بۇگىندە ءبىز وتاندىق مەديتسينانى دامىتۋدا ۇلكەن جەتىستىكتەرگە قول جەتكىزدىك. نورماتيۆتىك-قۇقىقتىق دەرەكقور قالىپتاستىرىلدى جانە دەنساۋلىق ساقتاۋ سالاسىندا مەملەكەتتىك باعدارلامالار قابىلداندى. جىل سايىن وتاندىق مەديتسينا ءۇشىن قارجىلاندىرۋ كولەمى ايتارلىقتاي ۇلعايۋدا. اتاپ ايتقاندا, حالىققا مامانداندىرىلعان مەديتسينالىق كومەكتىڭ كەپىلدەندىرىلگەن كولەمى كورسەتىلىپ, مەديتسينا قىزمەتكەرلەرىن وقىتۋدا, زامان تالابىنا ساي مەديتسينالىق مەكەمەلەر سالىنۋدا. سونىڭ ىشىندە ۇلتتىق نەيروحيرۋرگيا جانە كارديوحيرۋرگيا ورتالىقتارى دا بار. ولار وتانداستارىمىزدى شەتەلگە ەم قابىلداۋعا جىبەرمەي-اق, ەلىمىزدە كۇردەلى وپەراتسيالاردى جاساۋعا مۇمكىندىك بەرەتىن مەديتسينالىق قۇرال-جابدىقتارمەن جاراقتاندىرىلۋدا.
كوروناۆيرۋستىق ينفەكتسيا پاندەمياسى الەم ەلدەرىنە مەديتسينانىڭ جاڭا باعىتتارى مەن باسىمدىقتارىن ايقىنداپ بەردى. وسى جاعداي ءوز شەشىمىن تابۋدى تالاپ ەتەتىن ماسەلەلەردىڭ بەتىن اشتى. قازاقستاندى الار بولساق, مەملەكەت باسشىسى اتاپ وتكەندەي, دەنساۋلىق ساقتاۋ سالاسىندا بىرقاتار ماسەلەلەر باستى نازاردا. ونىڭ ىشىندە مەديتسينا عىلىمىن, فارماتسەۆتيكالىق جانە مەديتسينالىق ءوندىرىستى, تسيفرلاندىرۋدى, بيولوگيالىق قاۋىپسىزدىك جانە سانيتارلىق-ەپيدەميالىق بەلسەندىلىكتى دامىتۋ, ايماقتارداعى مەديتسينالىق حال-احۋالدى جاقسارتۋ, جاڭا مەديتسينالىق مەكەمەلەردى سالۋ جانە تاعى باسقا.
ءوز كەزەگىمدە, مەن راسىندا دا مەديتسينا عىلىمىن دامىتۋ مەن مەديتسينالىق قىزمەتكەرلەردىڭ عىلىمي جانە كلينيكالىق زەرتتەۋلەرگە قاتىسۋىنا قولداۋ جاساۋ وتاندىق مەديتسينانىڭ جاڭا باعىتتارىن, ادىستەرىن جانە تەحنولوگيالارىن دامىتۋعا مۇمكىندىك بەرەتىندىگىن اتاپ وتكىم كەلەدى. قازىرگى تاڭدا قازاقستاندا بۇل ءۇشىن بارلىق الەۋەت, كۇش-قۋات جەتكىلىكتى, ياعني جوعارى مامانداندىرىلعان كادرلار بار. ءبىزدىڭ ورتالىقتا دا عىلىمي جۇمىستار جۇرگىزىلەدى. مىسالى, وتكەن جىلى ومىرتقانى 3D ۇلگىلەۋ تۋرالى زەرتتەۋ جۇمىسى ءساتتى اياقتالدى, بۇل دەربەستەندىرىلگەن مەديتسيناداعى عالامات سىلكىنىس, جويقىن جاڭالىق بولدى. مۇنداي زەرتتەۋلەر مەديتسينا جانە فارماتسەۆتيكا سالاسىنداعى وتاندىق ءوندىرىستى دامىتۋعا جانە ونىڭ كولەمىن ۇلعايتۋعا مۇمكىندىك بەرەدى.
سونىمەن قاتار قازىر مەديتسينا سالاسىندا جۇرگەن جانە بولاشاقتا وسى سالاعا كەلەتىن دارىگەرلەردى ىنتالاندىرۋ ءۇشىن دارىگەر بەدەلىن ارتتىرۋ – وتە ماڭىزدى فاكتور. مەديتسينا ماماندىقتارىنا بولىنەتىن گرانتتاردى كوبەيتۋ قازىرگى تاڭدا وتە وزەكتى.
سەرىك اقشولاقوۆ,
قازاقستاننىڭ ەڭبەك ەرى, مەديتسينا عىلىمىنىڭ دوكتورى, پروفەسسور, ۇعا اكادەميگى,
«ۇلتتىق نەيروحيرۋرگيا ورتالىعى» اق باسقارما توراعاسى
