ەلدەگى ەكونوميكالىق احۋالدى ەسەپكە العان قور باسشىلىعى قاراجاتتىڭ ءبىرىنشى بولىگىن ۇلتتىق قورعا مەرزىمىنەن بۇرىن اۋدارۋدى دۇرىس دەپ شەشتى. قاراجاتتىڭ قالعان بولىگىن «سامۇرىق-قازىنا» 2020 جىلدىڭ سوڭىنا دەيىن باعىتتاۋدى جوسپارلاپ وتىر.
بۇعان دەيىن حابارلانعانداي, 2020 جىلى 3 ماۋسىمدا «سامۇرىق-قازىنا» ۇاق» اق باسقارۋ كەڭەسىنىڭ وتىرىسىندا ۇلتتىق حولدينگتىڭ 2020 جىلدىڭ سوڭىنا دەيىن ۇلتتىق قورعا 100 ميلليارد تەڭگە باعىتتاۋعا دايىندىعى تۋرالى ايتىلدى. كەڭەس توراعاسى – تۇڭعىش پرەزيدەنت نۇرسۇلتان نازارباەۆ بۇل باستامانى قولدايتىنىن جەتكىزدى.
«قور باسشىلىعىنىڭ دەر كەزىندە قابىلداعان شەشىمدەرىن وڭ باعالايمىن جانە قولدايمىن. ولار وزدەرىنىڭ تيىمدىلىگىن كورسەتتى. داعدارىس كەزىندە مەملەكەت ەكونوميكانى قولداۋعا ۇلتتىق قوردان قوماقتى قاراجات ءبولدى. الايدا بۇل جاعدايدا «سامۇرىق-قازىنا», كەرىسىنشە, ۇلتتىق قورعا 100 ميلليارد تەڭگە جىبەرەدى», دەگەن ەلباسى داعدارىس كەزىندەگى مۇنداي قادامنىڭ ماڭىزدىلىعىنا نازار اۋداردى.
ەستەرىڭىزدە بولسا, SPO شەڭبەرىندە «سامۇرىق-قازىنا» «قازاتومونەركاسىپ» كومپانياسى اكتسياسىنىڭ 6,28 پايىزىن ساتىلىمعا شىعارىپ, 206 ملن اقش دوللارى كولەمىندە قاراجات تاپقان بولاتىن. وسىلايشا اتوم كومپانياسىنداعى ءوز ۇلەسىن 75 پايىزعا دەيىن قىسقارتتى.
كومپانيانىڭ ءباسپاسوز قىزمەتى جالپى 460 ملن اقش دوللارىنا ءوتىنىش كەلگەنىن حابارلادى. ينستيتۋتسيونالدىق ينۆەستورلاردان كەلگەن ءوتىنىش جوسپارلانعان مەجەدەن 2,2 ەسە كوپ بولعان. «استانا» حالىقارالىق قارجى ورتالىعىنىڭ بيرجا الاڭىندا 69,7 ملن اقش دوللارىنا ءوتىنىش تۇسكەن. ونداعى قازاقستاندىق ينۆەستورلاردىڭ ۇلەسى – 53,4 پايىز بولسا, قىزىعۋشىلىق تانىتقانداردىڭ 46,6 پايىزى شەتەلدىك ينۆەستورلار.
2008 جىلى قازاقستان رەسپۋبليكاسى پرەزيدەنتىنىڭ جارلىعىمەن قۇرىلعان كوممەرتسيالىق قۇرىلىم مەملەكەتتىڭ ۇلتتىق ءال-اۋقاتىن كوتەرۋ جانە ۇلتتىق ەكونوميكانى جاڭعىرتۋعا قولداۋ كورسەتۋ ماقساتىندا جۇمىس ىستەپ كەلەدى. قور اكتيۆى شامامەن 67 ملرد دوللاردى قۇرايدى. «سامۇرىق-قازىنا» اق كومپانيالار توبىنا مۇناي-گاز جانە كولىك-لوگيستيكا سەكتورلارىنىڭ, حيميا جانە اتوم ونەركاسىپتەرىنىڭ, تاۋ-كەن كەشەندەرىنىڭ, ەنەرگەتيكا, ماشينا قۇراستىرۋ جانە جىلجىمايتىن م ۇلىك سالالارىنىڭ كاسىپورىندارى كىرەدى.
