رۋحانيات • 04 ماۋسىم، 2020

«كۇي-live» دومبىراشىلار كونكۋرسىنىڭ جەڭىمپازدارى انىقتالدى

43 رەت كورسەتىلدى

باتىس قازاقستان وبلىسىنداعى ع.قۇرمانعاليەۆ اتىنداعى فيلارمونيا ۇيىمداستىرعان داۋلەتكەرەي شىعاي ۇلىنىڭ 200 جىلدىعى جانە داۋلەتكەرەي اتىنداعى قازاق حالىق اسپاپتارى وركەسترىنىڭ قۇرىلعانىنا 20 جىل تولۋىنا ارنالعان رەسپۋبليكالىق دومبىراشىلاردىڭ «كۇي-live» كونكۋرسىنىڭ جەڭىمپازدارى انىقتالدى.

كونكۋرس قازاقستان رەسپۋبليكاسىنىڭ مادەنيەت جانە سپورت مينيسترلىگىنىڭ قولداۋىمەن، باتىس قازاقستان وبلىسى اكىمدىگى، وبلىستىق مادەنيەت باسقارماسىنىڭ ۇسىنىسىمەن ع.قۇرمانعاليەۆ اتىنداعى وبلىستىق فيلارمونياسىنىڭ ۇيىمداستىرۋىمەن  27 ساۋىردە جاريالانعان بولاتىن. وتىنىشتەردى قابىلداۋ 27 مامىردا اياقتالدى.

– كونكۋرستىڭ ماقساتى – دۇنيەجۇزى بويىنشا جانە ەلىمىزدە جاريالانعان كارانتين ۋاقىتىندا حالىقتىڭ ەڭسەسىن كوتەرۋ، ءتول اسپابىمىز – دومبىراعا دەگەن قىزىعۋشىلىقتى ارتتىرىپ، جاستار اراسىندا وڭ كوزقاراس قالىپتاستىرۋ. داۋلەتكەرەيدىڭ كۇيلەرىن حالىققا كەڭىنەن ناسيحاتتاپ، ەلىمىزدىڭ تۇكپىر-تۇكپىرىندەگى دومبىراشىلاردىڭ رەپەرتۋارىن بابا كۇيلەرىمەن تولىقتىرۋ.  ءبىر اي ىشىندە ەلىمىزدىڭ ءار تۇكپىرىنەن كونكۋرسقا  قاتىسۋعا نيەت بىلدىرگەن 105 قاتىسۋشىنىڭ ءوتىنىشى قابىلداندى. قازىلار قۇرامى ۇمىتكەرلەردىڭ  جولداعان بەينەجازبالارى  بويىنشا ورىنداۋ شەبەرلىكتەرىنە، كۇيدىڭ تاريحىن جەتكىزە  بىلۋلەرى، ارتيستيزم جانە ۆيدەونىڭ ساپالى ءتۇسىرىلۋى بويىنشا باعا بەردى، – دەدى ع.قۇرمانعاليەۆ اتىنداعى فيلارمونيا ديرەكتورى اسحات قاجىعاليەۆ.

بايقاۋعا قازاقستاننىڭ ەڭبەك سىڭىرگەن قايراتكەرى، ماحامبەت اتىنداعى سىيلىقتىڭ يەگەرى، پروفەسسور، قۇرمانعازى اتىنداعى قازاق ۇلتتىق كونسەرۆاتورياسىنىڭ ۇستازى كاريما ساحارباەۆانىڭ تورايىمدىق ەتۋىمەن قر ەڭبەك سىڭىرگەن قايراتكەرى، «پاراسات» وردەنىنىڭ يەگەرى، پروفەسسور، ديريجەر ايتقالي جايىموۆ، قازاقستاننىڭ ەڭبەك سىڭىرگەن قايراتكەرى، مەملەكەتتىك «دارىن» جاستار سىيلىعىنىڭ لاۋرەاتى باتىرجان مىقتىباەۆ، ەڭبەك سىڭىرگەن قايراتكەرى، دومبىراشى ورىنباي دۇيسەنوۆ، مادەنيەت سالاسىنىڭ ۇزدىگى، مەملەكەتتىك «دارىن» جاستار مىيلىعىنىڭ لاۋرەاتى، «قۇرمەت» وردەنىنىڭ يەگەرى ەركىن نۇرىمبەتوۆتەر تورەلىك ەتتى.

قازىلار القاسىنىڭ شەشىمىمەن الماتىلىق تاڭات سادەنوۆ ونلاين بايقاۋدىڭ گران-ءپريىن جەڭىپ الدى. ءبىرىنشى ورىن قوس دومبىراشىعا بەرىلدى. ونى دا الماتىلىق دومبىراشىلار ەراسىل ادىلبەكوۆ پەن اقىلبەك بەكتاسوۆ يەمدەندى.

نۇر-سۇلتان قالاسىنان انەل بەكەنوۆا، الماتى قالاسىنان جاقسىلىق اجمۇحانوۆ جانە قىزىلوردالىق ابىلايحان سقاقوۆتار – جۇلدەلى ەكىنشى ورىندى قانجىعالادى.

ءۇشىنشى ورىننىڭ جۇلدەسىنە  نۇر-سۇلتان قالاسى اتىنان قاتىسقان ەستاي ايتقۇلوۆ (نۇر-سۇلتان قالاسى اكىمدىگىنىڭ مەملەكەتتىك اكادەميالىق فيلارمونياسى)، اتىراۋلىق نازەركە  بازارباەۆا جانە  ورالدىق اڭسار بەردىعاليەۆ لايىق دەپ تانىلدى.

سونداي-اق پاۆلودارلىق سەرىك سىزدىقوۆ، شىمكەنتتىك شىڭعىس يساەۆ، نۇر-سۇلتان قالاسىنان توعجان ۇمبەت، الماتى وبلىسى م.تۇيمەمباەۆ اۋىلىنىڭ دومبىراشىسى ماقسات حاسانوۆ جانە  جامبىل وبلىسىنان قاتىسقان پانابەك احمەتوۆتەر ديپلومانت اتاندى.

ورال قالاسىنان بەرىك شايماردانوۆ «كۇي تاريحىن اشا بىلگەنى ءۇشىن» نوميناتسياسىمەن،  قىزىلوردا وبلىسى قازالى اۋدانىنان قۋانىش راحمەت  «كورەرمەندەر كوزايىمى» اتالىمىمەن ماراپاتتالدى.  قازاقتىڭ ۇلتتىق اسپابى – دومبىرانى مەڭگەرىپ، ناسيحاتتاعانى ءۇشىن اتىراۋلىق ماستەرس سابينا ع.قۇرمانعاليەۆ اتىنداعى وبلىستىق فيلارمونياسىنىڭ «ارنايى جۇلدەسى» سىيلىعىمەن ماراپاتتالادى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار