كوروناۆيرۋس ينفەكتسياسى انىقتالعان 2 ادام – رەسەي فەدەراتسياسىندا جۇمىس ىستەيتىن شىمكەنت قالاسىنىڭ تۇرعىندارى ەكەن. ولار رەسەي فەدەراتسياسىمەن شەكاراداعى «تاسقالا» اۆتووتكەلىندەگى سانيتارلىق-كارانتيندىك بەكەتتەن جەدەل جاردەم كولىگىمەن كارانتيندىك ستاتسيونارعا جەتكىزىلگەن بولاتىن.
تاعى 10 ادام بۇعان دەيىن كوروناۆيرۋس ينفەكتسياسىن جۇقتىرعان ادامدارمەن قارىم-قاتىناستا بولعان ەكەن. 12 ادام پروفيلاكتيكالىق ماقساتتا سىناما العان كەزدە انىقتالعان. بۇعان قوسا اتىراۋ وبلىسىنىڭ تەڭىز كەن ورنىندا جۇمىس ىستەيتىن باتىس قازاقستان وبلىسىنىڭ تۇرعىندارى اراسىنان 27 ادام ۆيرۋس جۇقتىرعان بولىپ شىقتى.
«بۇل ناۋقاستاردىڭ ءبارى دە وبلىستىق جۇقپالى اۋرۋلار اۋرۋحاناسىنا ورنالاستىرىلدى. ناۋقاستارمەن قارىم-قاتىناستا بولعان ادامدار انىقتالىپ, بارلىعى مەديتسينالىق باقىلاۋعا الىندى. اۋرۋ وشاقتارىندا دەزينفەكتسيالىق جۇمىستار جۇرگىزىلدى. ەپيدەمياعا قارسى شارالار جالعاسۋدا» دەپ حابارلادى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى.
ىندەت تارالعالى بەرى وبلىستا كوروناۆيرۋستى 544 ادام جۇقتىرعان ەكەن. ولاردىڭ 269-ى جازىلىپ, ۇيىنە جىبەرىلگەن. بۇگىندە جۇقپالى اۋرۋلار اۋرۋحاناسىندا 275 ادام ەمدەلۋدە. سونداي-اق پروۆيزورلىق ستاتسيوناردا – 20, كارانتيندىك ستاتسيوناردا – 511, ءۇي وقشاۋلاۋىندا - 1276 ادام دارىگەر باقىلاۋىندا تۇر.
سوڭعى كۇندەرى اۋرۋ سانى وسە تۇسكەن تاسقالا اۋدانىندا 28 مامىردان باستاپ باتىس قازاقستان وبلىسى باس مەملەكەتتىك سانيتارلىق دارىگەرىنىڭ قاۋلىسىمەن كارانتين رەجىمى جاريالاندى. ياعني اۋداندا 19 تۇرعىن ۆيرۋس جۇقتىرعان. سونىمەن بىرگە رەسەي فەدەراتسياسى شەكاراسىندا تۇرعاندىقتان, وسى اۋدان اۋماعىنان شەتەلدە جانە ەلىمىزدىڭ باسقا ايماعىندا تۇراتىن 28 ادامنان دا COVID-19 دياگنوزى انىقتالعان.
باتىس قازاقستان
