يندۋستريالىق باعدارلاما بويىنشا جۇزەگە اسىرىلعان يننوۆاتسيالىق جوبانىڭ تۇپكى ماقساتى – «سسكوب» اق-تىڭ تەمىر شيكىزاتى نارىعىنداعى باسەكەگە قابىلەتىن ارتتىرۋ. بۇگىندە كەنىشتەگى جاعدايدىڭ جەدەل مونيتورينگى مەن ءوندىرىس بارىسىنا قاجەت تۇزەتۋلەر ەنگىزۋدى جانە جابدىقتى ءتيىمدى ۇلەستىرۋ جۇمىسىن كومپيۋتەر اتقارادى. ال وندىرىستىك پروتسەستىڭ تولىق اۆتوماتتاندىرىلۋى ءونىمنىڭ ەداۋىر ۇلعايۋىنا مۇمكىندىك بەرگەن. ەۋرازيالىق توپ الداعى ۋاقىتتا بۇل يننوۆاتسيالىق جوبانى بارلىق كاسىپورىندارىنا ەنگىزۋدى جوسپارلاپ وتىر. ويتكەنى ەڭ وزىق, زاماناۋي تەحنولوگيالارعا يەك ارتۋ ەكونوميكالىق ءتيىمدى جوبالاردى دامىتۋعا مۇمكىندىك بەرەدى.
«قاشار» الاڭى اۆتوماتتاندىرۋ جۇيەسىن ەنگىزۋ ءۇشىن ادەيى تاڭدالىپ الىنىپ وتىر. بىرلەستىك شىعاراتىن بارلىق كەننىڭ جارتىسىنان استامى وسىندا وندىرىلەدى. سوندىقتان تاۋ-كەن بايىتۋ وندىرىستىك بىرلەستىگى كاسىپورىندارىن تەحنولوگيالىق جاڭعىرتۋدىڭ جول كارتاسىنا ەنگىزىلگەن جوبالاردىڭ دەنى وسى كەنىشتە جۇزەگە اسىرىلىپ جاتىر.
«قاشارداعى» «اقىلدى كەنىش» جوباسى بىردەن جۇزەگە اسىرىلا قويعان جوق. ول ءۇشىن بىرنەشە كەزەڭدەردەن وتۋگە تۋرا كەلگەن. ەڭ اۋەلى وندىرىسكە گەولوگيالىق جانە ماركشەيدەرلىك تاۋ-كەن جوبالاۋ ءمودۋلى ەنگىزىلدى. بۇل باعدارلامالار جيىنتىعى جالپى وندىرىستىك جوسپاردان باستاپ, كەنىشتەگى كۇندىك جۇمىس جوسپارىنا دەيىن ءتۇزىپ وتىرادى.
ودان كەيىن «Modular» دەپ اتالاتىن ديسپەتچەرلىك جۇيەنى ەنگىزۋ ارقىلى كەنىشتەگى بۇكىل كولىك كۇشىن باسقارۋ اۆتوماتتاندىرىلدى. وسىنىڭ ارقاسىندا كەنىشتە قول كۇشى مەن ادامسىز اتقارىلعان جۇمىستىڭ كولەمى تۋرالى جەدەل اقپارات الۋعا, سونداي-اق قول جەتكەن ناقتى كورسەتكىشتەرگە تالداۋ جۇرگىزۋ ءۇشىن كەرەكتى مالىمەتتەردى جيناۋعا مۇمكىندىك تۋدى.
ەكىنشى كەزەڭدە «اقىلدى كەنىش» جوباسىنىڭ گەومەحانيكا مەن گيدروگەولوگياعا قاتىستى بولىگى ىسكە اسىرىلدى. سونداي-اق زاماناۋي كونۆەيەر مەن كەن بايىتاتىن ارنايى كەشەن قۇرىلىسى قولعا الىندى.
كومپانيا تمد جانە باتىس ەلدەرىندەگى ون شاقتى مامانداندىرىلعان ينستيتۋتتارمەن ارىپتەستىك ورناتقان. «قاشار» كەنىشىنىڭ ماماندارى وسى ينستيتۋتتاردا ۇيىمداستىرىلعان كۋرستاردا ءبىلىم جەتىلدىرىپ, جاڭا جۇيە بويىنشا جۇمىس ىستەۋدى مەڭگەردى.
«اقىلدى كەنىش» جوباسىنىڭ ءۇشىنشى كەزەڭىندە كەن ورنى زاماناۋي تەحنولوگيا كۇشىمەن تەمىر جەنتەكتەرىن وندىرە باستادى. جوبانى جۇزەگە اسىرۋ بارىسىندا ءبىز ەڭ باستى دەگەن وندىرىستىك مىندەتتەردىڭ شەشىم تابۋىنا قول جەتكىزىپ وتىرمىز. قازىر كەنىش جۇمىسىنىڭ بارلىق پارامەترلەرى كوز الدىمىزدا. سونداي-اق جۇمىس كورسەتكىشتەرىنىڭ قانشالىقتى ءتيىمدى ەكەنىن سول ساتتە-اق كورىپ, باقىلاپ وتىرامىز. وسىنىڭ ارقاسىندا كاسىپورىن جۇمىسىنىڭ ەكونوميكالىق تيىمدىلىگى ارتتى. وتكەن عاسىردىڭ ورتاسىندا ىرگەسى قالانىپ, تەمىر كەنىنىڭ العاشقى تونناسىن بەرگەن الىپ كەنىشتىڭ ءححى عاسىردا ماقسات-مۇددەسى جاڭا سيپاتقا يە بولىپ وتىر. ماقسات بۇرىنعىداي كورسەتكىش قۋ ەمەس, اڭگىمە ساپاعا كەلىپ تىرەلەدى. مىسالى, بىلتىر «قاشار» كەن باسقارماسىندا امەريكالىق «مودۋلار ماينينگ سيستەمس» كومپانياسىنىڭ DISPATCH جۇيەسىن ەنگىزدىك. ماسەلەن, اۋىسىم سايىن «قاشاردان» كەن ارتۋ ءۇشىن 14 ەكسكاۆاتور, 30 تەحنولوگيالىق اۆتوموبيل جۇمىس ىستەيدى. وسى تەحنيكالاردى دۇرىس پايدالانۋ, ولاردى ورنالاستىرۋ, تاسىلاتىن كەننىڭ كولەمى, ساپاسى تۋرالى اقپارات الۋ ءۇشىن قانشاما ۋاقىت كەتەتىن ەدى. ال كەز كەلگەن بيزنەستە, كەز كەلگەن سالادا ۋاقىت رەسۋرس, قارجى, تابىس بولىپ سانالادى. قازىر وسى جۇمىستارعا قاتىستى تولىپ جاتقان اقپاراتتىڭ بارلىعى ديسپەتچەردىڭ باسىندا ەمەس, اسا دالدىكپەن جۇيەدە تۇرادى, ماماندار ونى كومپيۋتەردەن باقىلاپ, كورىپ وتىرادى. ءبىز وسى باعىتتا دامي بەرەتىن بولامىز. ەلباسى «تابيعي رەسۋرستاردى باسقارۋعا قاتىستى ۇستانىمداردى سىني تۇرعىدان قايتا پىسىقتاۋدى» تاپسىردى. وتە دۇرىس. جەرىمىز تابيعي رەسۋرستارعا باي, بىراق كەلەر ۇرپاقتىڭ قامىن ويلاساق, بارلىق شيكىزات ءتۇرىن ماقساتسىز وڭدى-سولدى ءوندىرۋدى, شاشۋدى ۋاقىت كوتەرمەيدى, وعان ۇنەمشىلدىكپەن قاراۋعا ءتيىسپىز. سول ءۇشىن ءوندىرۋدىڭ وزىق تەحنولوگيالارىن, كەشەندى اقپاراتتىق-تەحنولوگيالىق پلاتفورمالارىن بارىنشا بەلسەندى ەنگىزۋىمىز كەرەك, دەدى «سسكوب» پرەزيدەنتى بەرەكە مۇحامەتقاليەۆ.
بۇگىندە «قاشار» كەنىشىندەگى وندىرىستىك ۇدەرىس تولىقتاي Modular, گەواقپارات جۇيەسى جانە ERP دەپ اتالاتىن «اقىلدى» قۇرىلعىلار ارقىلى باسقارىلادى. ياعني ءوندىرىس بارىسى تولىقتاي كومپيۋتەردىڭ باقىلاۋىنا الىنعان. «اقىلدى» ۇشتىك كەنىشتىڭ بۇكىل تىنىس-تىرشىلىگىن جاي باقىلاپ قانا وتىرمايدى, قاجەت كەزىندە تۇزەتۋ ەنگىزىپ, كەنىشتەگى تەحنيكا قۇرالدارىنىڭ قاي جەردە, قانداي جۇمىس اتقاراتىنىنا دەيىن انىقتاپ بەرەدى.
كەن تاسىمالدايتىن كولىكتىڭ قايدا تۇرعانى نەمەسە قاي باعىتتا قوزعالىپ بارا جاتقانى تۇگەلدەي مونيتور بەتىندە كورىنىپ تۇرادى. جالپى, جۇمىس بارىسى, تەحنيكانىڭ جاعدايى, قازىلعان كەننىڭ ساپاسى تۋرالى مالىمەتتەر كەنىش ىشىندەگى ءوندىرىس الاڭدارىنا قويىلعان سىمسىز جەلىلەر ارقىلى كەلەدى. كەن تاسىمالدايتىن كولىكتەر مەن ەكسكاۆاتورلاردىڭ جانە تاعى باسقا دا قوزعالمالى نىسانداردىڭ جۇمىس قابىلەتى قاشىقتان تەكسەرىلەدى. سونداي-اق تەحنيكانىڭ قوزعالىس باعىتى مەن جۇمىس ۋاقىتىن ارنايى باعدارلاما ەسەپتەپ شىعارادى.
ىشكى لوگيستيكا مەن كەنىشتىڭ بۇكىل تەحنيكاسىن اۆتوماتتى باسقارۋ جۇيەسى كاسىپورىن رەسۋرستارىنىڭ ءتيىمدى پايدالانىلۋىن جاقسارتىپ وتىر. جۇيەلەردىڭ جاي-كۇيىنە الدىن الا تەحنيكالىق قىزمەت كورسەتىپ, وعان مونيتورينگ جۇرگىزۋ تەحنيكا كۇشىنىڭ بەلگىلى ءبىر ۋاقىت ىشىندەگى جۇمىس كورسەتكىشتەرى تۋرالى مالىمەتتەردىڭ دەر كەزىندە جينالۋىن قامتاماسىز ەتەدى. بۇل زاماناۋي تالداۋ قۇرىلعىلارى «قاشار» كەن ورنىنداعى وندىرىستىك ۇدەرىستەردى دە ونلاين-وڭتايلاندىرۋعا پايدالانىلادى. مۇنداعى ديسپەتچەردىڭ اتقاراتىن مىندەتى – «اقىلدى كەنىشتىڭ» ۇزدىكسىز جۇمىسىن باقىلاپ, جۇيەنىڭ توقتاپ قالماۋىن قاداعالاۋ عانا. ارنايى مودۋلدەر كەنىش تەحنيكاسىنا عانا ەمەس, سونىمەن قاتار بۇرعىلاۋ قۇرالدارىنا, تەمىر جول كولىگىنە دە ورناتىلعان.
«قاشار» الاڭىنداعى «اقىلدى كەنىش» جوباسىنىڭ تيىمدىلىگىنە كوز جەتكىزگەن كومپانيا باسشىلارى ەندى بۇل جۇيەنى قورجىنكول جانە سوكولوۆ-سارىباي كەنىشتەرىنە دە ەنگىزبەك. الداعى ۋاقىتتا ERG باسشىلىعى كەن ءوندىرىسى سالاسىنداعى مالىمەتتەردى تالداۋ, وندىرىستىك ينتەرنەت, بىرىكتىرىلگەن اقپاراتتىق جۇيەلەر, روبوتتاندىرىلعان وپەراتسيالار سياقتى تسيفرلاندىرۋ جوبالارىنا 800 ملرد تەڭگە كولەمىندە قارجى جۇمساۋدى جوسپارلاپ وتىر.
قوستاناي وبلىسى
