ماڭىزدى نىساندى اماندىق باتالوۆ مەردىگەر "Bazis Construction" كومپانياسىنىڭ باسشىلىعىمەن, ماماندارىمەن بىرگە ارالادى, الداعى ۋاقىتتا اتقارىلۋى ءتيىس جۇمىستاردىڭ ەگجەي-تەگجەيىن تالقىلادى. ءىرى جوبادا ءىستىڭ ۇساق-تۇيەگى بولمايدى. سوندىقتان وبلىس باسشىسى ماماندارمەن ىشكى ديزاين ەلەمەنتتەرى, بالالار باسسەينىندەگى قابىرعالاردىڭ جازۋلارى, ءتۇس جاعىنان ۇيلەسىمدىلىگى, عيماراتتىڭ ىشىنە دە, سىرتىنا دا تۋ تۇعىرىن ورناتۋ, سول سياقتى عيماراتتى جارىقتاندىرۋدى, تۇرمىستىق بولمەلەردى جابدىقتاۋدى ۇيىمداستىرۋ, كىرەبەرىسكە توسەلەتىن پليتكالاردىڭ ءتۇسى مەن ءتۇرى سياقتى ماسەلەلەردىڭ بارلىعىن سۇراپ ءبىلىپ, تالقىلاپ, ءوز ۇسىنىستارىن ايتتى.
وبلىس اكىمى عيمارات اۋماعىن اباتتاندىرۋ جۇمىسىن قاتاڭ سىنعا الدى:
باسسەين مەن "جاستار" ساياباعى, ماڭىنداعى كوشەلەر ءوزارا ءبىر-بىرىمەن بىرىڭعاي كەشەن قۇراپ ۇيلەسىمدى بولىپ تۇرۋى كەرەك. وسى ماسەلەنىڭ بارىمەن مەنىڭ ءبىرىنشى ورىنباسارىم لاززات تۇرلاشوۆ, قالا اكىمى عالىمجان ءابدىرايىموۆ, وبلىستىق قۇرىلىس باسقارماسى, قالالىق ساۋلەت جانە باسقا دا قىزمەتتەر اينالىسۋى كەرەك. بۇل باعىتتاعى جۇمىستار وتە سىلبىر ءجۇرىپ جاتىر.
بىرقاتار ماسەلەلەر ءالى كۇنگە دەيىن شەشىلمەگەن. بۇعان جول بەرمەۋ كەرەك. مەن كەلەسى كەلگەندە مەنىڭ قازىرگى جاساعان تۇزەتۋلەرىمدى, قايتا دايىندالاتىن لاندشافتىق ديزاين جوباسىن, جالپى اباتتاندىرۋدىڭ ەگجەي-تەگجەيلى جوسپارىن كورسەتەتىن بولىڭدار. جارىق شامدارىنىڭ, ورىندىقتاردىڭ, شاعىن ارحيتەكتۋرالىق فورمالاردىڭ تۇرلەرى - وسىنداي دەتالداردىڭ بارلىعى دا ماڭىزدى. وسىلاردىڭ بارلىعىن ويلاستىرىپ, دايىنداپ, ماعان بەكىتۋگە كورسەتۋلەرىڭ كەرەك. وسى نىساندا اپتاسىنا ەكى رەت كەزدەسۋ وتكىزىپ, بارلىق ماسەلەلەردى شەشۋدى, جۇمىستى جانداندىرۋدى تاپسىرامىن. ەكى اپتادا ءبىر رەت كەلىپ, كورىپ تۇراتىن بولامىن, تامىزدا نىساندى پايدالانۋعا بەرۋىمىز كەرەك. وعان قوسا ءاربىر دۇيسەنبى سايىن جۇمىستاردىڭ بارىسى, اسىرەسە, اباتتاندىرۋ تۋرالى ەسەپ بەرىپ وتىراسىڭدار, - دەدى ا.باتالوۆ.
وبلىس اكىمى سپورت نىسانىن الداعى ۋاقىتتاعى ىسكە قوسۋ كەزىندەگى ماسەلەلەردى دە تالقىلادى.
- جۇزۋدەن ءتۇرلى دەڭگەيدەگى جارىستاردان وزگە بۇل جەردە بالالاردى, جالپى تۇرعىنداردى جۇزۋگە ۇيرەتەدى, سۋ دوبىنان, مانەرلەپ جۇزۋدەن, سۋعا سەكىرۋدەن جارىستار وتەتىن بولادى. سوندىقتان كۇردەلى قۇرال-جابدىقتاردى ورناتىپ, ونىڭ قىر-سىرىن جاقسى بىلەتىن ماماندار بۇدان بىلاي دا وسىندا جۇمىس ىستەسە جاقسى بولار ەدى. ءبىز ءوز تاراپىمىزدان الداعى ۋاقىتتا ولاردىڭ تۇرمىستىق ماسەلەلەرىن شەشۋگە جاردەمدەسەتىن بولامىز, - دەگەن وبلىس اكىمى وبلىستىق سپورت باسقارماسىنىڭ باسشىسىنا مەردىگەر مەكەمەمەن بىرلەسىپ كادرلىق ماسەلەنى كەڭىنەن ويلاستىرۋدى تاپسىردى.
"Bazis Construction" مەردىگەر كومپانياسىنىڭ اتقارۋشى ديرەكتورى مۇستافا افرايلوۆتىڭ ايتۋىنشا, جالپى قۇرىلىستىڭ ءبىرىنشى كەزەڭى اياقتالۋعا جاقىن. ەكىنشى كەزەڭى ىسكە قوسۋ جۇمىستارىن قامتاماسىز ەتۋ ءۇشىن, باسسەيندەردى تەكسەرۋ, سۋعا تولتىرۋ, سۋدى جىلىتۋ مەن جەلدەتۋ ساپاسىن تەكسەرۋ ءۇشىن قاجەت. بارلىق قاجەتتى يتاليالىق, گەرمانيالىق قۇرال-جابدىقتار جەتكىزىلىپ, ورناتۋعا دايىن تۇر. قازىرگى كەزدە ىشكى ارلەۋ جۇمىستارى ءجۇرىپ جاتىر. الداعى اپتادان باستاپ كومپانيا اباتتاندىرۋ جۇمىستارىنا كىرىسەدى. نىسانداعى جۇمىستارعا 475 ادام تارتىلعان, شاتىردىڭ وزىندە 75 ادام جۇمىس ىستەپ جاتىر.
اماندىق باتالوۆ كەلەسى اپتانىڭ سوڭىنا دەيىن اباتتاندىرۋعا قاتىستى ديزاين جوباسىن كورسەتۋدى تاپسىردى. سول سياقتى قۇرىلىس جۇمىستارىن بەلگىلەنگەن مەرزىمدە اياقتاپ, قىركۇيەكتە ىسكە قوسۋ تاپسىرىلدى.
ەسكە سالاتىن بولساق, جالپى الاڭى مىڭ شارشى مەتر بولاتىن, سۋ سپورتى تۇرىنە ارنالعان نىسان بازاسىندا الەمدىك ستاندارتتارعا سايكەس 2 باسسەين بار. ۇزىندىعى 50 مەترلىك باسسەيندەردىڭ ءبىرى ءجۇزۋ, اكۆااەروبيكا, سۋ دوبى, مانەرلەپ ءجۇزۋ بويىنشا وقۋ-جاتتىعۋ ساباقتارىنا ارنالسا, ەكىنشىسى 5-تەن 10 مەترگە دەيىنگى بيىكتىكتەن سۋعا سەكىرۋگە ارنالعان.
