جقجك اياسىندا جەرگىلىكتى اتقارۋشى ورىندار 6 506 جوبانى ىسكە اسىرۋعا ۇسىنىپ وتىر. ونىڭ ىشىندە 2 410 جوبا رەسپۋبليكالىق بيۋدجەت ەسەبىنەن قولعا الىنۋدا.
«جقجك ينفراقۇرىلىمدىق جوبالارىن ىسكە اسىرۋ 4 نەگىزگى باعىت بويىنشا وتەدى. ولار الەۋمەتتىك-مادەني نىسانداردى كۇردەلى جانە اعىمداعى جوندەۋ, قايتا قۇرىلىمداۋ جانە سالۋ (2 703 جوبا), تۇرعىن ءۇي-كوممۋنالدىق شارۋاشىلىق نىساندارىن كۇردەلى, ورتاشا جانە اعىمداعى جوندەۋ, قايتا قۇرىلىمداۋ (1 039 جوبا), ينجەنەرلىك-كولىك ينفراقۇرىلىمىن كۇردەلى, ورتاشا جانە اعىمداعى جوندەۋ, قايتا قۇرىلىمداۋ جانە سالۋ (1 799 جوبا), ەلدى مەكەندەردى اباتتاندىرۋ (965 جوبا). جقجك ينفراقۇرىلىمدىق جوبالارىن ىسكە اسىرۋ كەزىندە وتاندىق وندىرۋشىلەردىڭ كەمىندە 90% تاۋارلارى مەن قىزمەتتەرىن قولدانۋدى قامتاماسىز ەتۋ ەرەكشە شارت بولىپ تابىلادى. جۇمىسشىلاردىڭ كەم دەگەندە جارتىسى حالىقتى جۇمىسپەن قامتۋ ورتالىقتارى ارقىلى الىنىپ, باسىمدىق جۇمىسسىز جۇرگەن جاستارعا بەرىلەتىن بولادى. مەردىگەرلەر سانيتارلىق-ەپيدەميالىق شارالاردى قولدانا وتىرىپ, قاۋىپسىز ەڭبەك جاعدايىن قامتاماسىز ەتۋگە ءتيىس», دەلىنگەن مينيسترلىك تاراتقان اقپاراتتا.
مامىر ايىنداعى جاعداي بويىنشا بىرقاتار وڭىردە 3 096 جوبا تۇرعىسىندا جۇمىس باستالىپ, 26,3 مىڭ جۇمىس ورنى قۇرىلعان. مۇندا 11,8 مىڭى جۇمىسپەن قامتۋ ورتالىقتارى ورتاق ىسكە تارتىلعان. جقجك اياسىندا بارلىعى 255 مىڭ جۇمىس ورنىن اشۋ جوسپارلانۋدا. بۇل رەتتە جقجك جوبالارى بولاشاقتا 100 مىڭنان استام تۇراقتى جۇمىس ورنىن اشۋعا نەگىز بولادى.
«بۇدان بۇرىن حابارلاعانداي, جقجك جۇزەگە اسىرۋدىڭ ايتارلىقتاي وڭ اسەرى سەزىلمەك. مىسالى, 80 جاڭا ءبىلىم بەرۋ نىسانىنىڭ قۇرىلىسى اپاتتى جانە ءۇش اۋىسىمدى مەكتەپتەردىڭ ماسەلەلەرىن شەشۋگە, اۋىلدىق جەرلەردە ءبىلىم بەرۋ ورىندارىنا قولجەتىمدىلىكتى ارتتىرۋعا, سونداي-اق 7 مىڭعا جۋىق مۇعالىمدى تۇراقتى جۇمىسقا ورنالاستىرۋعا مۇمكىندىك بەرەدى. 24 دەنساۋلىق ساقتاۋ نىسانىنىڭ قۇرىلىسى العاشقى مەديتسينالىق-سانيتارلىق كومەككە قولجەتىمدىلىكتى ارتتىرادى, سونداي-اق شامامەن 1 مىڭ مەديتسينا قىزمەتكەرىن جۇمىسقا ورنالاستىرۋعا مۇمكىندىك بەرەدى. 36 مادەنيەت جانە سپورت نىسانىنىڭ قۇرىلىسى بۇقارالىق سپورتتى دامىتۋعا وڭ اسەر ەتىپ, جاستار ءۇشىن بوس ۋاقىت ماسەلەسىن شەشۋگە جانە 1,6 مىڭ ادامدى تۇراقتى جۇمىسپەن قامتاماسىز ەتۋگە مۇمكىندىك بەرەدى. ءوز كەزەگىندە, سۋ شارۋاشىلىعىنىڭ 12 جاڭا نىسانىن سالۋ جانە قولدانىستاعىلارىن جاڭعىرتۋ حالىق ءۇشىن اۋىز سۋدىڭ قولجەتىمدىلىگىن ارتتىرادى, سۋارمالى جەرلەردىڭ كولەمىن كەڭەيتۋگە, پايدالانىلمايتىن جەرلەردى اينالىمعا تارتۋعا, ارالاس سالالاردا 77 مىڭ ادامدى جۇمىسپەن قامتۋدى قامتاماسىز ەتۋگە مۇمكىندىك بەرەدى. تۇرعىن ءۇي-كوممۋنالدىق شارۋاشىلىقتىڭ 247 جاڭا نىسانىن سالۋ جانە قولدانىستاعىلارىن جاڭعىرتۋ تۇرعىن ءۇي قۇرىلىسى ءۇشىن جاعداي جاسايدى, اۋىل تۇرعىندارى ءۇشىن كوممۋنالدىق قىزمەتتەردىڭ قولجەتىمدىلىگىن قامتاماسىز ەتەدى, كوممۋنالدىق جەلىنىڭ توزۋىن تومەندەتەدى. ەلدى مەكەندەردى اباتتاندىرۋ ولاردىڭ سىرتقى كەلبەتىن جاقسارتىپ قانا قويماي, ازاماتتاردىڭ قاۋىپسىز جانە جايلى دەمالىسى ءۇشىن جاعداي جاسايدى», دەيدى ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى.
