ايماقتار • 07 ماۋسىم، 2020

سولتۇستىك قازاقستاندا 26 ارمەنيالىق اۆتوكولىك تىركەلدى

11 رەت كورسەتىلدى

2020 جىلعى 1 اقپانعا دەيىن ارمەنيادان اكەلىنگەن اۆتوكولىكتەردى تىركەۋ دەمالىس كۇندەرى دە جالعاسىپ جاتىر. التى كۇندە سولتۇستىك قازاقستان وبلىسىندا 26 تەمىر تۇلپار رەسپۋبليكاعا تىركەۋگە قويىلدى. بۇل تۋرالى Polisia.kz حابارلادى.

سەنبى جانە جەكسەنبى كۇندەرى مامانداندىرىلعان حالىققا قىزمەت كورسەتۋ ورتالىعىندا وبلىستىق پوليتسيا دەپارتامەنتىنىڭ قىزمەتكەرلەرى ارمەنيالىق كولىكتەرىن تىركەۋگە قويعالى جۇرگەن ازاماتتارعا كەڭەستەرىن بەرىپ، تىركەۋ جۇمىستارىن جۇرگىزەدى. سقو پد اكىمشىلىك پوليتسيا باسقارماسىنىڭ باستىعى جاسۇلان وسپانوۆتىڭ ايتۋىنشا، كولىكتەرىن تىركەۋگە كەلگەن ازاماتتاردىڭ كوپشىلىگى – پەتروپاۆلدىقتار، ال سەگىز ادام وبلىس اۋداندارىنان كەلىپتى. سەنبى كۇنى اقجار اۋدانىنىڭ تۇرعىنى دەمالىس كۇنىن پايدالانىپ، كولىگىن تىركەتۋ ءۇشىن وبلىس ورتالىعىنا كەلىپتى. ەربولات بالتين 2008 جىلى جاساپ شىعارىلعان «تoyota Camry» اۆتوكولىگىن وتكەن جىلدىڭ كۇزىندە ايداپ اكەلگەن.

– بۇل جاعداي ءۇشىن ءبىراز الاڭداۋعا تۋرا كەلدى. ماسەلە شەشىلىپ، جەڭىلدىكتەر جاسالدى. ەندى ءوز كولىگىممەن ەركىن جۇرە الامىن، – دەيدى كولىك يەسى.

ەستەرىڭىزگە سالا كەتەيىك، ارمەنيالىق كولىكتەردى تىزگىندەپ جۇرگەن قازاقستاندىقتار 2020 جىلعى 1 ماۋسىم مەن 30 قىركۇيەك ارالىعىندا شەتەلدىك كولىكتەرىن تىركەي الادى. سولتۇستىك قازاقستان وبلىسىنىڭ پوليتسيا دەپارتامەنتىندە قاۋىرت جەلى تەلەفوندارى جۇمىس ىستەيدى (32-00-19، 32-00-22، 8-776-297-84-32). تۇرعىندار كولىكتى تىرەۋگە بايلانىستى سۇراقتارىمەن وسى نومىرلەر بويىنشا كەڭەس الا الادى.

– 2020 جىلعى 1 اقپانعا دەيىن قازاقستانعا ەنگىزىلگەن، باسقارۋ ءرولى سول جاقتا ورنالاسقان جانە ارمەنيادا ءبىزدىڭ ەلدىڭ ازاماتتارىنا تىركەلگەن اۆتوكولىكتەر تىركەۋگە قويىلادى. رەسىمدەۋ قۇنى 11 946 تەڭگەنى قۇرايدى. بۇعان تىركەۋ ءۇشىن تولەم، كولىك قۇرالىنىڭ تىركەلۋ كۋالىگى مەن مەملەكەتتىك تىركەۋ ءنومىرى ءۇشىن مەملەكەتتىك باج سالىعى كىرەدى، – دەدى جاسۇلان وسپانوۆ.

سوڭعى جاڭالىقتار

ۇقساس جاڭالىقتار