بيورن دەلي 1967 جىلدىڭ 19 ماۋسىمىندا نورۆەگيانىڭ حەدمارك وڭىرىندە دۇنيەگە كەلدى. بوزبالا شاعىنان شاڭعى سپورتىن سەرىك ەتكەن ول ۋاقىت وزا ءوز ءداۋىرىنىڭ تەڭدەسسىز تۇلعالارىنىڭ بىرىنە اينالدى. سكانديناۆيالىق ساڭلاق ءوزىنىڭ سپورتتىق كارەراسىندا وليمپيادانىڭ 8 التىنى مەن 4 كۇمىسىنە يەلەندى. الەم چەمپيوناتىندا 9 التىن, 5 كۇمىس جانە 3 قولا مەدالدى ولجالادى. ودان بولەك, كوپتەگەن اسا ءىرى حالىقارالىق جارىستاردىڭ جەڭىمپازى اتانىپ, سان مارتە رەكوردتىق كورسەتكىشتەردى جاڭارتتى. قىسقى سپورت تۇرلەرى تاريحىندا جەڭىپ العان اتاق-داڭقى جاعىنان دەليمەن تەڭەسە الاتىن ساڭلاقتار كەمدە-كەم.
2001 جىلى سپورتتىق مانسابىن اياقتاعاننان كەيىن بيورن كاسىپكەرلىكپەن اينالىستى. قۇرىلىس پەن تۇرعىن ءۇي جانە ءسان بيزنەسىن دوڭگەلەتىپ اكەتتى. سونىمەن قاتار, شاڭعى سپورتىنا ارنالعان برەندتىك كيمىدەر شىعارىپ, نورۆەگيالىق تەلەارنالاردا شوۋ-باعدارلامالار ۇيىمداستىردى.
قازاقستاندىق جانكۇيەرلەرگە دە بيورن دەليدىڭ ەسىمى ەتەنە تانىس. سەبەبى ول ۇزاق جىلدار بويى وليمپيا ويىندارى مەن الەم چەمپيوناتتارىندا سان مارتە اتوي سالعان ءبىزدىڭ ايگىلى شاڭعىشىمىز ۆلاديمير سميرنوۆتىڭ ءدۇبىرلى دودالارداعى باستى قارسىلاستارىنىڭ ءبىرى بولدى.
