ايماقتار • 08 ماۋسىم، 2020

نۇر-سۇلتاندا قاۋىپتى تۇرعىن ءۇي كەشەندەرىن جوندەۋ باستالدى

19 رەت كورسەتىلدى

قۇلاعان پليتكا، جاناتىن قاپتاما، اپاتتىق جاعدايداعى جەدەلساتىلار – نۇر-سۇلتاندا كوپپاتەرلى تۇرعىن ءۇي كەشەندەرىن جوندەۋ جۇمىسى باستالدى. بۇعان دەيىن ەلوردا اكىمى التاي كولگىنوۆ «وربيتا» جانە «تەرريتوريا كومفورتا» تك تۇرعىندارىمەن كەزدەسۋىندە ۇيلەردىڭ جوندەۋىنە قاتىستى ماسەلە كوتەرىلگەن بولاتىن. اتالعان تۇرعىن ءۇي كەشەندەرىن جوندەۋ باستالدى. بۇل تۋرالى قالا اكىمدىگىنىڭ رەسمي سايتى حابارلادى.

تك تۇرعىندارى جەل تۇرسا دالاعا شىعۋعا قورقاتىندارىن ايتقان. «بالالاردىڭ باسىنا پليتكا قۇلاپ كەتەدى دەپ قاۋىپتەنىپ، دالاعا شىعارمايمىز. سونداي-اق ءورت قاۋىپسىزدىگى جۇيەسى دە جوق، قورقىنىشپەن ءومىر سۇرۋدەمىز. ءوزىمىزدىڭ تك پليتكا قۇلاپ كەتەدى دەپ قورىقپاي ءومىر سۇرگىمىز كەلەدى»، - دەيدى تۇرعىندار.

تۇرعىن-ءۇي كوممۋنالدىق شارۋاشىلىعىن جاڭعىرتۋ باعدارلاماسى بويىنشا بيىل 50-دەن استام كوپپاتەرلى تۇرعىن ءۇي كەشەنى، 100-دەن اسا جەدەلساتى جوندەلەدى جانە جاڭاسىنا اۋىستىرىلادى. بۇدان بولەك، 2020 جىلى 800 وتباسى اپاتتىق ەسكى ۇيدەن جاڭا پاتەرگە كوشىرىلەدى.

«بيىل اۋقىمدى جۇمىس اتقارىلادى، تك قاپتاماسى تۇرعىندارعا قاۋىپ توندىرمەۋى ءتيىس. «وربيتا» جانە «تەرريتوريا كومفورتا» تۇرعىن ءۇي كەشەندەرىنىڭ سالىنعانىنا كوپ بولماسا دا، جەل تۇرعان سايىن پليتكاسى قۇلاي باستايدى، ۆيتراجدارى دۇرىس ورناتىلماعان جانە ت.ب. قازىر جوندەۋ باستالدى: قاپتاماسىن اۋىستىرىپ، ۆيتراجداردى قايتا مونتاجدايمىز، سونداي-اق ءورت قاۋىپسىزدىگى جۇيەسى مەن جىلىتۋ جۇيەسىن جوندەپ، باسقا دا ماسەلەلەردى شەشەتىن بولامىز»، – دەدى ەلوردا اكىمى التاي كولگىنوۆ.

سوڭعى جاڭالىقتار

ۇقساس جاڭالىقتار