قازاقستان • 30 مامىر، 2020

اشارشىلىق پەن ساياسي قۋعىن-سۇرگىن قۇرباندارىن ەسكە الۋ كۇنىن ەكى بولەك بەلگىلەۋ كەرەك

61 رەت كورسەتىلدى

بۇل تۋرالى فيلولوگيا عىلىمدارىنىڭ دوكتورى، پروفەسسور ايگۇل ىسىماقوۆا «Egemen Qazaqstan» گازەتىنىڭ ۇيىمداستىرۋىمەن وتكەن قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان «عاسىر زۇلماتى» اتتى ونلاين دوڭگەلەك ۇستەلىندە ايتتى.

«اشارشىلىق پەن ساياسي قۋعىن-سۇرگىن قۇرباندارىن ەسكە الۋ كۇنىن ەكى بولەك بەلگىلەۋ كەرەك. جاستارعا ءتۇسىندىرۋ، ناسيحات جۇرگىزۋ ماقساتىندا نۇر-سۇلتان مەن الماتى قالالارىندا اشارشىلىق قۇرباندارىنا ارنالعان ارنايى ورىندار بولۋى كەرەك. الاشوردا – تۇڭعىش ساياسي ەليتامىز. قولدارى بايلاۋلى زاماندا-اق لەنين باستاعان سوۆەت ۇكىمەتىنە احمەت بايتۇرسىن ۇلى، ءاليحان بوكەيحانوۆ، ءالىمحان ەرمەكوۆتەر باستاپ بارعان كوميسسيا شەكارامىزدى بەكىتكەنىنە بيىل تامىزدا 100 جىل تولادى. وسى سىندى ۇلت تاريحى ءۇشىن ماڭىزدى وقيعالاردى ەسكە الىپ، ماسەلەلەردى «Egemen Qazaqstan» گازەتىنىڭ كوتەرىپ وتىرعانى قۇپتارلىق»، - دەدى ايگۇل ىسىماقوۆا.

ونىڭ ايتۋىنشا، ءدال قازىرگى كەزدە بىزگە كىمنىڭ ۇستىنەن كىمنىڭ قانداي حات جازعانى ەمەس، ءار قازاقتىڭ وتانعا قانداي ەڭبەك سىڭىرگەنى، سىڭىرە الاتىنى ماڭىزدى. الاشوردا تۋرالى ايتقاندا دا تەك وتكەن شاقتا ايتامىز. ولاردىڭ بۇگىنمەن بايلانىسى جوق. «الاش» دەگەنىمىز – وتانعا قىزمەت. سوندىقتان ۇلتتىق كودتارىمىزدى دا الاشپەن بايلانىستىرۋىمىز كەرەك.

«قازىر عالىمدارىمىز ەڭبەكتەرىنە قولداۋ كۇتەدى. ال ارىستارىمىز اباقتىدا جاتىپ-اق ەڭبەكتەرىن جازدى. ماسەلەن، ماعجان جۇماباەۆ ايداۋدا جۇرسە دە قازاق پەداگوگيكاسىنا ەلەۋلى ەڭبەك ءسىڭىردى. بۇگىنگى عالىمدارعا وتانشىلدىق جەتپەيتىن سەكىلدى. حالەل دوسمۇحامەدوۆ ءوزىنىڭ «الامان» اتتى ماقالاسىندا قازاقتىڭ بولىنەتىنى تۋرالى جازعان. ونىڭ ايتۋىنشا، جىك جاقسى دۇنيە ەمەس. ال وتانعا قىزمەت ەتۋ الاشتىقتاردىڭ باستى مىندەتى ەدى.  اشارشىلىقتىڭ قولدان جاسالعانى، گولوششەكيننىڭ جوسپارى بولعانى بەلگىلى. جاستارعا ءدال وسى تۇرعىسىنان ايتىپ، جەتكىزۋىمىز كەرەك. سوندىقتان ساياسي قۋعىن-سۇرگىن قۇرباندارىن ەسكە الۋ كۇنىن بولەك بەلگىلەۋ قاجەتتىلىگى بارى انىق»، - دەدى فيلولوگيا عىلىمدارىنىڭ دوكتورى، پروفەسسور.

سوڭعى جاڭالىقتار

اكىمدەر ءھام الەۋمەتتىك جەلى

ساياسات • بۇگىن، 06:40

قالدىق نەگە قاجەتسىز؟

ەكولوگيا • بۇگىن، 06:36

ۇقساس جاڭالىقتار