– بۇل مارقۇم اپا-جەزدەمنىڭ ءۇيى ەدى. جەزدەم قايتىس بولعالى ءبىراز جىل ءوتتى. وسىدان ءۇش جىل بۇرىن اپام دا اۋىرىپ, باقيعا اتتاندى. كەتەرىندە ءۇيىن اماناتتاپ, قۇجاتتارىن ماعان تاستاپ كەتكەن. سودان تەرەزەسىن جاۋىپ, ەسىگىن ق ۇلىپتاپ قويدىم. اندا-ساندا بارىپ كورىپ تۇراتىنمىن. سول ءۇيدى اۋداندىق ءماسليحاتتىڭ دەپۋتاتى, وسىنداعى الپاۋىت سەرىكتەستىكتىڭ اتقارۋشى ديرەكتورى تولەندى وسپانوۆ دەگەن كىسى جۇمىسشىلارى مەن تەحنيكاسىن جىبەرىپ, ءبىر-اق كۇندە بۇزىپ تاستاپ وتىر. قايتا دەر كەزىندە كورىپ قالدىم. بالەنباي تەحنيكا, بالەنباي ادام جابىلىپ تارسىلداتىپ بۇزىپ جاتىر ەكەن. ەندى ءبىر ساعات كەشىككەنىمدە, دىم قالماعانداي ەكەن. ءوزىم بارىپ توقتاتتىم. ۇيالى تەلەفونىممەن سۋرەتكە ءتۇسىرىپ, وبلىس اكىمىنىڭ سايتىنا سالدىم. قورىقتى ما, ايتەۋىر سودان كەيىن عانا توقتاتتى. قاسىندا سول سەرىكتەستىككە تيەسىلى ءۇي تۇر. سويتسەم, سول ۇيگە سۋ وتكىزۋ ءۇشىن سورعىش ورناتپاقشى بولىپتى. ودان كەيىن اينالاسىن قورشاپ, ەكى استىق قويماسىن سالعىسى كەلگەن. وعان ەندى وسى ءۇي عانا كەدەرگى بولىپ تۇر عوي. ول كىسى قازىر قاراپ جاتپاي قول استىنداعى جۇمىسشىلارىنان «ول ءۇي بوس تۇرعان. ول جەرگە نەشە ءتۇرلى ناشاقورلار جينالاتىن. بيداي ۇرلاپ تىعاتىن» دەگەن قولحات جيناپ جاتىر ەكەن, دەدى ديەۆ اۋىلىنىڭ تۇرعىنى جانگەلدى بەكتەنبەرگەنوۆ.
ج.بەكتەنبەرگەنوۆ ءۇي بۇزىلعان 9 ماۋسىم كۇنى «الدەكىمدەردىڭ بۇل سەرىكتەستىك ديرەكتورىنىڭ تاپسىرماسى» دەپ ءۇيىن قيراتىپ كەتكەنى, ءوزىنىڭ زاڭدى مەنشىك قۇقىعىنىڭ قورعالۋىنا كومەكتەسىپ, شارا قولدانۋدى سۇراپ اۋىل اكىمى مەن اۋداندىق پوليتسيا بولىمىنە شاعىم تۇسىرگەن. ودان كەيىن دەپۋتات ءۇي يەسىنە ادام جىبەرىپتى. سەرىكتەستىكتىڭ كۇزەت قىزمەتىنىڭ باستىعى جابىرلەنۋشىگە كەلىپ, بۇل ۇيگە قانشا اقشا العىسى كەلەتىنىن سۇراعان. «ەكى ميلليون» دەگەن جاۋاپتى ەستىگەن كۇزەت باستىعى ءۇنسىز بۇرىلىپ كەتىپتى. سودان ەشكىمنەن حابار بولماعان. جارتىلاي قيراپ, جابىن اعاشىن بەلگىسىز بىرەۋلەر تاسىپ اكەتكەن ءۇي قابىرعاسى ىرسيىپ, قاڭىراپ تۇر.
قيراعان ءۇيدىڭ قۇجاتى ج. بەكتەنبەرگەنوۆتىڭ قولىندا. اباي كوشەسىندە ورنالاسقان ءۇش بولمەلى ۇيگە 8 سوتىق جەر تيەسىلى. كەزىندە كەڭشار مەنشىگىندە بولعان ەكەن. 2007 جىلى جابىرلەنۋشىنىڭ جەزدەسى مارقۇم ەسلام اقشولاقوۆ ءوز اتىنا اۋدارىپ, جەكەشەلەندىرىپ الىپتى.
– جەزدەم قايتقاننان كەيىن اپام قوزىباي اۋكەنوۆا بۇكىل قۇجاتتارىن دايىنداپ, بۇل ءۇيدى ءوز اتىنا تىركەگىسى كەلدى. سودان ارقالىقتاعى قىزىنا بارىپ كەلەمىن دەپ كەتىپ ەدى, اياق استىنان جولدا اۋىرىپ قايتىس بولدى. ەندى جازىم عوي, نە ىستەي الامىز وعان؟ ءۇيدى ساتاسىڭ با, ساتپايسىڭ با, ءوزىڭ بىلەسىڭ, دەپ بۇكىل قۇجاتىن ماعان تاستاپ كەتكەن. ءسويتىپ اپام دا, مەن دە ءۇيدى ءوز اتىمىزعا اۋدارىپ ۇلگەرە المادىق. قازىر ونىڭ بارىنە شاپقىلاۋ ءۇشىن اقشا كەرەك. اۋىلداعى ادامعا اقشانى كىم بەرەدى؟ سودان تۇرعان ءۇي ەدى. ءبىر كۇننىڭ ىشىندە بۇلاي بۇزىپ تاستايتىنىن ءبىز قايدان بىلەيىك, دەگەن جانگەلدى ءوزى كومەك سۇراعان قۇزىرلى ورگانداردىڭ ءالى كۇنگە دەيىن ەشبىر شارا قولدانباي, جايباراقات جاتقانىنا كۇيىنەدى.
ءبىز وبلىستىق پوليتسيا دەپارتامەنتىنىڭ ءباسپاسوز حاتشىسى يرينا بەجەنارعا حابارلاسىپ, وقيعانىڭ ءمان-جايىن سۇراپ ەدىك, اراعا ەكى-ءۇش كۇن سالىپ «2020 جىلعى 9 ماۋسىم كۇنى اۋليەكول اۋداندىق پوليتسياسىنىڭ كەزەكشى بولىمىنە جەرگىلىكتى تۇرعىن شاعىم ءتۇسىردى. اتالمىش شاعىم بويىنشا قر قك-ءنىڭ 188-بابى, 1 ءبولىمى بويىنشا قىلمىستىق ءىس قوزعالدى. قازىر كۇدىكتى انىقتالىپ, سوتقا دەيىنگى تەرگەۋ جۇمىستارى ءجۇرىپ جاتىر», دەگەن جاۋاپ الدىق. «جىرتىق ءۇيدىڭ قۇدايى بار» دەگەن وسى.
قوستاناي وبلىسى,
اۋليەكول اۋدانى,
ديەۆ اۋىلى
