اڭگىمەمىزدىڭ بۇلاي وربۋىنە وزىندىك سەبەپ تە جوق ەمەس. ادەتتەگى مەديتسينالىق ماسكانى الىپ قاراڭىز. باعاسى 118 تەڭگە. وسىدان 3 اي بۇرىن پاندەميانىڭ ەلەسى كەزبەي تۇرعان شاقتا بار بولعانى 20-25 تەڭگە كولەمىندە بولاتىن. ءدارىحانالاردا قاپتاپ تۇراتىن ەلەۋسىز نارسە تۇماۋ جۇققاندا عانا تۋىسىمىزعا اينالاتىن ەدى. ال قازىر قاراشا حالىق بەتپەردەسىز كوشە شىعۋعا قورقادى, تالاپ تا قاتال. زامان قۇبىلعاندا قۇنى ارتقان دۇنيەنى دەمدە كاسىپكە اينالدىرىپ العان ادامدار قانشاما.
ديزاينەرلىك شەبەرلىككە سالىپ, بەتپەردەنى قولدان تىگەتىن قىز-كەلىنشەكتەردىڭ قاتارى كوبەيە ءتۇستى. سونىڭ ءبىرى قالا تۇرعىنى اينۇر ورازباەۆا. كوپبالالى انا كۇنىنە 20-30 ءساندى بەتپەردە تىگەدى. ۇلكەن قىزى دا جاردەمدەسەتىن كورىنەدى.
– دۇكەن يەسىنە 300 تەڭگەدەن وتكىزەمىز. قولدان بەتپەردە تىگۋ اسا قيىن شارۋا ەمەس. تىگىن ماشيناسىمەن تاڭنان كەشكە دەيىن وتىرساڭىز 100-150-گە دەيىن ماسكا تىگۋگە بولادى. الايدا ويۋ-ورنەك سالۋ ءۇشىن ءبىراز ۋاقىت كەتەدى. سوندىقتان بالالاردان قولىم قالت بوساعاندا جۇمىسقا وتىرامىن. قازىر ساۋدا قىزىپ تۇر. كارانتين ۋاقىتىندا جاقسى ەرمەك بولدى. ءارى بالالاردىڭ نەسىبەسى, – دەيدى ول. تىگىنشىنىڭ سوزىنە سۇيەنسەك, بەتپەردەنىڭ ماتەريالى وتە ساپالى, قانشا جۋساڭ دا توزبايدى. ءارى قولعا الىپ جۇرسەڭىز دە, قالتاعا سالساڭىز دا مەديتسينالىق ماسكاعا قاراعاندا الدەقايدا قولايلى.
مەديتسينالىق ماسكا دەمەكشى, ماماندار ونى 2 ساعات سايىن اۋىستىرىپ تۇرۋدى مىندەتتەپ وتىر. ەگەر ارنايى باكتەريا جوياتىن زاتپەن وڭدەلسە, 3-5 ساعاتقا دەيىن قولدانۋعا بولاتىن كورىنەدى. دەگەنمەن ماسكا تۇشكىرگەن, نە جوتەلگەندە سۋ بولىپ قالعاندا دەرەۋ جاڭاسىن تاققانىڭىز ءجون. مەديتسينالىق ماسكالار ءبىر رەتتىك قولدانۋعا عانا ارنالعاندىقتان, ونى قايتا وڭدەپ, جۋىپ, تازالاپ كيەمىن دەپ ويلاماي-اق قويىڭىز. ەندى, وسى تۇستان بايىرقالاتا تۇرىپ, قايسىسى ءتيىمدى ەكەنىن ءبىر باعدارلاپ كورەيىكشى.
تاۋلىگىنە 8 ساعات جۇمىس ىستەدىم دەگەننىڭ وزىندە 4-5 ماسكا پايدالاناسىز. اقشاعا شاققاندا 600 تەڭگەڭىز كەتەدى. ءبىر ايدا ورتاشا ەسەپپەن 12-13 مىڭ تەڭگەڭىز اۋاعا ۇشتى دەگەن ءسوز. ال قولدان تىگىلگەن بەتپەردەنى جاقسىلاپ جۋساڭىز كەلەسى كۇنى دە قاجەتىڭىزگە جارايدى. سونداي-اق اۋىز بەن مۇرىندى جانە يەكتى تولىق جاۋىپ تۇرادى. ءارى قاراي حالىققا قايسىسى تيىمدىرەك ەكەنىن ىشتەي ەسەپتەي بەرىڭىز.
ءساندى بەتپەردە ناۋقانى شەتەلدە قىزىپ تۇر. ماسەلەن, گولليۆۋد جۇلدىزى گۆينەت پەلتروۋ «Instagram» الەۋمەتتىك جەلىسىندە «Airinium» كومپانياسىنىڭ قارا ماسكاسىمەن تۇسكەن سۋرەتىن جاريالاعان ساتتەن باستاپ, كوپشىلىكتىڭ قىزىعۋشىلىعى ارتا ءتۇسىپتى. تەرىگە وتە جۇمساق تيەتىن بەتپەردەگە جۇرتتىڭ پىكىرى الابوتەن. برەند ماسكالار 66 اقش دوللارىنا باعالانىپ, ساتىلىمعا شىعىپ تا ۇلگەردى.
نيۋ-يوركتىڭ ەڭ ەسكى ءدارىحاناسى بيگەلوۋداعى N95 رەسپيراتورلارعا كەزەككە تۇرعان حالىقتىڭ قاراسى كوپ. ادەتتە مەديتسينا قىزمەتكەرلەرى تۇماۋ كەزىندە ناۋقاستارمەن بايلانىس جاساۋ ءۇشىن پايدالانىلاتىن ماسكاعا ادامدار قاتتى سەنەتىن سەكىلدى. ۆيرۋسقا قارسى ماسكانى 30 دوللاردان ساتاتىن بريتاندىق «Cambridge Mask» كومپانياسىنا تاپسىرىس ادەتتەگىدەن 30 ەسەگە كوبەيگەن. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى ماسكانى ناۋقاسپەن بايلانىسقا تۇسەتىن دارىگەرلەر مەن جۇقتىرعان اۋرۋلارعا عانا تاعۋعا كەڭەس بەرۋدە. ينفەكتسيانىڭ الدىن الۋدىڭ توتە جولى وسى دەيدى.
نۇر-سۇلتان قالاسىنداعى «گيپپوكرات» ءدارىحاناسىنىڭ ءدارىحاناشىسى ەلەنا ۆوروبەۆا مەديتسينالىق ماسكاعا سۇرانىستىڭ وتە جوعارى ەكەنىن ايتادى.
– ءبىر ادامعا 5 ماسكادان ارتىق بەرىلمەيدى. سەبەبى باسقا تۇتىنۋشىلاردىڭ دا جاعدايىن ويلاعانىمىز ابزال. كەيدە ادامدار 100-200 داناعا دەيىن سۇرايدى. الايدا ولاي ىستەۋ مۇمكىن ەمەس, ءتارتىپ بارىنە ورتاق. قازىر تاۋلىگىنە 500-600 ماسكاعا دەيىن وتەدى, – دەيدى ە.ۆوروبەۆا.
تاعى ءبىر ايتا كەتەرلىگى, قولدانىلعان مەديتسينالىق ماسكالار ورتەپ جىبەرمەسە 100 جىلعا دەيىن شىرىمەيدى ەكەن. ءارى ودان كەلەتىن زيان دا كول-كوسىر. ەلوردا كوشەلەرىندە اق تەرەكتىڭ ۇلپاسىمەن قاتار ۇشقان ماسكالار قاپتاپ بارادى. بۇل دا ءوز الدىنا ءبىر اڭگىمە. دەسە دە, قۇرمەتتى وقىرمان, ۇزاق ۋاقىتقا جارايتىن قولدان تىگىلگەن ءساندى بەتپەردە تاققىڭىز كەلە مە, الدە بايىرعى مەديتسينالىق ماسكالاردى ءجون دەپ سانايسىز با, قۇقىق وزىڭىزدە...
ادەمى كيىنىپ ءجۇرۋدى جاقسى كورەتىن جاستار جاعى زاماناۋي ۇلگىدەگى بەتپەردەلەرگە اۋەس. ال ۇلكەندەر بولسا مەديتسينالىق ماسكادان ارتىعى جوق دەپ سانايدى. ماماندار ەكەۋىنەن دە كەلىپ-كەتەر قاۋىپتىڭ جوقتىعىن ايتادى. تەك دەنساۋلىعىڭىزدى ساقتاعىڭىز كەلسە, ەرەجەگە باعىنعانىڭىز ءجون.
