ايماقتار • 15 ماۋسىم، 2020

التاي كولگىنوۆ: وتباسىلىق جيىندار مەن قوناققا بارۋدان باس تارتۋ كەرەك

244 رەت كورسەتىلدى

ەپيدەميولوگيالىق جاعداي مەن ءوتىنىش بىلدىرۋشىلەر سانىنىڭ ارتۋىن ەسكەرە وتىرىپ، كوروناۆيرۋستىڭ تارالۋىنا قارسى ءىس-قيمىل جونىندەگى قالالىق شۇعىل ارەكەت ەتۋ شتابىندا بىرقاتار ماسەلەلەر قارالدى. بۇل تۋرالى ەلوردا اكىمى التاي كولگىنوۆ Instagram پاراقشاسىندا جازدى، - دەپ حابارلايدى Egemen.kz

"Covid-19 ينفەكتسياسىن جۇقتىرعاندار ءۇشىن قوسىمشا 400 پروۆيزورلىق ورىن اشىلدى. ونىڭ ىشىندە، ستاتسيونارلار بازاسىندا ينفاركت، ينسۋلت، قانت ديابەتى بار (كۆي-عا كۇدىگى بار) ادامدارعا ارنالعان جەكە ورىندار انىقتالدى. بۇعان دەيىن پنەۆمونيا مەن ورۆي بار ەمدەلۋشىلەر ءۇشىن جەكە كورپۋستار اشىلعان بولاتىن. ولاردى كوروناۆيرۋسكە قوسىمشا تەكسەرەدى. بۇل ينفەكتسيانى ەرتەرەك انىقتاۋعا مۇمكىندىك بەردى"، دەدى ا.كولگىنوۆ.

ونىڭ ايتۋىنشا، قالالىق جانە جەكە مەنشىك ەمحانالاردىڭ باس دارىگەرلەرىمەن، ستاتسيونارلاردىڭ، تالداۋ-ورتالىقتارىنىڭ باسشىلارىمەن جانە قالانىڭ باس سانيتارلىق دارىگەرىمەن ونلاين-كەزدەسۋدەن كەيىن كوروناۆيرۋستىڭ سيمپتومسىز تاسىمالداۋشىلارىن ەمدەۋ ءۇشىن تەلەمەديتسيناعا كوشۋ تۋرالى شەشىم قابىلداندى.

"مەديتسينا قىزمەتكەرلەرى بەينەقوڭىراۋلار جانە باسقا دا بايلانىس ارنالارى ارقىلى تۇرعىنداردىڭ دەنساۋلىق جاعدايىن قاداعالايدى، كوروناۆيرۋستىڭ سيمپتومسىز تاسىمالداۋشىلارىنا بارلىق ماسەلەلەر بويىنشا كەڭەس بەرەدى. ناۋقاستاردا سيمپتومدار پايدا بولعان جاعدايدا ولار اۋرۋحاناعا جاتقىزىلادى. شەتەلدەن ۇشىپ كەلگەن اۋەجولاۋشىلاردى وقشاۋلاۋ تاجىريبەسى جالعاسادى. "رامادا پلازا" قوناق ۇيىندە مەدستاتسيونارعا جابدىقتالعان نومىرلەر دايىندالدى. ەستەرىڭىزگە سالا كەتەيىك، 22 ناۋرىزدان باستاپ قالاعا كىرۋ جانە شىعۋ جابىلدى، قالالىق شتاب بارلىق اۋەجولاۋشىلارىن تەكسەرۋ تۋرالى شەشىم قابىلدادى. بۇل قالاعا ينفەكتسيا جۇقتىرعانداردى جىبەرمەۋگە مۇمكىندىك بەردى"، دەدى ەلوردا اكىمى.

سونداي-اق، بىرقاتار ۇيىم قاشىقتان جۇمىس ىستەۋ رەجيمىنە كوشۋى قاجەت ەكەنىن اتاپ ءوتتى.

"قىزمەتى رۇقسات ەتىلگەن ۇيىمدار سانيتارلىق-ەپيدەميولوگيالىق نورمالاردىڭ قاتاڭ ساقتالۋىن باقىلاۋى كەرەك. Covid-19 جۇقتىرعانداردىڭ جارتىسى ءارتۇرلى ۇجىمدار. كۇن سايىن اكىمدىكتىڭ ءموبيلدى توبى پوليتسيا قىزمەتكەرلەرىمەن، سانيتارلىق دارىگەرلەرمەن، ۆولونتەرلەرمەن بىرلەسىپ رەيدتەر جۇرگىزىپ جاتىر. تارتىپبۇزۋشىلىق بولعان جاعدايدا نىساندار جابىلادى"، دەدى ا.كولگىنوۆ.

قالا تۇرعىندارى سانيتارلىق نورمالاردى قاتاڭ ساقتاۋى قاجەت. ماسكا كيىپ (اسىرەسە ادامدار كوپ جينالاتىن جەرلەردە)، مۇمكىندىگىنشە ادام كوپ جينالاتىن ورىندارعا بارماي، انتيسەپتيك پايدالانىپ، الەۋمەتتىك قاشىقتىق ساقتاعان ءجون.

"وتباسىلىق جيىندار مەن قوناققا بارۋدان، ۇلكەن توپپەن جينالۋدان باس تارتۋ قاجەت. ساقتىق شارالارىن ساقتاي وتىرىپ، ءسىز ءوزىڭىزدى جانە جاقىندارىڭىزدى قاۋىپسىز ەتە الاسىز. قالادا وتباسىلىق وشاقتار تىركەلىپ وتىر، ياعني ءبىر وتباسىنىڭ بارلىق مۇشەلەرى ىندەتتى جۇقتىرعان. قالادا (ادامدار كوپ جينالاتىن جەرلەردە) ينفەكتسيانىڭ تارالۋىنا جول بەرمەۋ ماقساتىندا تۇراقتى تۇردە دەزينفەكتسيالىق جۇمىستار جۇرگىزەمىز. بۇدان باسقا، ەمحانالار مەن اۋرۋحانالار اۋماعىندا دەزينفەكتسيالىق توننەلدەر مەن تەپلوۆيزورلاردىڭ سانىن كوبەيتەمىز"، دەدى ا.كولگىنوۆ.

دارىگەرلەردىڭ ايتۋىنشا، كوروناۆيرۋس انىقتالعان ناۋقاستاردىڭ جاعدايى وتە اۋىر.

"وكىنىشكە قاراي، تۇرعىندار مەديتسينا قىزمەتكەرلەرى ايتىپ جاتقان ەرەجەلەردى ساقتامايدى، ءوزىن-ءوزى ەمدەۋمەن اينالىسىپ، مەديتسينالىق كومەككە دەر كەزىندە جۇگىنبەيدى. Covid-19 وزدىگىمەن ەمدەۋگە بولمايدى، ىندەت وتە قاۋىپتى. سانيتاريا نورمالارىن ساقتاماۋ قاتاڭ كارانتين رەجيمىنە ورالۋعا اكەلۋى مۇمكىن"، دەدى ا.كولگىنوۆ.

سوڭعى جاڭالىقتار

ۇقساس جاڭالىقتار