دەنە قيمىلدارىمەن, سەرگىتۋ ساتىمەن باستالعان تاڭعى جاتتىعۋ قىزىقتى ويىندارعا جالعاستى.
سالاۋاتتى ءومىر سالتى - بالا بولاشاعىنىڭ جارقىن كەپىلى. انسامبل ارتيستەرى (بيشىلەر) كىشكەنتاي دوستارىنا سپورتتىڭ ماڭىزىن, ومىرىمىزدەگى ورنى بولەك قاعيدا ەكەنىن ۇعىندىرىپ قانا قويماي, مەرەكە قارساڭىندا جاتاقحانا الاڭىن بالالاردىڭ رياسىز كۇلكىسى مەن قۋانىشىنا بولەدى.
دەنە جاتتىعۋلارى ساۋلىق پەن سىمباتتىلىقتىڭ كەپىلى بولسا, ءتۇرلى ويىندار وي قابىلەتى مەن كورەگەندىككە, اقىلدىڭ دامۋىنا اپاراتىنى بارشاعا بەلگىلى. فيلارمونيا ارتيستەرى بالالىق شاققا ساياحات جاساپ, بۇلدىرشىندەرمەن ويىندار ويناپ, جاعىمدى ەنەرگەتيكالارىمەن ءىنى-قارىنداستارىن باۋراپ الدى.
بالاپانداردىڭ ريزاشىلىعى شەكسىز. قازاقتىڭ باس اقىنى اباي «ادامنىڭ ءبىر قىزىعى - بالا...» دەيدى ءبىر ولەڭىندە. ءومىرىمىز ۇرپاعىمىزبەن ءماندى, ەل بولاشاعى دا - بالالار. مەرەكە قارساڭىندا كىشكەنتاي دوستارىنا شاتتىق سىيلاپ, سىيلىقتار ۇلەستىرىپ, بال داۋرەن باقىتتىڭ ۇشقىنىن سىيلاعان ونەرپازدارىمىزدىڭ يگى باستاماسى - ىزگىلىكتىڭ باستاۋى دەپ بىلەمىز.
