بىزگە مۇنداي قىزىقتى دەرەكتى ەكىباستۇز قالاسىنىڭ تۇرعىنى جومارت ماتەنوۆ حابارلادى. ونىڭ ايتۋىنشا, ءبىر اۋلادان جاستارى شامالاس ءۇش چەمپيوننىڭ شىعۋى – سيرەك كەزدەسەتىن وقيعا.
– بۇگىندە ۇشەۋى دە سپورتسۇيەر قاۋىمعا تانىمال. ولاردىڭ ءبىر اۋلادا ەرجەتىپ, الەمدىك سپورتتىڭ شىڭىن باعىندىرۋى – ماقتانارلىق جانە جاستارعا ۇلگى بولارلىق جاعداي, – دەيدى جومارت ماتەنوۆ.
بەلگىلى بولعانداي, مۇسا تۇرسىنعاليەۆ اكادەميك ماردانوۆ كوشەسىندەگى 23-ۇيدە, دياس ەرەنعايىپوۆ ساتباەۆ كوشەسىندەگى 48-ۇيدە, ال نۇرسۇلتان حاسانوۆ ەستاي بەركىمباەۆ كوشەسىندەگى 104/2-ۇيدە تۇرعان.
قىزىق ءۇشىن ەكىباستۇزدىڭ ەلەكتروندى كارتاسىنا ءۇڭىلىپ, سپورتشىلار تۇرعان ۇيلەردىڭ ورنالاسۋىنا نازار اۋداردىق. شىنىمەن دە, ءۇش ءۇي ءۇش ءتۇرلى كوشەمەن اتالسا دا, ءبىر-بىرىنە وتە جاقىن ورنالاسقان ەكەن.
سپورتتاعى قادامدارىن ەكىباستۇزدا باستاعان سپورتشىلاردان قازىر تۋعان قالاسىندا تۇرىپ جاتقانى دياس قانا. ول وسى شاھاردان «Yerengaipov Team» دەگەن جەكە كلۋبىن اشىپ, جەرگىلىكتى جاستاردى جەكپە-جەك ونەرىنە باۋلۋدا. نۇرسۇلتان حاسانوۆ – بۇگىندە پاۆلودار قالاسىنىڭ تۇرعىنى. ىشكى ىستەر ورگاندارىندا قىزمەت اتقارادى. ال مۇسا سپورتتىق مانسابىنا بايلانىستى مۇحيت اسىپ, اقش-تى مەكەن ەتۋدە.
ەندى سپورتشىلاردىڭ جەتىستىكتەرىنە از-كەم توقتالىپ وتەيىك. ءۇش سپورتشىنىڭ ىشىندە جاس جاعىنان ۇلكەنى – نۇرسۇلتان حاسانوۆ. ول 1991 جىلدىڭ 7 مامىرىندا دۇنيەگە كەلگەن. قازاقستاننىڭ ەڭبەك سىڭىرگەن جاتتىقتىرۋشىسى سابىرجان جاقىپوۆتىڭ شاكىرتى.
نۇرسۇلتان – ازيانىڭ ەكى دۇركىن چەمپيونى. 2012 جانە 2015 جىلدارى سارىقۇرلىقتىڭ تەڭدەسسىز سپورتشىسى بولدى. ال 2017 جىلى ماجارستان استاناسى بۋداپەشتتە وتكەن الەم بىرىنشىلىگىندە چەمپيون اتانىپ, ەل مەرەيىن ءوسىردى. بىلتىر رەسەيدىڭ اناپا قالاسىندا ۇيىمداستىرىلعان الەم كۋبوگىندا توپ جارىپ, قورجىنىن كەزەكتى قوماقتى جۇلدەمەن تولىقتىردى. ءبىر سوزبەن ايتساق, نۇرسۇلتان حاسانوۆ ءدال قازىرگى ۋاقىتتا پاۆلودار ءوڭىرىنىڭ ماڭدايالدى سپورتشىلارىنىڭ كوشىن باستاپ تۇر.
جەكپە-جەك ونەرىنىڭ جانكۇيەرلەرىنە دياس ەرەنعايىپوۆتىڭ ەسىمى جاقسى تانىس. ول 1995 جىلى تۋعان. ارالاس جەكپە-جەكتەن ەل نامىسىن قورعاپ ءجۇر. وسى كۇنگە دەيىن كاسىپقوي رينگتە 11 كەزدەسۋ وتكىزىپ, سونىڭ سەگىزىندە جەڭىسكە جەتكەن. قايسىبىر جارىستا چەشەنستان پرەزيدەنتى رامزان قادىروۆتىڭ ءوزىن ونەرىمەن ءتانتى ەتكەنى بار. سول كەزدە ءبىزدىڭ سپورتشىعا ريزا بولعان قادىروۆ تىك تۇرىپ قۇرمەت كورسەتىپ, قولىن قىسقان-دى.
دياس ەرەنعايىپوۆتىڭ 2017 جىلى دجيۋ-دجيتسۋدان يتاليادا وتكەن الەم بىرىنشىلىگىندە چەمپيون بولعانىن بولە-جارا اتاپ وتۋگە ءتيىسپىز. سونداي-اق ول جەكپە-جەك پەن دجيۋ-دجيتسۋدان بولەك, قويان-قولتىق ۇرىس, پانكراتيون, گرەپپلينگ سەكىلدى سپورت تۇرلەرىن دە جاقسى مەڭگەرگەن. جوعارىدا اتاپ وتكەنىمىزدەي, قازىر سپورتتىق مانسابىن جالعاستىرا ءجۇرىپ, جەكە كلۋبىن اشىپ, شاكىرت تاربيەلەۋدە.
بۇگىندە مۇسا تۇرسىنعاليەۆتى دە بىلمەيتىن ادام كەمدە-كەم. كاسىپقوي بوكستا قارسىلاس شىداتپاي جۇرگەن شارشى الاڭ شەبەرى 1994 جىلى تۋعان. جارتىلاي جەڭىل سالماقتا ونەر كورسەتەتىن مۇسا, وسى كۇنگە دەيىن 10 جەكپە-جەك وتكىزىپ, بارلىعىندا جەڭىسكە جەتتى. سونىڭ التاۋىن ۋاقىتىنان بۇرىن, ياعني, نوكاۋتپەن اياقتاعان.
مۇسانىڭ مىقتىلىعىنا تاڭداي قاققاندار كوپ. ماسەلەن, ول كاسىپقوي رينگتەگى العاشقى جەكپە-جەگىن 2017 جىلدىڭ قاراشا ايىندا وتكىزدى. ول ءدال سول جىلى مەكسيكادا 19 كۇننىڭ ىشىندە التى كەزدەسۋگە شىعىپ, بارلىعىندا قارسىلاستارىن تىزەرلەتتى.
مۇسا وسى جىلدىڭ ناۋرىزىندا اقش-تا ارگەنتينالىق ەسەكەل تەۆەسپەن قولعاپ تۇيىستىرۋگە ءتيىس ەدى. الايدا جەكپە-جەك كوروناۆيرۋسقا بايلانىستى كەيىنگە شەگەرىلدى. ايتپاقشى, مۇسا – جارتىلاي جەڭىل سالماقتا WBA-عا (بۇكىلالەمدىك بوكس قاۋىمداستىعى) قاراستى NABA (North America Boxing Association – سولتۇستىك امەريكا بوكس قاۋىمداستىعى) تۇجىرىمىنىڭ چەمپيونى.
اتاپ وتەرلىگى, ءۇش جەرلەسىمىز دە سپورتتىق مانسابىن ءالى اياقتاعان جوق. قايتا, ناعىز بابىندا ءجۇر. دەمەك, ولاردىڭ التىن-كۇمىس يەلەنىپ, قازاقستاننىڭ ابىرويىن ودان ءارى اسقاقتاتۋعا مۇمكىندىكتەرى مول. جۇدىرىعى جويقىن, تەپكىسى تەمىر جىگىتتەردى جەڭىس تۇعىرىنان عانا كورەيىك!
فارحات امىرەنوۆ
پاۆلودار وبلىسى,
ەكىباستۇز قالاسى
