رەسەي ميللياردەرى رومان ابراموۆيچ نيۋ-يوركتەگى ورتالىق ساياباق كورىنىپ تۇراتىن جەردەگى التى قاباتتى كەڭ وسوبنياكتىڭ ۇلكەن بولىگىن ساتىپ الدى. بۇل تۋرالى يتار-تاسس حابارلادى.
جەرگىلىكتى باق-تاردىڭ جازۋلارىنا قاراعاندا, ابراموۆيچ پەن ونىڭ نەكەسىز جۇبايى داريا جۋكوۆا سوڭعى كەزدەرى نيۋ-يوركتەن وزدەرىنە قولايلى تۇرعىنجايدى جاسىرىن ىزدەستىرىپتى. قازىرگى ۋاقىتتا ءابراموۆيچتىڭ ءبولىنىپ ساۋداعا شىعارىلعان بەس پاتەردىڭ ۇشەۋىن 75 ملن. دوللارعا ساتىپ الۋ جونىندەگى كەلىسىمشارتقا قول قويعانى بەلگىلى بولىپ وتىر. بۇدان باسقا, بيزنەسمەن قالعان ەكى پاتەردى دە الۋ جونىندە كەلىسسوز جۇرگىزىپ جاتقان كورىنەدى. ول وسىلايشا بەس پاتەردىڭ باسىن بىرىكتىرمەكشى.
جالپى اۋماعى 900 شارشى مەتردى قۇرايتىن ءۇي ادەتتە امەريكالىق بايلار ءۇي سالىپ الاتىن مانحەتتەننىڭ جوعارعى يست-سايد دەپ اتالاتىن بەدەلدى اۋدانىندا ورنالاسقان. عيماراتتى XIX عاسىردىڭ اياعىندا كومىر ماگناتى ەدۆارد بەرۆيند تۇرعىزىپتى. باستاپقىدا وسوبنياك پاتەرلەرى ءارتۇرلى قوجايىنعا بولىنەتىندەي جەكە-جەكە بولماعان, تۇتاس ءبىر انسامبل رەتىندە بوي كوتەرگەن.
ەگەر ءابراموۆيچتىڭ مۇنداعى ءۇي ساۋداسى وسى ءۇش پاتەرمەن توقتار بولسا, ولاردىڭ پ ۇلى نيۋ-يوركتەگى الدەبىر زاماننان بەرى كووپەراتيۆتى عيماراتتاردى ساتىپ الۋ جونىندەگى باعالاردىڭ ىشىندەگى ەڭ جوعارىسى بولعالى تۇر. مۇنىڭ الدىنداعى رەكوردتى ءدال وسىنداي ورتالىق ساياباق كورىنىپ تۇراتىن اۋدانداعى وسوبنياكتى 54 ملن. دوللارعا ساتىپ العان امەريكالىق بيزنەسمەن دەۆيد گەففەن جاساعان ەكەن.
ساراپتاماشىلاردىڭ باعالاۋلارى بويىنشا, ەگەر ابراموۆيچكە قالعان ەكى پاتەردى دە كەلىسىمى كەلىستىرىلىپ قويىلعان ۇشەۋمەن بىرىكتىرۋدىڭ ورايى كەلىپ جاتسا, رەسەيلىك ميللياردەر نيۋ-يوركتەگى جالپى قۇنى 100 ملن. دوللاردان ايتارلىقتاي اسىپ تۇسەتىن ەڭ قىمبات وسوبنياكتىڭ ەگەسى بولىپ شىعا كەلەدى ەكەن.
2013 جىلدىڭ شىلدەسىندە رومان ابراموۆيچ چۋكوتيا اۆتونوميالىق وكرۋگى دۋماسىنىڭ توراعاسى ورىنتاعىنان كەتىپ, دەپۋتاتتىق مانداتىن تاپسىردى.
تامىز ايىندا ءوزىنىڭ «ۇلتتىق فۋتبول اكادەمياسى» دەپ اتالاتىن قورىنىڭ دا جۇمىس جاساۋىن توقتاتقانىن حابارلادى. بۇل قور رەسەي قۇراماسىنىڭ باس جاتتىقتىرۋشىسى ورىنتاعىندا وتىرعان كەزىندە گۋس حيددينكتىڭ كونتراكتىسىنە (7 ملن. دوللار – يتار-تاسس ەسكەرتپەسى) دەمەۋشىلىك كورسەتۋ ءۇشىن قۇرىلعان بولاتىن. رەسمي ەمەس مالىمەتتەرگە قاراعاندا, ءوزىنىڭ جۇمىس ىستەپ تۇرعان ۋاقىتى ارالىعىندا قور 200 ملن. دوللارعا جۋىق قارجى جۇمساپ ۇلگەرگەن ەكەن.
مۇرات ايتقوجا.
