كەشە پرەزيدەنت جانىنداعى ورتالىق كوممۋنيكاتسيالار قىزمەتى ۇيىمداستىرۋىمەن ءباسپاسوز ءماسليحاتى وتكىزىلدى. ول استاناداعى رەسەي عىلىم جانە مادەني ورتالىعىندا «حاكاسيا جانە التاي جارتاس ونەرى» اتتى كورمەنىڭ اشىلۋىنا ارنالدى.
كەشە پرەزيدەنت جانىنداعى ورتالىق كوممۋنيكاتسيالار قىزمەتى ۇيىمداستىرۋىمەن ءباسپاسوز ءماسليحاتى وتكىزىلدى. ول استاناداعى رەسەي عىلىم جانە مادەني ورتالىعىندا «حاكاسيا جانە التاي جارتاس ونەرى» اتتى كورمەنىڭ اشىلۋىنا ارنالدى.
قازىرگى زامانعى ونەردىڭ «شەجىرە» گالەرەياسى ۇيىمداستىرعان بىرەگەي كورمە رەسەيدىڭ حاكاسيا مەن التاي رەسپۋبليكالارىنان تابىلعان پەتروگليفتەردى تانىستىرۋدى العا ماقسات ەتىپ قويعان. وندا كونە قىتاي ءتاسىلى بويىنشا ەستامپاجدىق ادىسپەن قاعازعا تۇسىرىلگەن 70-تەن استام كوشىرمە كوپشىلىك نازارىنا ۇسىنىلادى.
ءباسپاسوز ءماسليحاتىنا قر ەڭبەك سىڭىرگەن ونەر قايراتكەرى, «شەجىرە» گالەرەياسىنىڭ ديرەكتورى روزا ءجۇسىپوۆا, تاريح عىلىمدارىنىڭ دوكتورى, پروفەسسور, قازاقستانداعى رەسەي ارىپتەستىگى وكىلدىگىنىڭ جەتەكشىسى ۆيكتور شۋليكا, فيزيكا-ماتەماتيكا عىلىمدارىنىڭ دوكتورى, مادەنيەت جانە تاريحتانۋشى سەرگەي نارىلكوۆ, التاي مەملەكەتتىك تەحنيكالىق ۋنيۆەرسيتەتى ساۋلەت ونەرى مەن ديزاين كافەدراسىنىڭ دوتسەنتى, التاي, موڭعوليا مەن قيىر شىعىس پەتروگليفتەرىن زەرتتەۋشى ەلەنا نازارەنكو, جاڭا گەوارحەولوگيا زەرتحاناسىنىڭ عىلىمي قىزمەتكەرى, ءال-فارابي اتىنداعى قازۇۋ تاريح, ارحەولوگيا جانە ەتنوگرافيا فاكۋلتەتىنىڭ قىزمەتكەرى, يتاليانىڭ عالىمى سالا رەناتو, تاريح عىلىمدارىنىڭ دوكتورى, الكەي مارعۇلان اتىنداعى ارحەولوگيا ينستيتۋتىنىڭ پروفەسسورى, «قازاقستان پەتروگليفتەرى» كىتابىنىڭ اۆتورى زەينوللا ساماشەۆ پەن فيلولوگيا عىلىمدارىنىڭ دوكتورى, پروفەسسور, تۇركىتانۋشى, التايتانۋ مەن تۇركىتانۋ عىلىمي-زەرتتەۋ ورتالىعىنىڭ ديرەكتورى قارجاۋباي سارتقوجا ۇلى قاتىسىپ, بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى. ولار ءوز سوزدەرىندە جالپى جارتاس ونەرىنىڭ ءمان-ماعىناسىن, قۇندىلىعىن ايتىپ ءتۇسىندىرىپ, حاكاسيا مەن التاي پەتروگليفتەرىنىڭ مازمۇنى مەن مانىنە كەڭىنەن توقتالىپ ءوتتى.
قازاقستاندا تۇڭعىش رەت وتكىزىلىپ وتىرعان بۇل كورمەنىڭ بىرەگەي توپتاماسىنا كونە جارتاس ونەرىنىڭ اناعۇرلىم الىپ ەسكەرتكىشتەرى – سەدلوۆينا, تەپسەي, سۋحانيحا, وگلاحتى, شالابولين جانە بويار تاۋلارى پەتروگليفتەرى – ۇلكەن جانە كىشى جازبا, وبا تاستارى جانە وكۋن مەن ساق داۋىرلەرى مۇسىندەرىنىڭ ەستامپ كوشىرمەلەرى كىرەدى.
حاكاسيا مەن التاي مۇرالارىنىڭ ءبىرتۇتاس كورىنىسى – كونە كوركەمونەر. بۇل جارتاستاعى سۋرەتتەر ەرەكشە ورىندالۋ ۇلگىسىمەن ءتانتى ەتىپ, بەرىلگەن بەينەلەر جۇمباعىمەن ارباپ, تاڭبالار مەن كومپوزيتسيا بەلگىلەرى, سونداي-اق, تۇركى رۋنا جازبالارى كەز كەلگەن ادامدى تاڭعالدىرارى ءسوزسىز.
«شەجىرە» گالەرەياسىنىڭ ديرەكتورى روزا ءجۇسىپوۆا ءسوزىنىڭ سوڭىندا استانالىقتار مەن قالا قوناقتارىن 30 قازانعا دەيىن جالعاساتىن جارتاسقا جازۋ ونەرىنە نەگىزدەلگەن حاكاسيا مەن التاي پەتروگليفتەرىنە ارنالعان كورمەمەن تانىسۋعا شاقىردى.
ايدار ورىسباەۆ,
«ەگەمەن قازاقستان».
استانا.
