ايماقتار • 19 ماۋسىم، 2020

شالقارعا تۇسۋگە شەكتەۋ قويىلدى

107 رەت كورسەتىلدى

تەرەكتى اۋدانىنداعى ەپيدەميالىق احۋالعا بايلانىستى باتىس قازاقستان وبلىسىنداعى جازعى دەمالىس ورىندارىنىڭ ىشىندەگى ەڭ بەلگىلىسى – شالقار كولىنە تۇسۋگە تىيىم سالىندى، دەپ جازادى Egemen.kz

تەرەكتى اۋدانى تۇرعىندارى اراسىندا كوروناۆيرۋس جۇقپاسىنىڭ تارالۋىنا جول بەرمەۋ جانە ادامداردىڭ ءومىرى مەن دەنساۋلىعىن قورعاۋ ماقساتىندا بۇگىن شەكتەۋ شارالارى ەنگىزىلدى. اۋدان اۋماعىندا قالىپتاسقان ەپيدەميالىق جاعدايدى ەسكەرە وتىرىپ، تەرەكتى اۋدانى باس مەملەكەتتىك سانيتارلىق دارىگەرى پودستەپنوە اۋىلىندا ورنالاسقان بارلىق مەكتەپكە دەيىنگى بالالار ۇيىمدارىنىڭ قىزمەتى توقتاتتى. جانە ءسارىومىر اۋىلى جانىندا ورنالاسقان شالقار كولىنە دەمالۋشىلاردىڭ كەلۋىنە 30 ماۋسىمعا دەيىن شەكتەۋ قويىلدى.

باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز قىزمەتى تاراتقان مالىمەتكە قاراعاندا تەرەكتى اۋدانىندا كۇنى بۇگىن 25 تۇرعىن COVID-19 دياگنوزىمەن تىركەلگەن.

"قازىر ءسارىومىر اۋىلدىق وكرۋگى اۋماعىندا ءموبيلدى بلوكبەكەتتەر ورنالاستىرىلعان. ارنايى ماماندار توبى كول جاعاسىنداعى دەمالۋشىلارعا ۇسىنىلاتىن كيىز ۇيلەر مەن شاتىرلاردى تەكسەرىپ، ولاردىڭ سانيتارلىق-ەپيدەميالىق تالاپتارعا سايكەستىگىن باقىلايتىن بولادى. ماۋسىمنىڭ 30-نا دەيىن وڭىردەگى ەپيدەميالىق احۋال قالىپقا كەلسە، ءارى قاراي دەمالۋشىلار ءۇشىن كول جاعاسى اشىلادى. ول جونىندە قوسىمشا حابارلانادى"، دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز قىزمەتىنىڭ جەتەكشىسى ادەمى عيبراتقىزى.  

 

 

باتىس قازاقستان وبلىسى

سوڭعى جاڭالىقتار

ۇقساس جاڭالىقتار