كەزەڭ-كەزەڭىمەن ءتۇرلى قىزمەت ورىندارى, كاسىپورىندار مەن مەكەمەلەر ىسكە قوسىلۋدا. ءتىپتى كەيبىر ەلدەر تۋريستىك ماۋسىمعا ازىرلەنىپ جاتىر. الايدا بارلىعىندا ساقتىق شارالارى قاتاڭ ساقتالىپ وتىر. ياعني پتر تەستىلەۋىنىڭ انىقتاماسى, دەنە قىزۋىن ولشەۋ مىندەتتى تۇردە قارالادى, بەتپەردە مەن انتيسەپتيك قۇرالدارىنسىز اياق اتتاپ باسا المايسىز.
البەتتە ىندەت ىندەتە جايىلسا دا, جاھانعا ورتاق ءبىر ءۋاج – ەڭبەكتەپ جىلجىساڭ دا ەرتەڭگە ۇمتىل! قازاقستان دا وسى ۇستانىمنان تىس قالماق ەمەس. ەلىمىزدە 1 ماۋسىمنان باستاپ تەمىر جول قاتىناسى كەزەڭ-كەزەڭىمەن قالپىنا كەلتىرىلمەك. كۇرە جولدارداعى بلوك-بەكەتتەر دە الىنادى. ياعني بۇل بارىس-كەلىسكە جان بىتىرەتىن بىردەن-ءبىر قادام بولعاندىقتان ەلىمىزدە قوزعالىس كوبەيەدى. كەيبىر جەكەلەگەن وڭىرلەردە كارانتين شارالارىنىڭ سوزىلعانىنا قاراماستان جالپى ەل اۋماعىندا ساۋدا جانە قىزمەت كورسەتۋ ورىندارى, كاسىپورىندار جۇمىسىن باستادى.
سويىل كۇشىن باسقا تۇسكەن بىلەدى, بۇل ىندەتتىڭ زاردابىن ءوزى ءبىر اۋناپ تۇرعان نەمەسە جاقىنىن جوعالتقان جاندار تۇسىنەدى. قازاقستاندا كەشەگى ىندەت جۇقتىرعاندار سانى 11 مىڭعا جۋىقتادى. سايكەسىنشە اۋىر سىرقاتتان ايىققاندار 5 مىڭنان استى. بۇل دا كوڭىلگە مەدەت. سەبەپسىز اياققا تىكەن كىرمەيتىنىن ۇمىتپاۋ كەرەك. مۇنى قازىر حالىقتىڭ كوشەدە قاۋىپسىزدىك شارالارىنا نەمقۇرايدى قاراۋىنا بايلانىستى ايتىپ وتىرمىز. ياعني ەلىمىزدە مەملەكەت باسشىسىنىڭ شەشىمىمەن كارانتين شارالارىنىڭ ۋاقتىلى قابىلدانۋى قاۋىپتىڭ نەگىزگى تولقىنىن قايتارعانىمەن, قاۋىپتىڭ بەتى ءالى قايتقان جوق. ماماندار ىندەتتىڭ كەز كەلگەن ۋاقىتتا ءورشۋىن جوققا شىعارمايدى.
بۇل رەتتە دارىگەر-ينفەكتسيونيست ابۋباكىر وماراليەۆ كارانتين شارالارى بوساڭسۋىنىڭ قاجەتتى قادام ەكەنىن, دەسە دە ساقتىق شارالارىن سانادان شىعارۋعا بولمايتىنىن ايتادى.
– ءبىز كارانتيننىڭ بوساڭسۋىنا ءبارىبىر كەلەمىز. ياعني جۇرتشىلىق كوپتەن كۇتكەن دۇنيە. توتەنشە جاعداي جاريالانىپ, كارانتين شارالارى ەنگىزىلگەننەن بەرى ەلىمىزدە ءارتۇرلى جاعداي بولدى. قازاقستاندا قازىرگى كەزدە دە اۋىر حالدەگى ناۋقاستار بار. بۇل ۆيرۋستى تاسىمالداۋشىلار ءالى دە كوبەيۋى مۇمكىن. ءبىز ولاردى انىقتاۋدى جالعاستىرا بەرەمىز. اۋىر حالدەگى ناۋقاستار ءالى دە بولىپ تۇرادى. ويتكەنى تاۋەكەل توبىنداعى ادامدار جۇقتىرۋى مۇمكىن. بىراق بۇل ىندەتتىڭ باسقا سىرقاتقا قاراعاندا پايىزدىق كورسەتكىشى تومەن. سوعان قاراماستان جەكە تازالىقتى ساقتاۋىمىز كەرەك. اۋا ارقىلى جۇعاتىنىن ۇمىتپاۋ كەرەك. قولدى ءجيى جۋىپ تۇرۋ, ادامدار كوپ شوعىرلانعان ورىنداردا بەتپەردەمەن ءجۇرۋ نەمەسە عيماراتتىڭ جەلدەتىلىپ تۇرۋىنا نازار اۋدارۋ قاجەت. البەتتە, ءبىز ۆيرۋس جۇقتىرۋدى توقتاتا المايمىز. دەگەنمەن, ونىڭ كولەمىن ازايتۋعا بولادى. ياعني جۇقتىرۋشىلار ءالى دە بولا بەرەدى. سوندىقتان جەكە گيگيەنانى ساقتاۋدى قاتاڭ ساقتاعان ءلازىم. كارانتين بار ما, جوق پا, وعان قاراماستان ساقتىق شارالارىنا بەيقام بولماعان ابزال. جۇمىس ورىندارىندا اراقاشىقتىقتى ساقتاعان ءجون. اسىرەسە تۇماۋ, جوتەل بەلگىلەرى بار ادامدارمەن بايلانىستا اباي بولۋىمىز ءتيىس, – دەيدى ءا.وماراليەۆ.
ءيا, ءتۇرلى-ءتۇرلى زامان بولادى, زامانىنا قاراي امال بولادى, كەمەنىڭ ارباعا مىنەتىن دە, اربانىڭ كەمەگە مىنەتىن دە كەزى بولادى دەگەن سوزدەردى بابالاردىڭ كوكىرەك كوزى كورىپ ايتقانداي. كۇللى دۇنيەنى كارانتين تۇمشالاعانى ىندەتكە قارسى امال ەمەي نەمەنە؟ اتالعان اۋرۋمەن الىسقان اق جەلەڭدى جانداردىڭ وزىنە دە قانداي قاتەر تونگەنىن كوردىك. مەملەكەت تاراپىنان دارىگەرلەرگە دە, جۇمىسىنان ايىرىلعان, تابىسسىز قالعان ازاماتتارعا دا, بەرەشەگى بار تۇلعالار مەن كاسىپورىندارعا دا قاجەتتى قولداۋ دەر كەزىندە كورسەتىلدى.
«ساۋ بولسا جانىم, ءسوز ەمەس دۇنيە-مالىم» دەگەن ەلمىز عوي, ەندى ەل ەكونوميكاسىنىڭ دامۋىنا ۇلەس قوساتىن حالىق ەڭبەككە بەل شەشە كىرىسەدى. ايتسە دە سانيتارلىق شارالار ۇيدە دە, تۇزدە دە توقتاماۋى ءتيىس. جۇعىن بولاتىن جەردە شىبىن بولاتىنىن, شىبىن بولاتىن جەردە شىعىن بولاتىنىن لايىم ەسكەرۋ كەرەك-اق.
