الماتى وبلىسىندا «قاۋىپسىز جول» جەدەل-الدىن الۋ شاراسى ءوز جۇمىسىن باستادى. كەڭ اۋقىمدى ءىس-شارا جول-كولىك وقيعالارى مەن ولاردىڭ زارداپتارىنىڭ اۋىرلىعىن الدىن الۋعا جانە تومەندەتۋگە, جول قوزعالىسى ەرەجەلەرىن بۇزۋ دەرەكتەرىنىڭ جولىن كەسۋگە جانە انىقتاۋعا باعىتتالعان. وتكەن تاۋلىكتىڭ وزىندە وبلىس جولدارىندا 1318 جقە-ءنى بۇزۋشى تىركەلدى, ال ەكى كۇن ىشىندە پاترۋلدىك پوليتسەيلەر جول قوزعالىسى ەرەجەلەرىن بۇزعان 2246 ادامدى انىقتاعان.
– قۇقىق بۇزۋشىلىقتىڭ كوشباستار ۇشتىگىندە: جاياۋ جۇرگىنشىلەر ەرەجەسىن بۇزۋ – 360 دەرەك, بەلگىلەنگەن قوزعالىس جىلدامدىعىن ارتتىرۋ – 103 حاتتاما, مەملەكەتتىك نەمەسە مىندەتتى تەحنيكالىق بايقاۋدان وتپەگەن جۇرگىزۋشىلەردىڭ كولىك قۇرالدارىن باسقارۋى – 63 وقيعا. پاترۋلدىك پوليتسيانىڭ جەكە قۇرامى كۇشەيتىلگەن تۇردە قىزمەت اتقارادى, – دەيدى الماتى وبلىسى پد جەرگىلىكتى پوليتسيا قىزمەتى باسقارماسىنىڭ باستىعى باعدات ءاشىموۆ.
پوليتسيا ناريادتارى ماس كۇيىندە اۆتوكولىكتى باسقارۋ, قارسى قوزعالىس جولاعىنا شىعۋ, قاۋىپسىزدىك بەلدىگىن پايدالانباۋ, ۇيالى تەلەفون ارقىلى سويلەسۋ جانە جول-كولىك وقيعالارىن جاساۋعا العىشارتتار جاسايتىن باسقا دا جقە-گە قاتىستى قۇقىق بۇزۋشىلىقتاردى انىقتاۋ جانە جولىن كەسۋ بويىنشا جۇمىستاردى كۇشەيتىپ جاتىر.
– ەلدى مەكەندەردىڭ قيىلىستارىنداعى, اۆتوموبيل جولدارىنداعى جانە كوشەلەردەگى نارياد تىعىزدىعى ارتتى. ىشكى ىستەر ورگاندارىنىڭ قىزمەتىن رەگلامەنتتەيتىن قر ىشكى ىستەر مينيسترلىگىنىڭ بۇيرىقتارى مەن نورماتيۆتىك-قۇقىقتىق قۇجاتتارى نەگىزىندە جول-پاترۋلدىك پوليتسياسى قىزمەتكەرلەرىنىڭ مىندەتتەرى مەن جۇمىس ادىستەرى ناقتى انىقتالعان. ولار اۆتوپاترۋلدەۋدى, جاياۋ پاترۋلدەۋدى, سونداي-اق جول قوزعالىسىنا قاتىسۋشىلاردى قاداعالاۋدى قامتيدى. جوعارىدا اتالعان جۇمىستاردىڭ بارلىق ادىستەرى وسى جەدەل-الدىن الۋ ءىس-شارالارىن وتكىزۋ اياسىندا قولدانىلىپ جاتىر, – دەپ تولىقتىردى ءاشىموۆ.
