قايتا جاڭارتۋ جۇمىستارى 2018 جىلدان بەرى ازيا دامۋ بانكى قاراجاتىنىڭ ەسەبىنەن ىسكە اسىرىلۋدا. «اككورد/اقجول قۇرىلىس» بك جانە «Cengiz Insaat Sanayi ve Ticaret A.S» كومپانيالارى» ەكى جىل ىشىندە 976 ادامدى جۇمىسقا تارتسا, جول-قۇرىلىس تەحنيكاسىنىڭ 575 بىرلىگىن جۇمىلدىردى.
بۇگىنگى تاڭدا جولدىڭ 0-38 شاقىرىمدارى اراسىنداعى ۋچاسكەسىندە 20 شاقىرىمدىق كەدەرگىلىك قورشاۋلاردى ورناتۋدان باسقا جۇمىستاردىڭ بارلىعى ورىندالعان. جوسپار بويىنشا بۇل جۇمىستار 2020 جىلعى 30 ماۋسىمعا قاراي اياقتالادى دەپ كۇتىلۋدە. 35-73 شاقىرىمدار اراسىنداعى جول ۋچاسكەسىنىڭ قۇرىلىس جۇمىستارىنىڭ بارلىعى اياقتالعان.
جول قايتا جاڭارتۋ جۇمىستارىنان وتكەن سوڭ, جولدىڭ 68,6 شاقىرىمى پايدالانۋعا بەرىلەدى. ونىڭ 57,4 شاقىرىمى – ءى تەحنيكالىق ساناتتاعى, 11,2 شاقىرىمى – ءىى تەحنيكالىق ساناتتاعى جولدار بولماق. بۇدان بولەك, مۇندا 2 جول وتپەسى, 25 سۋ وتكىزگىش قۇبىر جانە مال وتپەلەرى ورناتىلعان.
ايتا كەتۋ كەرەك, ماڭعىستاۋ وبلىسىندا جاقسى جانە قاناعاتتاندىرارلىق جاعدايداعى رەسپۋبليكالىق ماڭىزى بار جولداردىڭ ۇلەسى 95,2% قۇرايدى. 2017 جىلى مۇندا بەينەۋدەن اقتاۋ قالاسىنىڭ تەڭىز پورتىنا دەيىنگى ارالىقتا جاتقان «بەينەۋ-اقتاۋ» اۆتوموبيل جولىن قايتا جاڭارتۋعا قاتىستى ءىرى جوبانى جۇزەگە اسىرۋ شارالارى اياقتالعان ەدى. اتالعان جولدىڭ ۇزىندىعى 430 شاقىرىمدى قۇرايدى.
