قالالىق مەملەكەتتىك ءارحيۆتىڭ ديرەكتورى مەيرام بەكتەمباەۆتىڭ ايتۋىنشا, بۇگىنگى تاڭدا قۇندى تاريحي قۇجاتتاردى تسيفرلى فورماتقا كوشىرۋ ءىسى قارقىندى ءجۇرىپ جاتىر.
– ەلوردانىڭ ارحيۆىندە وسىعان دەيىن 3 ملن-نان استام قۇجات تسيفرلاندى, باعالى تاريحي دەرەككوزدەردىڭ بارلىعىن مەكەمەنىڭ سايتىنان كورۋگە بولادى. پاندەميا كەزىندە ارحيۆ دەرەكتەرىنە قىزىعۋشىلار ءۇشىن دەرەكتەرمەن ەش اقىسىز ونلاين تانىسۋعا مۇمكىندىك جاسادىق, – دەيدى مەيرام بەكتەمباەۆ.
قالالىق ارحيۆ بۇگىنگى تاڭدا ءوز قىزمەتكەرلەرىنىڭ ساناتىن كوتەرىپ, بىلىكتىلىگىن ارتتىرۋعا, الەۋمەتتىك جاعدايىن دا جاقسارتۋعا بارىنشا كوڭىل بولۋدە. جوعارى بىلىكتى ارحيۆ ماماندارى سول ارقىلى مۇراعات قورىنداعى قۇندى دەرەكتەردى زەرتتەۋ ىسىندە جەتىستىكتەرگە جەتە الادى. قوردا ءالى دە جەتكىلىكتى دارەجەدە زەرتتەلمەگەن دۇنيەلەر از ەمەس. قۇجاتتاردىڭ كوپشىلىگى لاتىن گرافيكاسىمەن, ارابتىڭ ورمە جازۋىمەن ورنەكتەلگەن, ولاردىڭ تۇپكى ماعىناسى ءالى دە بولسا اشىلعان جوق. سول سەبەپتى قالالىق ارحيۆ باسشىسى عالىمداردى ىزدەنىس بارىسىندا ارحيۆ دەرەكتەرىن بارىنشا كەڭىرەك پايدالانۋعا شاقىردى. ونىڭ ۇستىنە, قۇجاتتاردىڭ ءبارىن قازىر مۇراعاتتا شاڭ جۇتپاي-اق, ونلاين فورماتتا الۋعا بولادى.
بيىل ءىى دۇنيەجۇزىلىك سوعىستىڭ اياقتالعانىنا 75 جىل تولعانى حالىقارالىق اۋقىمدا اتالىپ وتكەنى بەلگىلى. قازاقستاندىقتاردىڭ ۇلى جەڭىسكە قوسقان ۇلەسى, مايداننىڭ الدىڭعى شەبىنە شاقىرتىلعاندار تۋرالى, تىلداعى ءىرى ونەركاسىپ ورىندارىنا شاقىرتىلعاندار تۋرالى كسرو قورعانىس مينيسترلىگىنىڭ دەرەكتەرى قالالىق ءارحيۆتىڭ سايتىندا جاريالاندى. مايدانداعى ەرلىگى ءۇشىن جانە تىلداعى ەرەن ەڭبەگى ءۇشىن ءتۇرلى دارەجەدەگى ماراپاتتارعا يە بولعاندارعا قاتىستى بارلىق دەرەكپەن دە وسى سايت ارقىلى تانىسۋعا بولادى.
جالپى, قالالىق ارحيۆ قورىندا 1915 جىلدان باستاپ كۇنى بۇگىنگە دەيىنگى ارالىقتى قامتيتىن 350 مىڭنان استام قۇندى قۇجات بار ەكەن. قوردى بايىتا ءتۇسۋ ءۇشىن ءار سالاعا قاتىستى 332 دەرەككوز جاسالعان, دەرەكتەردى جيناۋ ىسىنە مادەنيەت پەن ونەر سالاسىنداعى, جۋرناليستيكاداعى بەلدى ماماندار, قالامگەرلەر, عىلىم قايراتكەرلەرى, ەلوردانىڭ دامۋىنا سۇبەلى ۇلەس قوسقان تانىمال تۇلعالار, ارداگەرلەر تارتىلعانىن ايتا كەتۋ كەرەك.
ماكسيم گوركي: «وتكەندى بىلمەيىنشە, بۇگىنىڭ مەن ەرتەڭىڭنىڭ ءمان-ماعىناسىن ءتۇسىنۋ مۇمكىن ەمەس» دەگەن ەكەن. باس قالانىڭ بۇگىنىن سارالاپ, ەرتەڭىن ايقىنىراق باعامداۋدا قالالىق ارحيۆتەگى قۇندى قۇجاتتاردىڭ ءرولى زور ەكەنى انىق.
