ايماقتار • 30 مامىر، 2020

«جۇمىستى جاقسى ىستەيىك» دەگەنى دە باسىنا سور بولعان

44 رەت كورسەتىلدى

سولتۇستىك قازاقستان وبلىستىق پوليتسياسىنىڭ ارنايى ءارحيۆى قازىر قۋعىن-سۇرگىنگە ۇشىراعان جانداردىڭ ۇرپاقتارىنا اتا-اجەلەرىنىڭ «قىلمىستى ىستەرىن» كورسەتۋدە. سوڭعى التى جىلدا 130-دان استام وتباسى وزدەرىنىڭ اتالارىنىڭ قالاي جازىقسىز سوتتالىپ، ناقاق ازاپتالعانىن ىستەرىنەن كوردى.

بيىلعى 31 مامىردىڭ قارساڭىندا دا ساياسي قۋعىن-سۇرگىنگە قاتىستى بىرنەشە ءىستى كوتەرىپ، تانىستىرۋ ءۇشىن جازالانعانداردىڭ تۋىستارى مەن ۇرپاقتارىن شاقىرعان ەدى. سولاردىڭ ءبىرى جامبىل اۋدانىندا تۇراتىن ەكپىن ابيەۆ دەگەن ىسكەر ازامات.

ونىڭ اتاسى ءابي ەسەكيندى سوعىس كەزىندە «كەڭەس ۇكىمەتىنە قارسى ۇگىت-ناسيحات جۇرگىزگەن، كولحوزدىڭ اتىنا كىر كەلتىرگەن، جەڭىلىس تۋرالى قاۋەسەت تاراتقان» دەگەن ايىپ تاعىلعان ەكەن. «ساۋاتى» دەگەن جەرگە «ساۋاتسىز» دەپ جازىپتى. ال ونىڭ التى سىنىپتىق ءبىلىمى بولعان. بۇل ول كەزدەرى ۇلكەن ءبىلىم. ونىڭ ۇستىنە مۇعالىم بولعانى بەلگىلى. ىستە دە سولاي كورسەتىلىپتى. بىراق سوعان قاراماي «ساۋاتسىز» دەپ جازعاندارىنا قاراعاندا ىسكە بارىنشا ءجۇردىم-باردىم قاراپ، ايتەۋىر اتۋ جازاسىنا ىلەكتىرگەن»، دەيدى ەكپىن ابيەۆ.

ول اتاسى تۋرالى اڭگىمەنىڭ ەگجەي-تەگجەيىن ءوزى زەرتتەپ، سول كەزدە تۇرعان ەسىل اۋدانىنداعى قارتتارمەن كوپ اڭگىمەلەسىپتى. سويتسە اتاسى مارقۇم تۇسكە دەيىن مۇعالىم، تۇستەن كەيىن دالا جۇمىستارىنا شىعادى ەكەن. مايدانداعى اسكەردى قولداۋ جونىندە ۇگىت-ناسيحات ايتۋدى دا وعان جۇكتەپ قويىپتى.

سوندا مارقۇم جۇمىستاعى قاراپايىم ادامدارعا: «ەگەر ءبىز ەگىندى توكپەي-شاشپاي جيناپ الماساق وندا سوعىستاعى سولداتتارعا تاماق قايدان بارادى؟ ولار تاماقتان اشارشىلىق كورسە، ءبىز جەڭىلىپ قالامىز. ەگەر سەندەر كيىم-كەشەك تىكپەسەڭدەر، مايدانداعى كۇيەۋلەرىڭ مەن باۋىرلارىڭ سۋىققا توڭىپ، جاۋدى جەڭە الماي قالادى»، - دەگەن سياقتى ناسيحات تاراتادى ەكەن. سونى بىرەۋ تەرىس كورسەتىپ، «قىزىل ارميانىڭ جەڭىلىپ قالاتىنى تۋرالى ايتتى» دەپ شالا ساۋاتىمەن ءتۇرتىپ جىبەرگەن عوي. قۇلاعى قالقيىپ تەك وسىندايدى اڭدىپ وتىراتىن نكۆد-نىڭ سەرجاندى شاۋىپ كەلىپ، ونى تۇتقىنداعان. سودان ەشبىر حات-حابارسىز جوق قىلعان دەيدى نەمەرەسى.

سۇم زاماننىڭ قۇربانى بولعان وسىنداي تاعدىرلار وتە كوپ. جىل باسىنان بەرى ارنايى ارحيۆ 11 ادامعا وتباسى تاريحىن قالپىنا كەلتىرۋگە كومەكتەسكەن.

 

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار