ايماقتار • 23 ماۋسىم، 2020

ماڭعىستاۋ وبلىسىنداعى كەن ورنىندا مۇناي بۇرقاعى اتقىلادى

"قازمۇنايگاز" ۇك اق ماڭعىستاۋ وبلىسىنداعى شىعىس بەكتۇرلى بارلاۋ بلوگىندا گەولوگيالىق بارلاۋ جۇمىستارىن جۇرگىزۋى ناتيجەسىندە مۇناي بۇرقاعى اتقىلادى، - دەپ جازادى Egemen.kz

گۇلايىم ءداۋىتباي

بۇرقاقتى مۇناي 12 مم شتۋتسەردە تاۋلىگىنە 100 م3 دەيىنگى دەبيتپەن اعىنى (مۇنايدىڭ ۇلەس سالماعى – 0،82-0،85 گ/سم3) تاريحي دەرەكتەردى كەشەندى گەولوگيالىقگەوفيزيكالىق زەرتتەۋ، باسسەيندىك ۇلگىلەۋ، جوعارى تەحنولوگيالىق سەيسموبارلاۋ جۇمىستارىنىڭ جانە شىعىس بەكتۇرلى-1 ىزدەستىرۋ-بارلاۋ ۇڭعىماسىنىڭ وڭتايلى ورنالاسۋى ناتيجەسىندە ورتا يۋرا ءداۋىرى قاباتىنان الىندى. بۇدان بولەك مۇناي (ۇلەس سالماعى – 0،82 گ/سم3) الدىڭعى سىناق نىساندارىنان ورتا جانە تومەنگى يۋرا قاباتتارىنىڭ سىنامالارىن ىرىكتەۋ جولىمەن الىنعان بولاتىن، سونداي-اق ترياس شوگىندىلەرىنەن دە كومىرسۋتەكتىڭ بەلگىلەرى انىقتالدى. قازىرگى ۋاقىتتا مۇناي-گاز كوكجيەگىنىڭ ەرەكشەلىكتەرى تۋرالى قوسىمشا اقپارات الۋ ماقساتىندا ۇڭعىمادا كاسىپشىلىك گەوفيزيكالىق جانە گيدروديناميكالىق زەرتتەۋلەر كەشەنى جالعاسىپ جاتىر.

شىعىس بەكتۇرلى ۋچاسكەسى ماڭعىستاۋ وبلىسىنىڭ قاراقيا اۋدانىندا وزەن-قاراماندىباس، جەتىباي، بەكتۇرلى، شىعىس جەتىباي، اقتاس جانە باسقا دا قولدانىستاعى مۇناي-گاز كەن ورىندارىنا جاقىن ماڭدا ورنالاسقان. شىعىس بەكتۇرلى ۋچاسكەسىندە جوبا وپەراتورى - «Becturly Energy Operating» جشس. «قازمۇنايگاز» ۇك اق (50%) جانە «كوكەل مۇناي» جشس (50%) بىرلەسىپ باقىلايتىن ۇيىم. قمگ جاڭا كەن ورىنداردى يگەرۋدە سەرىكتەستەرمەن ءوزارا ىنتىماقتاستىق بارىسىندا كەرري-قارجىلاندىرۋ تالاپتارىن ۇستاناتىنىن اتاپ وتكەن ءجون. ياعني، گەولوگيالىق بارلاۋ جۇمىستارىن جۇرگىزۋ شىعىندارى سەرىكتەس ۇيىمعا جۇكتەلەدى. گەولوگيالىق بارلاۋ جۇمىستارى وڭ ناتيجە بەرگەن جاعدايدا، سەرىكتەس ۇيىم جۇمسالعان شىعىننىڭ ورنىن مۇناي ءوندىرۋ ەسەبىنەن تولتىرادى.

ماڭعىستاۋ وبلىسى