كوپشىلىك قوسىلا شىرقاعان اسقاق اۋەن ىرعاعىمەن تەربەلگەن كوك بايراقتىڭ كەربەز كەلبەتى دە ءزاۋلىم ۇيلەردى ودان سايىن بيىكتەتە ءتۇسىپ, ءار قوستانايلىقتىڭ كوڭىل تۇكپىرىندەگى ەلشىلدىك رۋحىن وياتقانداي اسەر قالدىردى.
– مەملەكەتتىك رامىزدەر – ەلىمىزدىڭ ەگەمەندىگى مەن مىزعىماستىعىن, ءبىرتۇتاس بىرلىگىن بەينەلەيتىن باستى نىشاندارىمىز. ءبىزدىڭ ۇيدە 150-دەن استام وتباسى تۇرادى. ىشىندە قازاق, ورىس, تاتار, ۋكراين, بەلورۋس, نەمىس, پولياك ۇلتىنىڭ وكىلدەرى بار. ءتۇرىمىز, ءتىلىمىز ءار ءتۇرلى بولعانىمەن, تىلەگىمىز ءبىر. قازاقستانىمىزدىڭ جىلدان-جىلعا قۋاتى ارتىپ, ەلىمىزدىڭ بولاشاعى باياندى بولسىن. تىلەگىمىز, كوك بايراقتى كوككە جەلبىرەتەتىن, وتانىن شىن سۇيەتىن پاتريوت جاستارىمىز كوپ بولسىن! ەلىمىز امان, حالقىمىز تىنىش بولسىن! – دەيدى اباي كوشەسىندەگى №62 ءۇيدىڭ تۇرعىندارى.
ەل جۇرەگىنە ەلشىلدىك ءدانىن سەبەتىن مەرەكەلىك شارانى قالالىق ىشكى ساياسات ءبولىمىنىڭ ماماندارى ۇيىمداستىرىپتى.
– ءبىز قالا تۇرعىندارىنان مۇنداي بەلسەندىلىكتى كۇتكەن جوق ەدىك. العاش تۇرعىن ۇيلەردىڭ بالكوندارىنا 70 شاقتى تۋ ىلەمىز دەپ جوسپارلاعانبىز. كەيىن تۋىمىز جەتپەي قالىپ, تاعى ساتىپ الۋعا تۋرا كەلدى. تۇرعىندار ەكى-ءۇش كۇننەن بەرى: «بىزگە تۋ بەرىڭىزدەر, نەمەسە قاي جەردەن ساتىپ الۋعا بولاتىنىن ايتىڭىزدار» – دەپ قوڭىراۋ شالىپ جاتقاندار كوپ. مۇنىڭ سىرتىندا, اتاۋلى مەرەكەگە وراي ءۇشىنشى ماۋسىم كۇنى كەشكىلىك اۆتوشەرۋ ءوتتى. بۇل اكتسيانى قالانىڭ بەلسەندى جاستارى ۇيىمداستىردى. جاستار كولىكتەرىنە تۋ, جالاۋشالار ءىلىپ, قالا كوشەلەرىمەن ءجۇرىپ ءوتتى. باستى ماقساتىمىز, مەملەكەتتىك تۋدى كەڭىنەن ناسيحاتتاۋ جانە قالا تۇرعىندارىن وتانسۇيگىشتىككە ۇندەۋ. مەملەكەتتىك تۋىمىزدىڭ ءار قوعامدىق ورىنداردا, تۋريستىك نىسانداردا, ساۋدا ورتالىقتارىندا, ورتا جانە جوعارى وقۋ ورىندارىندا ءىلىنىپ تۇرۋى, جۇرەككە پاتريوتتىق سەزىم ۇيالاتادى, – دەدى ىشكى ساياسات ءبولىمىنىڭ باسشىسى اسەم ەسجانوۆا.
قوستاناي
