ۇيىمداستىرۋشىلاردىڭ ايتۋىنشا, «سابانتوي» – ءسوزىنىڭ ءتۇپ ماعىناسى تۇركىنىڭ «سابان», ياعني «سوقا» سوزىنە كەلىپ تىرەلەدى. تاريحى تىم تەرەڭدە جاتقان ۇلتتىق مەرەكەنى قازاقشالاساق, سوقا مەرەكەسى بولىپ شىعادى. جەر ەمگەن ەڭبەكشىل جۇرت كوكتەمگى ەگىس ناۋقانىن وسىلاي ويىن-ساۋىققا ۇلاستىرۋدى ءداستۇر ەتكەن. ياعني سابانتويدى تويلاۋدىڭ استارىندا ەگىن بىتىك شىقسىن, جيىن-تەرىم مول بولسىن دەگەن حالىقتىڭ اق تىلەگى مەن ارمان-مۇراتى جاتىر. مەرەكەنىڭ ءتول ەمبلەماسى – قولدان توقىلعان كوگىلدىر اسپان استىنداعى قىزىل ورنەكتى تاتار سۇلگىسى.
– ءبىزدىڭ وڭىردە سابانتوي جىل سايىن كوكتەمگى القاپ جۇمىستارى اياقتالعان سوڭ, ماۋسىم ايىنىڭ ەكىنشى جارتىسىندا تويلانادى. العاشقى جىلدارى تەك تاتار-باشقۇرت ەتومادەني بىرلەستىگىنىڭ وكىلدەرى عانا باس قوساتىن. بىرتە-بىرتە قاناتىن كەڭگە جايعان سابانتوي جالپىحالىقتىق سيپاتقا يە بولىپ, وبلىسىمىزدا تۇرىپ جاتقان سان الۋان ۇلتتىڭ ساعىنا كۇتەتىن دۋماندى مەيرامى بولىپ قالىپتاستى. بۇگىندە سابانتوي ايماقتى مەكەندەگەن ءتۇرلى ۇلت وكىلدەرىن ەڭبەك پەن بىرلىككە, دوستىققا ۇندەيتىن, وسكەلەڭ ۇرپاقتى ۇلان-بايتاق ەلىمىزگە دەگەن سۇيىسپەنشىلىككە تاربيەلەيتىن تاعىلىمدىق ءمانى بار مەرەكەگە اينالدى, – دەيدى «دۋسلىق» تاتار-باشقۇرت ەتنومادەني بىرلەستىگىنىڭ جەتەكشىسى ريناد بەكتەميروۆ.
قوستانايلىقتار ءسان-سالتاناتقا تولى ءداستۇرلى مەيرامنىڭ ناقىشتى كورىنىستەرى مەن «ليايسان» ۆوكالدىق ءانسامبلىنىڭ كونتسەرتىن جەرگىلىكتى تەلەارنالار مەن الەۋمەتتىك جەلىلەر ارقىلى تاماشالادى.
قوستاناي وبلىسى
