اقمولا وبلىسى ارشالى اۋداندىق ىشكى ىستەر ءبولىمىنىڭ باستىعى باقتىباي ساحانوۆ باستاعان پوليتسەيلەردىڭ «سپەكتاكلدەرى» ءساتسىز اياقتالىپ, ونىڭ سوڭى مۇنداعى ءبولىمنىڭ جەتى بىردەي وفيتسەرىنىڭ ايىپتىلار ورىندىعىنا وتىرۋىنا اپارىپ سوقتىردى.
اقمولا وبلىسى ارشالى اۋداندىق ىشكى ىستەر ءبولىمىنىڭ باستىعى باقتىباي ساحانوۆ باستاعان پوليتسەيلەردىڭ «سپەكتاكلدەرى» ءساتسىز اياقتالىپ, ونىڭ سوڭى مۇنداعى ءبولىمنىڭ جەتى بىردەي وفيتسەرىنىڭ ايىپتىلار ورىندىعىنا وتىرۋىنا اپارىپ سوقتىردى.
وسىناۋ وسپادارسىز قويىلىمنىڭ وقيعاسى بىلاي باستالادى. وتكەن جىلعى 12 تامىز كۇنى اۋدانداعى قوستومار اۋىلىنىڭ ءبىر تۇرعىنى ورمان شەتىندە جارتىلاي كومىلىپ جاتقان ەر كىسىنىڭ ءمايىتى ۇستىنەن تۇسكەن. سول بويدا ول جازعان جانى قالماي پوليتسياعا حابار بەرەدى. الايدا, اۋدان پوليتسەيلەرىنىڭ باس «رەجيسسەرى» ءارى باستى «اكتەرى» ب.ساحانوۆ كوزگە ۇرىپ تۇرعان بۇل قىلمىستى اشۋعا اسىعا قويمايدى. اسىقپاعانى بىلاي تۇرسىن, ونى ءتىپتى بولماعانداي ەتىپ جاساۋعا بارىن سالادى. ول سالعان جەردەن وسى ويىن جۇزەگە اسىرۋدىڭ باس جوسپارىن جاساۋعا شۇعىل كىرىسىپ كەتەدى. سەبەبى, بۇل قىلمىستى تىركەسە, اۋداندىق ىشكى ىستەر ءبولىمىنىڭ ستاتيستيكاسى ب ۇلىنگەلى تۇر. ويتكەنى, باقتىباي كوكە ونى ءوزى باستاعان پينكەرتونداردىڭ ولسە دە اشا المايتىندارىنا يمانداي سەنەدى. دەمەك, جاقسى كورسەتكىشتى قۇرتىپ الماۋدىڭ جالعىز جولى ولىكتى جويۋ بولماق.
جوسپارىن قاراۋىنداعى جاندايشاپتارىنا مويىنداتىپ العاسىن, باس اتامان سولاردى شۇبىرتىپ ەرتىپ, ءمايىت جاتقان جەرگە جەتتى. سوسىن ونى قاپقا سالىپ الىپ, ورماننىڭ ورتاسىنا اپارىپ, تەپكىلەپ كومىپ تاستادى. قىزعىلىقتى قويىلىمنىڭ قىزىعىنا ءتۇسىپ كەتكەن بۇلار مۇنىمەن دە توقتامادى. دەرەۋ سول ماڭايدا بەيساۋات جۇرگەن ءبىر جىگىتتى ۇستاپ اكەلىپ, ماناعى ءمايىت جاتقان جەرگە الىپ كەلدى. سول جەردە ونى شۇڭقىرعا ءۇستىن توپىراقپەن جارتىلاي جاۋىپ جاتقىزىپ, شىتىرلاتىپ سۋرەتكە ءتۇسىرىپ الدى. مۇنىسى جەتكەن دابىلدا ايتىلعان ادام ەشقانداي دا ولىك ەمەس, ورعا وماقاسا قۇلاعان ماس بىرەۋ ەكەن دەپ كورسەتۋ ءۇشىن كەرەك بولىپتى. وسىمەن سپەكتاكلدىڭ ءبىرىنشى اكتىسى ءبىتتى.
شاماسى, «باس رەجيسسەر» مەن «اكتەرلەر» وزدەرى قويعان بۇل قويىلىم وسى ءبىر اكتىمەن بىتە سالادى دەپ ويلاسا كەرەك, ونىڭ سوڭىن بىردەن تابىستى «پرەمەرانى» جۋ ۇردىسىمەن بانكەتكە اينالدىرىپ جىبەردى. الايدا, كوپ ۇزاماي ونىڭ ەكىنشى اكتىسى اياق استىنان تۋىنداپ كەتتى. بۇعان ءمايىتتىڭ يەلەرى باستاما جاسادى. ولار تاكسيشى بازارباەۆتىڭ ءۇشتى-كۇيلى جوعالىپ كەتكەنىن ايتىپ, قۇقىق قورعاۋ ورگاندارىنىڭ تابالدىرىعىنان شىقپاي قويدى. اقىرى ءىستى استانا قالالىق ىشكى ىستەر دەپارتامەنتى قولعا الدى. جانە جاي الىپ قويا سالعان جوق, ارتىنشا جۇرگىزۋشىنى ولتىرگەن قانىپەزەرلەردى دە تاپتى. بار قۇقاي ولاردىڭ ءوز قۇرباندارىن كومىپ كەتكەن كورىنەن شىقتى. اشىپ قاراسا, شۇڭقىردا ادام تۇگىلى سايتان دا جوق. استانالىقتاردىڭ تۇيىققا تىرەلگەن جەرى وسى بولدى. ال ارىپتەستەرىنىڭ كىسى ءولتىرۋشى قىلمىسكەرلەردى تاپقانىنان حاباردار بولىپ وتىرعان ارشالىداعى ات توبەلىندەي اپەرباقاندار سول بويى شالا ءب ۇلىنىپ سالا بەردى. باقتىباي ءباھادۇر ەندى ماناعى ولىكتىڭ ۇستىنەن شىققان ادام مەن شۇڭقىردا ماسكۇنەم بولىپ «ويناعان» جىگىتتى شۇعىل تاۋىپ اكەلۋگە پارمەن بەردى. ولار اكەلىنگەسىن جاقىن ماڭداعى شارۋا قوجالىعىنىڭ بىرىندەگى باسپاناعا ۋاقىتشا قامالدى. ءسىرا, دابىر باسىلعانشا ەكى بىردەي قىلمىستىڭ – ادام ءولىمى مەن ونى جاسىرۋدىڭ كۋاسى ەسەبىندەگى جىگىتتەردى جاسىرىپ قويعىلارى كەلگەن سياقتى. بىراق ارادا بىرەر كۇن وتكەسىن, ولاردىڭ ءبىرى قاپاستان قاشىپ شىعىپ, استانا پوليتسياسىنا كەلەدى...
بۇدان ارعىسى بەلگىلى. سول بويدا ارشالى اۋداندىق ىشكى ىستەر ءبولىمىنىڭ لاۋازىمدىق قۇرامى تۇگەل تۇتقىندالدى. «اتالمىش ءىس بويىنشا تەرگەۋدى اۋدان پروكۋرورى باۋىرجان قۇسايىنوۆتىڭ ءوزى جۇرگىزدى. قازىرگى تاڭدا تەرگەۋ اياقتالىپ, ءىس سوتقا وتكىزىلدى. ول بويىنشا اۋداندىق ىشكى ىستەر ءبولىمىنىڭ باستىعى, ونىڭ ەكى ورىنباسارى جانە تاعى ءتورت قىزمەتكەر كۇدىكتى رەتىندە اتالۋدا», – دەدى اقمولا وبلىسى پروكۋرورىنىڭ ءباسپاسوز حاتشىسى اققۋ ءمۇرسالىموۆا وسىعان وراي.
سونىمەن, ەۋروپانىڭ ورتا عاسىرلارداعى ساراي ماڭى جۇرتى اراسىندا عانا كەزدەسەتىن شىم-شىتىرىق شىرعالاڭدارعا ۇقساس اقمولالىق وقيعاعا وراي قوزعالعان سوت پروتسەسى باستالىپ جاتىر.
قۇرىش نۇرىمبەت.
