ەكى ايلىق ۇزىلىستەن كەيىن ەۋروپاداعى دوپ دوداسىن گەرمانيا بۋندەسليگاسى باستاپ بەرگەنى بارشاعا ءمالىم. جانە ەڭ ءبىرىنشى بولىپ ماۋسىمدى اياقتايتىن دا وسى نەمىستەر. گەرمانيادا چەمپيوناتتىڭ اياقتالۋىنا ءبىر تۋر عانا قالدى. سوڭعى تۋر ويىندارى 27 ماۋسىمعا جوسپارلانعان. ال چەمپيون اتانعان كوماندا وسىدان ەكى تۋر بۇرىن انىقتالىپ قويدى. بيىلعى چەمپيوندىقتى قوسا ەسەپتەگەندە «باۆاريا» كومانداسى قاتارىنان سەگىزىنشى جىل ۇزدىك اتانىپ, باس جۇلدەنى ەشكىمگە بەرمەي كەلە جاتىر. چەمپيوناتتى ەڭ كەيىنگى بولىپ اعىلشىن پرەمەر-ليگاسى جالعاستىردى.
جالپى وسى ءتورت چەمپيوناتتى باقىلاي كەلە, فۋتبولدىڭ بۇرىنعىداي ەمەس ەكەنىنە كوز جەتكىزدىك. كوروناۆيرۋس تەك فۋتبولشىلارعا عانا ەمەس, فۋتبولعا دا ءوز اسەرىن تيگىزبەي قويماپتى. سونىمەن پاندەميادان كەيىن فۋتبول قالاي وزگەردى, انىعىراق ايتقاندا ۆيرۋس فۋتبولدى قالاي وزگەرتتى؟
«كورەرمەنسىز ساحنا – تۇل» دەگەندەي, جانكۇيەرسىز ستاديون دا – تۇل ەكەن. قانشا جەردەن سۇيىكتى كومانداڭ جاسىل الاڭدا بارىن سالىپ ويناپ جاتسا دا, گول سوعىلعاندا قۋانىپ, قاقپاعا دوپ وتكىزىپ العاندا فۋتبولشىمەن بىرگە مۇڭاياتىن جانكۇيەر بولماسا, فۋتبولدا ەش قىزىق جوق ەكەن. بۇل جاعداي فۋتبولشىلارعا دا قاتتى اسەر ەتكەن سىڭايلى. سوندىقتان يسپانيا جانە انگليا فۋتبولىنىڭ ۇيىمداستىرۋشىلارى ستاديونعا جاساندى داۋىس ورناتىپ جاتىر. ياعني گول سوعىلعاندا, قاقپا الدىندا قاۋىپتى ءسات تۋعاندا ستاديوندا جانكۇيەرلەردىڭ ەموتسياسىن بىلدىرەتىن جاساندى داۋىس قويىلادى. ءبىر قىزىعى, بۇرىندارى ۆيدەو ويىندار قۇراستىراتىن امەريكالىق EA Sports كومپانياسى فۋتبول ماتچتارىنان داۋىس جازىپ الاتىن بولسا, قازىر سول داۋىستاردى ەندى ستاديوننىڭ وزىندە قولدانىپ جاتىر.
فۋتبولشىلاردىڭ فيزيكالىق دايىندىعى – ماۋسىمنىڭ باسىنداعىداي. ءتىپتى ودان دا ناشار دەپ ايتۋعا بولادى. ويتكەنى بۇل جولعى ءۇزىلىس جاز كەزىندەگى ۇزىلىستەن كوپكە سوزىلىپ كەتتى. سونداي-اق فۋتبولشىلار ماۋسىم ارالىق كەزەڭدەگىدەي جاتتىعۋ جاساپ, جولداستىق ماتچ وتكىزە المادى. ويىننىڭ سوڭىندا فۋتبولشىلاردىڭ شارشاپ قالعانى دا وسى فيزيكالىق دايىندىقتىڭ تومەندىگىنەن.
دەسە دە فۋتبولشىلار الاڭدا بارىن سالىپ, ءبارى مۇمكىندىگىنشە ويناپ جاتىر. مۇنى ولاردىڭ فۋتبولدى ساعىنعانىمەن بايلانىستىرۋعا بولادى. سوندىقتان ويىنشىلاردىڭ تامىرى تارتىلىپ, جاراقات الىپ قالعان جاعدايلار جيىلەپ كەتتى. ادەتتە جوعارى قارقىندا وتكەن ويىنداردا وسىنداي جاعداي كوپ كەزدەسەتىن ەدى.
سونداي-اق ءۇش ايلىق ءۇزىلىس فۋتبولشىلاردان بولەك, قاقپاشىلارعا دا كەرى اسەرىن تيگىزدى. كارانتين ۋاقىتىندا ولاردىڭ دايىندىق جۇمىستارىن جۇرگىزۋى وتە قيىنعا سوقتى. ونىڭ ۇستىنە جولداستىق كەزدەسۋلەردىڭ وتپەۋى دە قاقپاشىلارعا قيىندىق تۋعىزعانى انىق.
ويىندار كەستەسى وتە تىعىز جاسالعانى باپكەرلەرگە فۋتبولشىلاردى ءتۇرلى پوزيتسيالاردا سىناپ كورۋگە مۇمكىندىك بەرمەي جاتىر. جاتتىقتىرۋشىلاردىڭ باستى ماقساتى – قالعان ويىنداردى جاراقاتسىز جانە تاۋەكەلگە بارماي ويناپ شىعۋ بولىپ تۇر. سونىمەن قاتار فۋتبولشىلاردىڭ تەحنيكالىق مۇمكىندىكتەرى دە ورتاشادان تومەن ەكەنى كورەر كوزگە انىق بايقالادى.
ال ۋەفا-نىڭ كوماندالارعا ويىن بارىسىندا فۋتبولشىلاردى بۇرىنعىداي ۇشەۋ ەمەس, بەسەۋگە دەيىن اۋىستىرۋعا رۇقسات بەرگەنى جاتتىقتىرۋشىلاردىڭ وڭ جامباسىنا كەلدى. سەبەبى بىرقاتار ويىندا ماتچ بارىسىندا فۋتبولشىلار ءجيى جاراقات الىپ جاتقانىن ايتتىق. ەكىنشى جاعىنان كەزدەسۋ تاعدىرىن وزگە ارناعا بۇرىپ جىبەرە الاتىن كرەاتيۆتى ويىنشىلاردى الاڭعا شىعارۋعا مۇمكىندىك تۋىپ جاتىر. جانە بۇل كەي جاعدايدا وڭ اسەرىن بەرىپ, كوماندالاردى جەڭىسكە جەتەلەۋدە.
كۇنتىزبەنىڭ تىعىز جاسالۋىن كەي كوماندالار ءتيىمدى پايدالانىپ جاتقانىن دا ايتا كەتۋ كەرەك. ماسەلەن, اپل-دىڭ رەستارتتاعى ەڭ العاشقى ماتچىنىڭ ءبىرى بولعان «مانچەستەر سيتي» مەن «ارسەنال» اراسىنداعى ويىندا «زەڭبىرەكشىلەردىڭ» باس باپكەرى ميكەل ارتەتا «قالالىقتارعا» توتەپ بەرۋ مۇمكىن ەمەس ەكەنىن ءتۇسىنىپ, الاڭعا نەگىزگى ەمەس, جاستاردان قۇرالعان ارالاس قۇرامىن شىعاردى. سوندىقتان ول بۇل ماتچتا كوماندانى ورگە سۇيرەيتىن ويىنشىلاردىڭ كۇشىن بوسقا سارقىعانشا, بار نازاردى كەلەسى تۋرعا قاراتقان-دى. بىراق «ارسەنال» كەلەسى تۋردا ءبارىبىر نەگىزگى قۇراممەن «برايتوندى» جەڭە المادى.
جالپى قارسىلاسىنا قاراعاندا ءالسىز سانالعان كوپ كوماندا وسىنداي ستراتەگيالىق قادامعا بارىپ جاتىر. يسپانيادا دا وسى جاعداي. لا ليگانىڭ 29-تۋرىندا «ەيبار» «رەالعا» قارسى وتكەن ويىندا نەگىزگى قۇرامىن شىعارعان جوق. ويتكەنى جەڭىلەتىنىن ءبىلدى. ال «ەيبارعا» ءۇش كۇننەن كەيىن ءوز دەڭگەيىندەگى كوماندامەن وتكەن ويىن ماڭىزدىراق ەدى.
كوپ جاعدايدا ويىن ىرعاعى ادەتتەگىگە قاراعاندا تومەنىرەك. كەيبىر ويىندار ءبىرىنشى مينۋتتان سوڭعى مينۋتقا دەيىن ءبىر دەڭگەيدە ءوتىپ جاتىر. سونداي-اق كارانتيننەن كەيىنگى ماتچتاردا فۋتبولشىلاردىڭ تورەشىلەرمەن تارتىسۋى دا ازايعان. ءوز كەزەگىندە ويىنشىلار دا تورەشىلەردىڭ شەشىمىنە وڭ كوزقاراسپەن جانە سابىرلىقپەن قاراپ جاتىر. ءبىر جاعىنان وسىلاي بولۋى كەرەك سياقتى. بىرىنشىدەن, الەمدەگى جاعداي, ياعني كوروناۆيرۋس پاندەمياسى ولاردى سابىرعا شاقىرسا, تاعى ءبىر سەبەبى جانكۇيەرلەر ولاردى قولداپ-قۋاتتاماعان سوڭ فۋتبولشىلار دا اسا قاتتى ەموتسياعا بەرىلىپ جاتقان جوق.
جالپى كارانتيننەن كەيىنگى فۋتبولدىڭ بۇگىنگى جاعدايى وسىنداي... فۋتبول شىنىمەن بۇرىنعىداي ەمەس...
