ايماقتار • 17 ماۋسىم، 2020

باتىس قازاقستان دارىگەرسىز قالۋى مۇمكىن

1231 رەت كورسەتىلدى

باتىس قازاقستان وبلىسى كوروناۆيرۋسپەن كۇرەسەتىن دارىگەرسىز قالۋى مۇمكىن. بۇل جونىندە ءوڭىر باسشىسى عالي ەسقاليەۆ مالىمدەدى، - دەپ جازادى Egemen.kz

"بۇگىندە وبلىستا كوروناۆيرۋس ينفەكتسياسىن جۇقتىرعاندار سانى كوبەيىپ كەلەدى. تۇگەل وتباسى، ۇجىم بولىپ اۋرۋ جۇقتىرعاندار تىركەلۋدە. اۋرۋحانالاردا قازىردىڭ وزىندە 200-گە جۋىق ادام ەم الىپ جاتىر. ۆيرۋستىڭ قاۋىپتىلىگى سونشالىق، اۋرۋ جۇقتىرعاندار اراسىندا پنەۆمونياعا شالدىققاندار سانى وسۋدە. اۋرۋحانالاردا ورىن تاپشىلىعى بولعاندىقتان ءبىز باسقا اۋرۋحانالاردى بوساتۋعا ءماجبۇرمىز. سونىمەن قاتار، ءبىزدىڭ دارىگەرلەر مەن ولاردىڭ كومەكشىلەرىنە، جۇرگىزۋشىلەر مەن سانيتارلارعا ۇلكەن كۇش ءتۇسىپ وتىر. ولاردىڭ باسىم كوپشىلىگى بىرنەشە اي بويى بالالارىن قۇشاعىنا الىپ، وتباسىلارىمەن جۇزدەسپەگەن. مىناداي قارقىنمەن ءبىز دارىگەرسىز قالۋىمىز مۇمكىن. ەگەر تۇرعىندار ساقتىق شارالارىن ساقتاماي، ودان ءارى تويلار، ۇجىمدىق كەزدەسۋلەر وتكىزە بەرسە، قاتاڭ شەكتەۋ شارالارىن قايتادان ەنگىزۋگە ءماجبۇر بولامىز" دەپ جازدى باتىس قازاقستان وبلىسىنىڭ اكىمى الەۋمەتتىك جەلىدەگى ءوز پاراقشاسىنا.

ءبىز وڭىردەگى ەپيدەميولوگيالىق احۋال تۋرالى باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆتىڭ وزىنەن بىلدىك.

بولاتبەك امانگەلدى ۇلى الدىمەن وبلىستا كەشە كوروناۆيرۋستان قايتىس بولعان ەكى ادام تۋرالى ايتتى. ولار – 1932 جىلى دۇنيەگە كەلگەن ايەل جانە 1941 جىلى تۋعان ەر ادام. ەكەۋى دە دارىگەرگە دەر كەزىندە قارالماي، اۋرۋىن اسقىندىرىپ العان.

ء"دال قازىر باتىس قازاقستان وبلىستىق جۇقپالى اۋرۋلار اۋرۋحاناسىندا 151 ناۋقاس جاتىر. ولاردىڭ سانى ءسات سايىن وزگەرۋدە، ءبىز جازىلعان ادامداردى ۇيىنە شىعارامىز، جاڭا ناۋقاستار دا ءۇستى-ۇستىنە ءتۇسىپ جاتىر. ەڭ قيىنى، جاڭادان تۇسكەندەردىڭ ىشىندە اۋرۋدىڭ جەڭىل تۇرىنە شالدىققاندار جوق. ياعني، اۋرۋحاناداعى ناۋقاستاردىڭ 130-دان استامى – ورتا دارەجەلى. 18 ادامنىڭ سىرقاتى اۋىر دەپ باعالانعان. ءبىر ادام وكپەنى جاساندى جەلدەتۋ اپپاراتىنا قوسىلدى. وتتەگىگە تاۋەلدى 20 شاقتى ادام بار. سوڭعى كەزدە اۋرۋدىڭ اۋىر ءتۇرى كوبەيدى، ناۋقاستاردىڭ كوبى تىنىس الا المايدى، قوس وكپەسى قابىنعان"، دەيدى بولاتبەك قايۋپوۆ.

16 ماۋسىم كۇنى عانا باتىس قازاقستان وبلىسىندا 57 كوروناۆيرۋستىڭ سيمپتومسىز ءتۇرىن، ال 21 ادام سيمپتومدى ءتۇرىن جۇققتىرعانى انىقتالعان. باسقارما باسشىسىىنڭ ايتۋىنشا، اۋدانداردان كۇن سايىن، ساعات سايىن جاڭا ناۋقاستار تىركەلىپ جاتىر. ونىڭ سەبەبى - تۇرعىندار كارانتيندىك ساقتىق شارالارىن ساقتاۋدى ۇمىتقان. تۋعان كۇن، توي، ساداقا، قۇدالىق سەكىلدى كوپشىلىك شارالارىنان ۆيرۋس جۇقتىرعان ناۋقاستار وتە كوپ. كەيبىرى اۋرۋحاناعا وتباسىمەن تۇگەل تۇسكەن. ۆيرۋس ءتىپتى مەملەكەتتىك مەكەمەلەرگە تاراپ، ءىرى ۇجىمداردا دا پايدا بولعان.

ء"بىز ۇنەمى كارانتين جاعدايىن ساقتاپ وتىرا اللمايمىز. تۇرعىنداردىڭ سانالىلىق دەڭگەيى ءوسۋى كەرەك. ءار ادام ساقتانۋى كەرەك. بەتپەردە تاعىپ ءجۇرۋ، ارا قاشىقتىقتى ساقتاۋ وتە ماڭىزدى. «ەگەر ءبىز بۇل تالاپتاردى ساقتاماساق، بۇل ۆيرۋس ارقايسىمىزعا، ءار وتباسىعا كەلەدى»، دەدى بولاتبەك امانگەلدى ۇلى.

وڭىردە اۋرۋ سانى كۇرت كوبەيىپ كەتكەندىكتەن جەرگىلىكتى بيلىك قوسىمشا ورىن اشۋعا ءماجبۇر بولعان.

"قازىر وبلىستىق جۇقپالى اۋرۋلار اۋرۋحاناسى تولدى. كەشەدەن باستاپ ورال قالالىق كوپبەيىندى اۋرۋحانا جانىنان 220 ورىندىق جاڭا ءبولىم اشۋعا ءماجبۇر بولىپ جاتىرمىز. سونىمەن بىرگە ناۋقاستاردىڭ ءبىر بولىگىن پەريناتالدى ورتالىق پەن ونكولوگيالىق ديسپانسەرگە دە ورنالاستىراتىن بولامىز. سونىمەن بىرگە الدىن الا جوسپارلانعان بارلىق وتانى ۋاقىتشا توقتاتامىز، بارلىق كۇشتى كوروناۆيرۋسپەن كۇرەسكە سالامىز. بىراق ءبىزدىڭ كۇشىمىز شەكتەۋلى. باتىس قازاقستان وبلىسىندا مەديتسينالىق ماماندار كوپ ەمەس، ولاردى دايىندايتىن جوعارى وقۋ ورنىمىز جوق. بىزدە ناقتى سانى بەلگىلى تۇراقتى ۇجىم عانا بار. بۇل دارىگەرلەردىڭ ەرلىگىن سوزبەن جەتكىزۋ قيىن. ەشكىم بايقامايتىن ءۇنسىز ەرلىكتىڭ يەسى – سولار"، دەدى باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى.

سوڭعى كۇندەرى باتىس قازاقستان وبلىستىق جۇقپالى اۋرۋلار اۋرۋحاناسىنىڭ باس دارىگەرى ءناديا احمەتوۆانىڭ ءوز ەركىمەن قىزمەتىنەن كەتۋى دە حالىق اراسىندا ءتۇرلى اڭگىمە تۋعىزعان بولاتىن. باس دارىگەر مەن باسقارما باسشىلىعى اراسىندا كەلىسپەۋشىلىك بولعان دەگەن قاۋەسەت تە تاراعان. بولاتبەك قايۋپوۆ مۇنى جوققا شىعاردى.

"ول ارىپتەسىمدى تۇسىنەمىن. وسى ىندەت باستالعالى ەڭ قيىن قىزمەتتە، مايداننىڭ ناعىز قايناعان وشاعىندا قىزمەت ەتتى. ول مامان رەتىندە دە، ادام رەتىندە دە قاتتى شارشاعان بولۋى كەرەك. وسىدان ءبىر اي بۇرىن قىزمەتتەن بوساتۋ جونىندە ارىز جازعان بولاتىن، بىراق مۇنداي قيىن ساتتە جۇمىسىن قالدىرىپ كەتۋگە بولمايتىنىن ايتىپ كوندىرگەن ەدىم. بىراق سوڭعى كۇندەرى ول تاعى ءوتىنىش جازدى، وعان قول قويماسقا بولمادى. ايتپەسە، ءبىزدىڭ ارامىزدا ەشقانداي كيكىلجىڭ بولعان جوق. باسشىلىق تاراپىنان اۋرۋحانانىڭ بارلىق كەرەك-جاراعى، ءدارى-دارمەگى مەن ماماندارى تولىق قامتاماسىز ەتىلىپ تۇردى"، دەدى باسقارما باسشىسى.

بولاتبەك امانگەلدى ۇلىنىڭ ايتۋىنشا، قازىر كوروناۆيرۋسپەن اۋىرعان ادامداردى ەمدەۋ ءۇشىن جەكە سەكتوردا جۇمىس جاسايتىن مەدبيكەلەر، سانيتارلار، رەنتگەنولوگتار، انەستەزيولوگتار جانە ت.ب. ماماندار شاقىرىلىپ جاتىر. ويتكەنى اۋرۋدىڭ تارالۋى تومەندەمەسە، دارىگەر تاپشىلىعى تۋى مۇمكىن. بىراق وڭىردەگى دارىگەرلەردىڭ كوبى مۇنداي جۇمىستان باس تارتقانىن ايتقان باسقارما باسشىسى «بۇل ارىپتەستەرىمدى دە كىنالاي المايمىن» دەدى.

 

باتىس قازاقستان

سوڭعى جاڭالىقتار

اتىراۋ وبلىسىندا بالىق قىرىلدى

ەكولوگيا • بۇگىن، 16:11

بازالىق مولشەرلەمە كوتەرىلە مە؟

ەكونوميكا • بۇگىن، 13:43

2757 ادام كوروناۆيرۋستان جازىلدى

كوروناۆيرۋس • بۇگىن، 09:51

الماتى وبلىسى «سارى» ايماققا ءوتتى

كوروناۆيرۋس • بۇگىن، 09:17

ۇقساس جاڭالىقتار