قازاقستاندا 200-دەن استام جالعان كاسىپورىندار قىلمىسكەرلەر مەن ناشاقورلاردىڭ اتتارىنا تىركەلىپ كەلگەن ەكەن. ونى رەسپۋبليكا قارجى پوليتسياسى اقپاراتتىق-تالداۋ دەپارتامەنتىنىڭ باسشىسى ولجاس بەكتەنوۆ مالىمدەدى.
قازاقستاندا 200-دەن استام جالعان كاسىپورىندار قىلمىسكەرلەر مەن ناشاقورلاردىڭ اتتارىنا تىركەلىپ كەلگەن ەكەن. ونى رەسپۋبليكا قارجى پوليتسياسى اقپاراتتىق-تالداۋ دەپارتامەنتىنىڭ باسشىسى ولجاس بەكتەنوۆ مالىمدەدى.
«ماترەشكي» قاعيداتىمەن تەرەڭدەتە تەكسەرۋ جۇمىستارى بۇرىن سوتتى بولعان, ناشاقورلىقپەن اينالىسىپ جۇرگەن, ماسكۇنەمدىككە سالىنىپ كەتكەن, ءولۋ حالىندە جاتقان كىسىلەردىڭ اتتارىنا تىركەلگەن 200-دەن استام جالعان كاسىپورىنداردىڭ بار ەكەنىن انىقتاپ بەردى. سونداي-اق, بۇل توپتاردى ۇيىمداستىرىپ, باسقارىپ جۇرگەن ادامدار دا تابىلدى», دەدى ول.
تۇتاستاي العاندا, و.بەكتەنوۆتىڭ ءسوزىنە قاراعاندا, سيتۋاتسيالىق ورتالىق جۇمىسىنىڭ ارقاسىندا جالعان كاسىپكەرلىكپەن اينالىسۋشى قىلمىستىق توپتاردى انىقتاۋ دەڭگەيى ايتارلىقتاي ارتقان.
«ەگەر بۇكىل 2012 جىل بويىنا رەسپۋبليكا بويىنشا جالعان كاسىپكەرلىك دەرەگىمەن 82 قىلمىستىق ءىس قوزعالعان بولسا, بيىلعى جىلدىڭ 9 ايى ىشىندە عانا انىقتالعان مۇنداي قىلمىستار سانى 771-گە جەتتى. بىلايشا ايتقاندا, وتكەن جىلعا قاراعاندا, كورسەتكىش 3 ەسەگە جۋىق كوتەرىلىپ وتىر», دەپ اتاپ ءوتتى دەپارتامەنت جەتەكشىسى.
«بۇدان بولەك, سيتۋاتسيالىق ورتالىقتىڭ بازاسىندا جالعان كاسىپورىنداردىڭ, ولاردىڭ كونتراگەنتتەرى مەن تۇلعالارىنىڭ بازاسى جاسالدى. بۇل سالىقتان زاڭسىز جالتارۋ مەن قارجىنى قولما-قول اقشاعا اينالدىرىپ الۋشىلاردى تەز انىقتاۋعا مۇمكىندىك بەرەدى», دەگەندى قوستى قارجى پوليتسياسىنىڭ وكىلى.
ايتا كەتۋ كەرەك, قارجى پوليتسياسى اگەنتتىگى بۇدان بىرقاتار ۋاقىت بۇرىن سيتۋاتسيالىق جاعداي ورتالىعىنىڭ تۇساۋىن كەسكەن بولاتىن. ول بولۋى ىقتيمال كولەڭكەلى جانە جەمقورلىق سحەمالارىن دەر كەزىندە انىقتاپ وتىرۋعا مۇمكىندىك بەرەتىن اۆتوماتتاندىرىلعان تالدامالى كەشەن بولىپ تابىلادى.
قۇرىش نۇرىمبەت.
