ۇشاق قاتىناسى قايتا جانداندى

ەكونوميكا • 26 ماۋسىم، 2020

ۇشاق قاتىناسى قايتا جانداندى

26 رەت كورسەتىلدى

سوڭعى جىلدارى ەلىمىزدە شەكارالىق ايماق تۇرعىندارىنا مەملەكەت تاراپىنان كوڭىل بولىنە باستاعانى بەلگىلى. وسىنىڭ ءبىر دالەلى رەتىندە الماتى وبلىسىندا نارىنقول اۋدانىنىڭ قايتا قۇرىلعانىن ايتۋعا بولادى.

ازامات قاسىم

ال شىعىس قازاقستاندا ازىرگە جەكە اۋدان اشىلماسا دا، شەكارادا ورنالاسقان ەلدى مەكەندەردىڭ ينفراقۇرىلىمىن نىعايتۋ جۇمىستارى قولعا الىنىپ جاتقانى قۋانتادى. جاقىندا گازەتىمىزدە شەكارا شەبىندەگى تارباعاتاي اۋدانىنىڭ اقجار جانە اقسۋات اۋىلدارىندا مەملەكەت-جەكەمەنشىك سەرىكتەستىك اياسىندا جەكە ۇيلەر سالىنا باستاعانىن جازعان بولاتىنبىز. ەندى مىنە، شەكارا ايماعىندا ورىن تەپكەن تاعى ءبىر اۋدان زايساندا 30 جىلدان كەيىن الماتىعا باراتىن ۇشاق قاتىناسى قايتا جاندانىپ، جەرگىلىكتى تۇرعىنداردىڭ توبەسىن كوككە جەتكىزگەندەي بولدى. ءيا، زايسان تۇرعىندارىنىڭ الاتاۋ باۋرايىنا ۇشاقپەن ۇشپاعاندارىنا 30 جىلعا جەتىپ جىعىلىپتى. 1 ماۋسىمنان باستاپ زايساندىقتار ۇشاقپەن اۋەلى ۇرجارعا جەتىپ، ءارى قاراي الماتىعا ۇشىپ جاتىر. «تاسىمالداۋشى – «وڭتۇستىك اسپانى» اۋە كومپانياسى. ۇشاق اپتاسىنا ءۇش رەت – دۇيسەنبى، بەيسەنبى، سەنبى كۇندەرى ۇشادى. وسكەمەننەن كۇندىزگى ساعات 11-دە شىققان ۇشاق 12-دە زايسانعا كەلەدى. 12:40-تا ۇرجارعا باعىت الىپ، 13:30-دا سوندا بولادى. «زايسان – ءۇرجار» باعىتىنداعى ۇشاق قۇنى – 11 250 مەن 16 250 تەڭگە ارالىعىندا. بۇل ەندى بيلەتتى العان كۇنىنە بايلانىستى. ال ءۇرجاردان الماتىعا دەيىنگى بيلەت باعاسى – 14 مىڭ. 15 جاسقا دەيىنگى بالالارعا 7 مىڭ، ەكى جاسقا دەيىنگى سابيلەرگە تەگىن. بۇل باعىت وبلىس تاراپىنان سۋبسيديالانعان. سوندا زايسان تۇرعىندارى 25-30 مىڭ تەڭگەگە الماتىعا جەتىپ الادى» دەيدى زايسان قالاسىنداعى اۋەجاي ديرەكتورى ەرمەك تۇرسىنوۆ.

وسى جەردە ەسكەرتە كەتەر ءبىر دۇنيە، زايسان قالاسى مەن وسكەمەن اراسىندا ۇشاق قاتىناسى بۇرىننان بار. بۇل باعىتقا دا وبلىستىق بيۋدجەتتەن سۋبسيديا بەرىلەدى. ءبىزدىڭ سۇيىنشىلەي ايتىپ وتىرعانىمىز – 30 جىلدان كەيىن ىسكە قوسىلعان «زايسان – ءۇرجار – الماتى» باعىتىنداعى ۇشاق.

وسى باعىتتىڭ اشىلعانى الاكولگە دەمالۋعا باراتىن جۇرتشىلىقتى دا ەرەكشە قۋانتىپ وتىر. «اۋدان تۇرعىندارى بۇگىنگە دەيىن الاكولگە كىسى باسى اۆتوبۋسقا 7-8 مىڭ، تاكسيگە 10 مىڭ تەڭگە تولەپ، اينالما جولمەن شارشاپ-شالدىعىپ زورعا جەتەتىن ەدى. سوندىقتان دا كوپشىلىك الاكولگە بارۋعا ىنتالى بولعانىمەن جولدىڭ ازابىنان دەمالىسقا بارۋدان باس تارتاتىن. مىنە، ەندى ايدىندى الاكولگە نەبارى ەكى-ءۇش ساعاتتا ۇشاقپەن ەش شارشاماي-اق جەتۋگە بولادى. ال زايسان تۇرعىندارى الماتىعا اۆتوبۋسپەن تاۋلىك بويى ءجۇرىپ، جول ازابىن ابدەن تارتىپ ەدى. ەندى ءۇش-ءتورت ساعاتتا الماتىعا بارادى. اۋدان تۇرعىندارى وسى يگى ءىستى قولعا العان وبلىس اكىمى دانيال احمەتوۆ پەن اۋدان اكىمى سەرىك زاينۋلدينگە ءدان ريزا»، دەيدى زايسان قالاسىنىڭ تۇرعىنى، قوعام بەلسەندىسى ەركەبۇلان زاعىپاروۆ.

شىعىس قازاقستان وبلىسى