وبلىستىق اۋىل شارۋاشىلىعى باسقارماسىنىڭ مالىمدەۋىنشە, الداعى ءۇش جىلدا بۇل ولقىلىقتىڭ ورنى تولتىرىلادى. تاياۋدا زەرەندى اۋدانىنداعى «ميلك پرودجەكت» سەرىكتەستىگى 300 باسقا ارنالعان شارۋاشىلىق نىسانىنىڭ قۇرىلىسىن اياقتاپ, ەۋروپادان گولشتەين-فريز تۇقىمدى مال الدىردى. گولشتەين-فريز تۇقىمى جىلىنا 9-10 مىڭ ليتر ءسۇت بەرەدى. شارۋالار بۇل سيىرلاردىڭ جەرگىلىكتى اۋا رايىنا بەيىمدىلىگىن, ونىمدىلىگىن جوعارى باعالايدى. نيدەرلاندتىق اسىل تۇقىمدى مالعا تيىسىنشە جاعداي جاسالۋدا. ءسۇت فەرماسى ستاندارتقا ساي جابدىقتالعان.
– اكەلىنگەن مال ەكى-ءۇش ايدان سوڭ بۇزاۋلايدى. كەيىن ءسۇت وندىرىسىنە كىرىسەمىز. بۇدان بولەك تاعى ەكى ءجۇز باس مال ساتىپ الامىز. ءجۇز سيىر گوللانديادان اكەلىنەدى, – دەيدى سەرىكتەستىك ديرەكتورى يۋري شۆەتس.
شەتەلدەن اكەلىنگەن اسىل تۇقىمدى مال باسىنا 225 مىڭ تەڭگە سۋبسيديا بولىنەدى. الداعى ۋاقىتتا بۇل قولداۋ كولەمى 400 مىڭعا دەيىن ارتادى دەپ كۇتىلۋدە. بۇل نىسان وڭىردەگى ءسۇت كلاستەرىن دامىتۋعا العاشقى قادام. زەرەندىدە بۇدان بولەك تاعى 4 فەرما سالىنباق.
– بۇل كومپانيا سادوۆوە اۋىلدىق وكرۋگىندە وسىنداي تاعى ءبىر فەرما سالۋدى جوسپارلاپ وتىر. «مولوچنايا رەكا» كومپانياسى بۇلاق اۋىلدىق وكرۋگىندە ءسۇت فەرماسىن سالۋعا قىزىعۋشىلىق بىلدىرۋدە. «اقجايىق» كاسىپورنى مەن «بەرەكەت-2050» سەرىكتەستىگى دە ءسۇت وندىرىسىمەن اينالىسۋعا بەت بۇرىپ وتىر. مەملەكەت بۇل باعىتتا ۇلكەن قولداۋ كورسەتىپ جاتىر, – دەيدى زەرەندى اۋدانىنىڭ اكىمى باۋىرجان عايسا.
اق مولايسا, ءسۇت زاۋىتتارى دا تولىققاندى جۇمىس ىستەر ەدى. شارۋانىڭ قولىنداعى بىرەر سيىردىڭ ءسۇتىن جيناپ الۋ ماسەلەسى وڭ جولعا قويىلسا, وڭدەۋشى كاسىپورىندار شيكىزاتتان تارىقپايتىندىعىن تاعى دا ەسكەرگەن ءجون.
