ەلوردالىقتار كولىكتەن شىقپاي-اق كوروناۆيرۋسقا تەستتەن وتە الادى

ەلوردادا كوروناۆيرۋس ينفەكتسياسىن انىقتاۋ ءۇشىن ءموبيلدى سكرينينگ دياگنوستيكاسى پايدا بولدى. زەرتحانا №2 قالالىق كوپبەيىندى اۋرۋحانا بازاسىندا ىسكە قوسىلدى. سكرينينگ ورتالىعىنىڭ اشىلۋ سالتاناتىنا قالا اكىمىنىڭ ورىنباسارى باقتيار ماكەن مەن قالالىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا قاتىستى.

«ماقسات – قالانىڭ بارلىق ازاماتتارىن تەكسەرىپ، ينفەكتسيا جۇقتىرماعانىنا كوز جەتكىزۋ. سونىمەن قاتار، كۇن سايىن 6 زەرتحانادا 4 500 تالداۋ جاسالادى. جالپى، قالادا ماتەريال جيناۋمەن اينالىساتىن مەملەكەتتىك جانە جەكە زەرتحانالار بار. ورتالىق تا ىڭعايلى ورنالاسقان. ازاماتتار اۋەجايعا كەلگەننەن كەيىن تەست تاپسىرا الادى. اۆتوكولىكتەرگە ارنالعان تۇراقتار جەتكىلىكتى»، – دەدى باقتيار ماكەن.

قالا اكىمى ورىنباسارىنىڭ ايتۋىنشا، بولاشاقتا جوبا قالانىڭ باسقا دا بولىكتەرىندە اشىلۋى مۇمكىن.

ءموبيلدى ورتالىق كۇنىنە 100-دەن استام تەست الۋعا قابىلەتتى. پروتسەدۋرا تەك 3-5 مينۋت ۋاقىت الادى. سونداي-اق ماماندار اتاپ وتكەندەي، بۇل ءادىس بارلىق اۆتوكولىك ءۇشىن ىڭعايلى جانە ەشقانداي كەزەكتى قاجەت ەتپەيدى. تەست قۇنى – 10 مىڭ تەڭگە. تەست تاپسىرۋشى ەپيدەميولوگيالىق فاكتورلار مەن سيمپتومدارعا قاتىستى جەكە اقپاراتتار كورسەتىلگەن ساۋالناما تولتىرادى. كابينادا دەنە تەمپەراتۋراسى جاناسۋسىز تەرمومەتر كومەگىمەن ولشەنەدى. ناتيجە 6 ساعات ىشىندە بەلگىلى بولادى.

تەست تاپسىرۋشى ءوز ناتيجەسىن ەلەكتروندى پوشتا نەمەسە Whatsapp ءنومىرى ارقىلى الا الادى. Covid-19-قا كۇدىكتى بولعان جاعدايدا مامانداندىرىلعان اۋرۋحاناعا اۋىستىرىلادى.

ءموبيلدى سكرينينگ ورتالىعى 08.00-دەن 20.00-گە دەيىن دەمالىسسىز جۇمىس ىستەيدى. ول «MEGA Silk way» ساۋدا ورتالىعى اۋماعىندا، ياعني №2 اۋرۋحانا مەن «MEGA Silk way» ساۋدا ورتالىعى اراسىندا ورنالاسقان.

ساراپشىلاردىڭ پىكىرىنشە، نۇر-سۇلتان قالاسىندا وسىنداي پۋنكتتىڭ اشىلۋى تۇرعىندار اراسىندا اۋرۋدىڭ جاسىرىن وشاقتارىن انىقتاپ، اسقىنۋلاردىڭ الدىن الۋ ءۇشىن ۋاقتىلى سانيتارلىق-ەپيدەميولوگيالىق جانە الدىن-الۋ شارالارىن جۇرگىزۋگە مۇمكىندىك بەرەدى.

ەستەرىڭىزگە سالا كەتەيىك، بۇگىن ەلوردادا كوروناۆيرۋسقا جەدەل جانە جوعارى دالدىكتەگى پتر-سكرينينگ جۇرگىزۋ ءۇشىن ءبىرىنشى مودۋلدىك زەرتحانالىق كەشەن ىسكە قوسىلدى. بولات وتەمۇراتوۆ قورى قر دەنساۋلىق ساقتاۋ مينيسترلىگى مەن نۇر-سۇلتان قالاسى اكىمدىگىنە عىلىمي-زەرتتەۋ پروتسەسىن اۆتوماتتاندىراتىن بىرەگەي زەرتحانانى سىيعا تارتتى.

زەرتحانادا مىناداي ساناتتاعى تۇلعالار ءۇشىن تەگىن سكرينينگ جۇرگىزەدى: جۇمىسسىزدار، از قامتىلعان جانە كوپبالالى وتباسىلار، مۇگەدەكتىگى بار ادامدار، ستاتسيونارعا جوسپارلى ەمدەۋگە جاتقىزىلاتىن پاتسيەنتتەر، تىنىس الۋ ورگاندارى، ەندوكريندىك جانە جۇرەك-قانتامىر جۇيەلەرى اۋرۋلارىمەن ديناميكالىق باقىلاۋدا تۇرعان 50 جاستان اسقان پاتسيەنتتەر; ەپيدەمياعا قارسى ءىس-شارالارعا تارتىلعان ارنايى كونتينگەنت – ۆولونتەرلەر مەن بەلسەندىلەر، پاترۋلدەر; قارتتار ۇيلەرىندەگى، ينتەرناتتىق جانە وزگە دە مامانداندىرىلعان مەكەمەلەردەگى ازاماتتار; مەكتەپكە دەيىنگى مەكەمەلەردىڭ قىزمەتكەرلەرى.