى دا نازاردان تىس قالدىرماۋىمىز كەرەك. اسىرەسە رەسەيمەن اراداعى شەكارامىزدىڭ الەمدەگى ەڭ ۇزىن شەكارا ەكەنىن دە استە ەستەن شىعارماعان ءجون. گەوگرافيا – گەوساياساتتىڭ ماڭىزدى فاكتورىنىڭ ءبىرى», دەيدى مەملەكەت باسشىسى.
ەندەشە, ءتىلدى سىرتقى كۇشتەردەن قورعاي ءجۇرىپ, ءتىل ارقىلى جاھاندانۋدىڭ كۇشىنەن قورعانا بىلەيىك.
حالىق – ۇلتتىق رۋحتا عانا ەڭسە كوتەرەدى! حالىق – انا تىلىندە عانا تىنىستايدى, حالىق – ۇلتتىق ادەبيەتىندە عانا ءومىر سۇرەدى!
سەرىك اقسۇڭقار ۇلى,
قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى
