ايماقتار • 03 ماۋسىم، 2020

قوستانايدا تەرەكتەن ۇشقان ۇلپا ورتكە سەبەپ بولۋدا

5 رەت كورسەتىلدى

قوستانايدا سوڭعى ءبىر-ەكى كۇن ىشىندە اپتاپ ىستىق پەن قۇرعاق اۋانىڭ سالدارىنان ءورت وقيعاسى جيىلەپ كەتكەن. توتەنشە جاعداي دەپارتامەنتىنىڭ ماماندارى مۇنى قالا كوشەلەرىنە قونعان تەرەك مامىعىنىڭ تۇتانۋىمەن بايلانىستىرىپ وتىر.

«قوستاناي قالاسىندا ەكى كۇن ىشىندە تەرەك مامىعى سالدارىنان 50-دەن استام ءورت تىركەلىپ وتىر. اباي كوشەسىندەگى جىلۋ قۇبىرىنىڭ ورتەنۋى دە وسىنىڭ سالدارىنان. ءورت سوندىرۋشىلەر قاۋىپتىڭ بەتىن دەر كەزىندە قايتاردى. تەرەك مامىعىنان قۇتىلۋدىڭ ءبىر عانا جولى بار. ول – سۋ سەبۋ. ال تەرەك مامىعىن ورتەۋ ۇلكەن شىعىندارعا اكەپ سوعۋى ىقتيمال. ىستىق جانە قۇرعاق كۇندە بالالاردىڭ جانعىش زاتتارمەن ويناۋىنا جول بەرمەۋ كەرەك. ال ەرەسەكتەر سىرىڭكە مەن وشىرىلمەگەن تەمەكىنى جەرگە تاستاماعاندارى دۇرىس. ءورت قاۋىپسىزدىگى ەرەجەلەرىن بۇزعانى ءۇشىن اكىمشىلىك جاۋاپكەرشىلىكتىڭ قاتاڭداعانىن ەسكەرتەمىز»، -  دەدى قوستاناي وبلىسى تجد ءورت ءسوندىرۋ قىزمەتى ورتالىعى باستىعىنىڭ ورىنباسارى اباي وسپانوۆ.

مامانداردىڭ ايتۋىنشا، تەرەك مامىقتارى تەز تۇتانىپ، سوڭىنان قارا ءتۇتىن قالدىرادى. مامىقتىڭ جينالۋ ورىندارىن، اسىرەسە اعاشتاردىڭ ماڭىن جۇيەلى تۇردە تازالاۋ، بالالارعا ونى جاعۋعا رۇقسات بەرمەۋ قاجەت. مۇنداي قاراپايىم قاعيدالاردى ساقتاۋ ءورتتىڭ الدىن الۋعا مۇمكىندىك بەرەدى.

 

 

قوستاناي وبلىسى

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار