«قازسۋشار» رمك-نىڭ جارعىلىق كاپيتالىن ۇلعايتۋ ماقساتىندا 2016 جىلدان بەرى ەلىمىزدىڭ 9 وبلىسى (اقتوبە, الماتى, قاراعاندى, قوستاناي, قىزىلوردا, شىعىس قازاقستان, جامبىل, پاۆلودار جانە تۇركىستان وبلىستارى) بويىنشا اپاتتى جاعدايداعى 20 گيدروتەحنيكالىق نىسان قايتا جوندەلۋدە. 2016-2019 جىلدارى ارالىعىندا 11 نىسان پايدالانۋعا بەرىلدى. قالعان 9-ى بيىل ىسكە قوسىلماق (پاۆلودار وبلىسى – 3, شىعىس قازاقستان وبلىسى – 3, الماتى وبلىسى – 1, تۇركىستان وبلىسى – 1 جانە قوستاناي وبلىسى 1 جوبا). سونداي-اق 2021 جىلدىڭ سوڭىنا دەيىن پاۆلودار مەن اقتوبە وبلىستارىندا تۇراقتى جانە ميلەراتيۆتى سۋارۋ جۇيەسى بويىنشا 21 جوبا پايدالانۋعا بەرىلۋ جوسپارلانۋدا.
جۇمىسپەن قامتۋ جول كارتاسى اياسىندا بيۋدجەتتىڭ ەسەبىنەن 16 جوبا جۇزەگە اسپاق. ونىڭ جالپى قۇنى – 32,2 ملرد تەڭگە. بيىل قۇرىلىسى جۇرگىزىلىپ جاتقان 16 نىساننىڭ 11-ءى پايدالانۋعا بەرىلمەك. قالعان 5 جوبا 2021-2022 جىلدارى اياقتالادى.
ەۋروپالىق دامۋ جانە قايتا قۇرۋ بانكىنىڭ زاەمدارى اياسىندا اقتوبە, جامبىل جانە تۇركىستان وبلىستارى بويىنشا 24 كەلىسىمشارت جۇزەگە اسىرىلادى. ولاردىڭ جالپى سوماسى – 59 ملرد تەڭگە.
يسلام دامۋ بانكىنىڭ زاەمدارى نەگىزىندە الماتى جانە تۇركىستان وبلىستارىندا 6 جوبا جۇزەگە اسىرىلادى. ونىڭ جالپى قۇنى – 44 ملرد تەڭگە.
جالپى, قۇرىلىسى جۇرگىزىلىپ جاتقان 24 نىساندا 314 تەحنيكا, 705 جۇمىسشى مەن ينجەنەرلىك-تەحنيكالىق قىزمەتكەر جۇمىلدىرىلعان. ونىڭ 453-ءى – جەرگىلىكتى تۇرعىن.
سۋ شارۋاشىلىعى نىساندارىنداعى قايتا جوندەۋ مەن جاڭارتۋ جۇمىستارى كەلەسىدەي ناتيجە بەرمەك: الماتى, تۇركىستان, اقتوبە, جامبىل جانە پاۆلودار وبلىستارىندا جالپى اۋماعى 155 مىڭ گەكتار, قۇنى 134,8 ملرد تەڭگە بولاتىن جەردەگى سۋلاندىرۋ جۇيەلەرىن قالىپقا كەلتىرەدى. سونداي-اق اپاتتى جاعدايدا تۇرعان 20 سۋ قويماسى مەن گيدروتەحنيكالىق نىساندى قالىپقا كەلتىرەدى. ولار نەگىزىنەن توتەنشە جاعداي ورىن الا قالعان كەزدە قاۋىپتىڭ بەتىن سەيىلتۋگە ارنالعان. سۋ بوگەتتەرى 299 601 ادام تۇراتىن 40 ەلدى مەكەندى قورعاپ, سۋ دەڭگەيىن قاداعالاپ وتىرۋعا مۇمكىندىك بەرەدى. سونداي-اق جيناقتالعان جانە رەتتەلەتىن سۋدىڭ كولەمى ارتادى.
