ونلاين فورماتتا وتكەن ءىس-شاراعا ماڭعىستاۋ وبلىستىق سوتىنىڭ توراعاسى ەرجان داۋليەۆ, وبلىستىق سوتتىڭ ازاماتتىق ىستەر جونىندەگى سوت القاسىنىڭ توراعاسى نۇرساپا پريماشەۆ جانە سۋديالارى, جاڭاوزەن قالاسى, مۇنايلى اۋدانى اكىمدىگىنىڭ وكىلدەرى, بيلەر كەڭەسىنىڭ مۇشەلەرى, مەدياتورلار قاتىستى.
داۋلاردى سوتتان تىس رەتتەۋ ينستيتۋتتارىن دامىتۋ - قازاقستان رەسپۋبليكاسى جوعارعى سوتىنىڭ باسىم جوبالارىنىڭ ءبىرى. وسى ورايدا, قوعامداعى داۋ-جانجالداردى ازايتۋ ءۇشىن حالىقپەن جۇمىس ىستەۋدىڭ بىرىڭعاي الاڭىن قۇرۋ ماقساتىندا 2019 جىلدىڭ ساۋىرىندە اقتاۋ قالاسىندا بيلەر كەڭەسى قۇرىلىپ, ءوز جۇمىسىن باستادى.
تاجىريبە كورسەتكەندەي, ماڭعىستاۋ وبلىسى بيلەر كەڭەسىنىڭ قىزمەتى ازاماتتار اراسىنداعى داۋلاردى تاتۋلاسۋ ارقىلى شەشۋگە كومەكتەستى. كەڭەس قۇرامىنا تاراپتاردى سوتقا جەتكىزبەي-اق تاتۋلاستىرا الاتىن بەدەلى مەن ومىرلىك تاجىريبەسى ۇشتاسقان ازاماتتار, ونىڭ ىشىندە ارداگەرلەر مەن قوعام قايراتكەرلەرى تاڭدالىپ, ولار بيلەردىڭ تاريحي داستۇرلەرىن قولدانا وتىرىپ, داۋلاسۋشى جاقتاردى تاتۋلاستىرۋعا ۇلەس قوستى.
ماڭعىستاۋ وبلىستىق سوتى بيلەر كەڭەسىمەن بىرلەسىپ, وبلىس ورتالىعى اقتاۋ قالاسىنداعى بيلەر كەڭەسى ءرولىنىڭ وڭ تاجىريبەسىن, سونداي-اق جاڭاوزەن قالاسى مەن مۇنايلى اۋدانىنداعى الەۋمەتتىك, ازاماتتىق جانە ەكونوميكالىق داۋلاردىڭ كوپتىگىن جانە جاڭاوزەن قالاسىنىڭ وبلىس ورتالىعىنان شالعايدا ورنالاسقانىن ەسكەرە وتىرىپ, قوس ايماقتان بيلەر كەڭەسى فيليالدارىن اشۋ تۋرالى شەشىم قابىلدادى.
سوت توراعاسى ەرجان داۋليەۆ وڭىردە تاتۋلاستىرۋ ورتالىعى, ۋنيۆەرسيتەتتە مەدياتسيا ورتالىقتارى, كاسىپوداق ورتالىعىندا جانە "اتامەكەن" كاسىپكەرلەر پالاتاسىنىڭ ماڭعىستاۋ وڭىرلىك فيليالىندا تاتۋلاستىرۋ سەكتورلارى جۇمىس ىستەيتىنىن, بىراق بۇل - قوعامداعى داۋلى جاعدايلاردىڭ دەڭگەيىن تومەندەتۋگە جەتكىلىكسىز ەكەنىن اتاپ ءوتتى. ونىڭ ۇستىنە, قازىرگى كەزدە پاندەمياعا بايلانىستى ەلىمىزدە جاريالانعان توتەنشە جاعدايدىڭ سالدارىنان وتباسى-قۇقىقتىق, ەڭبەك جانە كاسىپكەرلەر اراسىنداعى داۋلار سانى ءبىرشاما ارتقان. وسى ورايدا, سوت توراعاسى مۇنايلى اۋدانى مەن جاڭاوزەن قالاسىنداعى بيلەر كەڭەسىنىڭ فيلالى قوعامداعى داۋ-دامايدى ازايتۋعا ايتارلىقتاي ۇلەس قوساتىندىعىنا سەنىم ءبىلدىردى.
ءىس-شارا سوڭىندا ەرجان داۋليەۆ اتقارىلعان جۇمىس از ەمەس, الايدا, الدا كۇتىپ تۇرعان تىڭ مىندەتتەر دە جەتەرلىك دەپ, قاتىسۋشىلاردى وسى باعىتتا قويىلعان ماقساتتارعا جەتۋ ءۇشىن جۇمىلا جۇمىس ىستەۋگە شاقىردى.
