قورعانىس مينيسترلىگى 2016 جىلعا قاراي كەلىسىم-شارت نەگىزىندە ءوزىنىڭ قۇرىلىمىن قالىپتاستىرۋدى كوزدەپ وتىر. بۇل تۋرالى Nur.kz حابارلادى.
كەلەشەكتە قاتارداعى جانە سەرجانتتىق قۇرامداعى اسكەري قىزمەتشىلەردىڭ 65 پايىزى جاڭادان ازىرلەنەتىن كەلىسىم-شارت بويىنشا قىزمەت اتقارادى. بۇل جونىندە قورعانىس ءمينيسترىنىڭ ءبىرىنشى ورىنباسارى, قك باس شتابىنىڭ باستىعى ساكەن جاسۇزاقوۆ بىلايشا تۇسىنىكتەمە بەردى: «قازىر قورعانىس مينيسترلىگى بويىنشا 12 مىڭعا جۋىق مەرزىمدى قىزمەتتىڭ ساربازدارى قالدى. ءبىز وسى كۇزدە 6 مىڭ جاۋىنگەردى زاپاسقا شىعارىپ, 1,5 مىڭ ادامدى اسكەر قاتارىنا شاقىرامىز. 2014 جىلدىڭ كوكتەمىندە تاعى 6 مىڭ جاۋىنگەر زاپاسقا شىعارىلسا, 1,5 مىڭ ادام اسكەر قاتارىنا شاقىرىلاتىن بولادى. ۋاقىت وتە كەلە وسى 1,5 مىڭ شاقىرىلۋشى 500 ادامعا دەيىن قىسقارماق. سوندىقتان 2016 جىلى ارميامىزدى 99 پايىز كاسىبيلەر قۇرايدى دەگەن سەنىمدەمىز».
«قارۋلى كۇشتەر قۇرامىنداعى اسكەري قىزمەتشىلەر لايىقتى ەڭبەكاقى مەن الەۋمەتتىك پاكەتتى يەلەنىپ, تۇتاستاي تۇرعىن ۇيمەن قامتاماسىز ەتىلەدى. 10 جىلدان كەم قىزمەت ەتكەن اسكەري قىزمەتشىلەرگە تۇرعىن ءۇيدى جالعا العانى ءۇشىن اقشالاي وتەماقى تولەنەتىن بولادى. ال الىس گارنيزونداعى اسكەري قىزمەتشىلەر ءۇشىن تۇرعىن ۇيلەر سالىنادى»- دەپ جازىلعان قورعانىس مينيسترلىگى ءباسپاسوز قىزمەتىنىڭ حابارلاماسىندا.
ەسكەرتە كەتەتىن جاعداي, اسكەرگە شاقىرىلۋشىنىڭ جوعارى ءبىلىمى بولسا, وندا ول 6 ايدان سوڭ كەلىسىم-شارت بويىنشا قىزمەت اتقارادى. ال قالعاندارى ءبىر جىلدان سوڭ كەلىسىم-شارت نەگىزىندە اسكەري قىزمەتىن جالعاستىرا الادى ەكەن.
دانيار تۇيمەباي.
