ايماقتار • 29 مامىر، 2020

قوستاناي: پوليتسيا مۋزەيى ونلاين ەكسكۋرسيا وتكىزۋدە

6 رەت كورسەتىلدى

قوستاناي وبلىسى پوليتسيا دەپارتامەنتى مۋزەيىندەگى قۇجاتتارعا سەنسەك، 1921-1954 جىلدار ارالىعىندا قازاقستاندا 100 مىڭ ادام سوتتالىپ، 25 مىڭ ادام اتۋ جازاسىنا كەسىلىپتى.

دەپارتامەنت مۋزەيى ساياسي قۋعىن-سۇرگىن قۇرباندارىن ەسكە الۋ كۇنى قارساڭىندا ونلاين-رەجىمدە ۆيدەوەكسكۋرسيا شارالارىن وتكىزىپ جاتىر. وعان ۆەدومستۆولىق الەۋمەتتىك جەلىلەر ارقىلى كىرۋگە بولادى.

قوستاناي وبلىسى پد مۋزەيىنىڭ مەڭگەرۋشىسى نازيرا تسىمباليۋكتىڭ ايتۋىنشا، ۆەدومستۆونىڭ ارنايى مەملەكەتتىك مۇراعاتىندا زاڭسىز سوتتالىپ،  كەيىننەن اقتالعان 4349 ادامعا قاتىستى قىلمىستىق ءىس ساقتالعان.

–قاتاڭ جازاعا ءتىپتى ايەلدەر دە ىلىككەن. ماسەلەن،  «شىركەۋلەر» دەپ اتالاتىن ەكى توپتىق ءىس بويىنشا عانا 24 ايەل اتىلعان. ولاردىڭ بار كىناسى - قۇدايعا سەنگەنى، - دەيدى ن. تسىمباليۋك.

مۋزەي سورەسىندە ساياسي قۋعىن-سۇرگىن قۇرباندارىنىڭ فوتوسۋرەتتەرى مەن ولاردىڭ ەشبىر كىناسى جوقتىعىن ايعاقتايتىن ارىزدارىنىڭ تۇپنۇسقاسىن كورۋگە بولادى. ماسەلەن، 1938 جىلدىڭ اقپانىندا كسرو جوعارعى سوتىنىڭ اسكەري القاسى حابيبۋللا باشاەۆتى اتۋعا ۇكىم شىعارعان. ول 1958 جىلدىڭ 1 ناۋرىزىندا اقتالىپتى. ءدال وسى ايىپپەن امانگەلدى اۋداندىق پارتيا كوميتەتىنىڭ حاتشىسى يزمايلوۆ حايرۋش نۇرۋش ۇلى اتۋ جازاسىنا كەسىلگەن. يزمايلوۆ سوتتا جاۋاپ بەرۋدەن باس تارتادى. ول ۇلتشىل كوتەرىسشىلەرگە قاتىسى بار ەكەنىن ايعاقتايتىن دالەلدەردىڭ بولماۋىنا بايلانىستى 1959 جىلى  اقتالادى.

1

مۋزەي دەرەكتەرىنە ۇڭىلسەك، قوستانايدا رەسەيدىڭ قيىر شىعىس جانە ۋسسۋري ايماعىنان  شىققان 100-دەن استام كارىس ۇلتىنىڭ وكىلى اتىلىپى. كەيبىرەۋىنە قاتىستى قىلمىستىق ءىس بىرنەشە بەتتەن تۇرادى. ولاردىڭ كوبى ورىس ءتىلىن بىلمەگەندىكتەن، كىناسىن مويىنداعان.

زوبالاڭ جىلدارى قۋعىن-سۇرگىنگە ۇشىراعان، اقتالعان ازاماتتار تۋرالى مالىمەتتەردى قر ءىىم ۆەدومستۆولىق web-پورتالىنىڭ «مەموريال» رەسپۋبليكالىق سەرۆيسىنەن تابۋعا بولادى.

–بۇل - ەلىمىزدىڭ تاريحىنداعى ەرەكشە قارالى كەزەڭ. ءبىز ارقاشان قۋعىن-سۇرگىن قۇرباندارىن ەسكە الامىز. بىزدە بۇدان وزگە ىشكى ىستەر ورگاندارىنداعى ەڭ كونە مۋزەي جۇمىس ىستەپ تۇر جانە وندا كوپتەگەن تاريحي ەكسپوناتتار بار. سوندىقتان پوليتسيا قىزمەتكەرلەرى دەپارتامەنت مۇراجايىنا ءجيى بارىپ، قازاقستان تاريحىمەن جانە پوليتسيانىڭ قۇرىلۋ تاريحىمەن تانىسادى. ءبىز ءاربىر پوليتسيا قىزمەتكەرى ەلىمىزدىڭ تاريحىن ءبىلۋ كەرەك ەكەنىن ۇنەمى ايتىپ وتىرامىز، - دەيدى قوستاناي وبلىسى پد باستىعىنىڭ ورىنباسارى ارداق ىنتىقباەۆ.

4

 

قوستاناي وبلىسى

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار