ارحەولوگيالىق ەكسپەديتسيانىڭ عىلىمي جەتەكشىسى ەۆگەني پيگارەۆ, التىن وردانىڭ استاناسى سانالعان ساراي-باتۋ قالاسى جاقىندا ءوز اتاۋىن وزگەرتۋى مۇمكىن دەپ سانايدى.
"زەرتتەۋ بارىسىندا ءبىز بۇرىن عالىمدارعا بەلگىسىز بولىپ كەلگەن تىڭ عىلىمي جاڭالىققا قول جەتكىزدىك. بۇل مالىمەتتەر بىزگە XIV-XV عاسىرلارداعى التىن وردانىڭ استاناسىندا بولعان كوپتەگەن دامۋ ۇردىستەرىنە جاڭاشا كوزقاراسپەن قاراۋعا مۇمكىندىك بەرەدى. بۇرىن سەليترەننوە اۋىلىنىڭ استىندا XIII عاسىردىڭ مادەني قاباتتارى ورنالاسقان دەپ ەسەپتەلىنگەن. ءوز كەزەگىندە بۇل عالىمدارعا سەليترەننوە قالاشىعى التىن وردانىڭ العاشقى استاناسى سارايدىڭ (ساراي باتۋ) قالاسىنىڭ ورنى دەگەن بولجام جاساۋعا مۇمكىندىك بەرگەن. ەندى بىزگە سەليترەننوە قالاشىعىن ساراي ءال-ءجاديد, ياعني جاڭا ساراي قالاسى دەپ ايتۋعا تولىق نەگىز بار", – دەپ ءتۇسىندىردى عالىم.
ايتا كەتۋ كەرەك, بۇعان دەيىن سەليترەننوە قالاشىعى ساراي باتۋ, ال ۆولگوگراد وبلىسىنداعى تسارەۆ قالاشىعى ساراي بەركە (ساراي ءال-ءجاديد, جاڭا ساراي) دەپ ەسەپتەلگەن ەدى. قازىرگى تاڭدا زەرتتەۋشىلەردىڭ كوپشىلىگى گ ۇلىستان قالاسى تسارەۆ قالاشىعىنىڭ ورنىندا, ال ساراي ءال-ءجاديد قالاسى سەليترەننوە قالاشىعىنىڭ ورنىندا بولعان دەگەن بولجامدى قولدايدى.
ە. پيگارەۆ سەليترەننوە اۋىلىنىڭ ورنىنان تابىلعان نۋميزماتيكالىق ولجالاردان XIV–XV عاسىرلاردىڭ كوپتەگەن مونەتالارىنىڭ شىققاندىعىن, ال XIII عاسىرعا تيەسىلى مونەتالاردىڭ تابىلماعاندىعىن اتاپ ءوتتى. مۇنىڭ ءبارى التىن وردانىڭ ەكىنشى استاناسى – ورتاعاسىرلاردىڭ ۇلى بيلەۋشىلەرىنىڭ ءبىرى وزبەك حاننىڭ كەزىندە سالىنعان ساراي ءال-ءجاديد قالاسى (جاڭا ساراي) بولعاندىعىن بىلدىرەدى.
