مەكتەپ ديرەكتورى قىمبات بەكباۋوۆانىڭ ايتۋىنشا, ب.حايداروۆ اتىنداعى مەكتەپ 1979 جىلى سالىنعان. تاۋلى ءوڭىر باياناۋىلدىڭ سۋىق قىسىندا مەكتەپ ءىشى ازىناپ تۇرادى ەكەن. ەسىك-تەرەزەلەرى, ەدەندەرى ابدەن ەسكىرگەن.
ال تۇبىندە ءبىر جاقسىلىق كەلەر دەپ ىرىمدايتىن اۋىل حالقى بارىنە ءتوزىمدى. مۇعالىمدەر دە, وقۋشىلار دا سولاي, شىدايدى, شىداپ كەلەدى بارىنە.
ء سوز جۇزىندە ءبارى جاقسى, ال, جوندەلمەگەن مەكتەپتەر قايدان شىقتى دەگەن وسى. وسى اۋدانعا 1979 جىلدان بەرى قانشا باسشى, قازىرگى كۇنى قانشا اكىم كەلدى-كەتتى, ولاردىڭ باياندامالارىندا ءبارى جارقىراپ تۇرار ەدى. كەلىمدى-كەتىمدى اكىمدەردىڭ اۋىل مەكتەپتەرىنە جاناشىرلىق جاساي الماعاندارى وكىنىشتى.
وبلىستىق ءبىلىم باسقارماسى دا جىل سايىنعى تامىز ءماسليحاتىندا ءبارى كەرەمەت دەپ بايانداما جاسايدى. بىراق باسقارمانىڭ شالعايداعى اۋىل مەكتەپتەرىنىڭ حال-جاعدايىن ءبىلىپ, نازارعا المايتىنى, ارالامايتىنى بايقالادى.
كەلەسى قانىش ساتباەۆ اتىنداعى اۋىلدىق اۋماقتاعى شادىرا مەكتەبىنە كەلسەك, ول دا 1972 جىلى سالىنعان. قازىر 117 وقۋشى ءبىلىم الۋدا. ەدەنى ءشىرىپ, تەرەزەلەرى توزعان, سىرتىنان سۋىق وتپەسىن, قار تۇسپەسىن دەپ تسەللوفان جىلتىرىمەن قاپتاپ قويادى ەكەن.
سۇلتانماحمۇت تورايعىروۆ اۋىلىنداعى مەكتەپ تە ەسكى, كۇردەلى جوندەۋ كۇتۋدە. شالعايداعى جاڭاجول اۋىلىنداعى ءماشھۇر ءجۇسىپ اتىنداعى مەكتەپتىڭ جىلۋ جۇيەسىنە 47 جىل بولعان, قازىر قۇرىلعى ابدەن توزعان. اۋىل بالالارى قىستىگۇنى مەكتەپكە كەلىپ توڭىپ, ۇيلەرىنە بارىپ جىلىنادى. ينتەرنەت ءالى جەتە قويماپتى.
ۇلتىمىزدىڭ ءبىرتۋار ۇلدارىنىڭ اتىن العان مەكتەپتەردىڭ جۇدەپ-جاداپ, ابدەن توزىعى جەتىپ تۇرعانى ۇلكەندى-كىشىلى باسشىلارعا سىن.
ەكىنشى دۇنيەجۇزىلىك سوعىستاعى ەرلىگى ءۇشىن «داڭق» وردەنىنىڭ ءى, ءىى, ءىىى دارەجەلى تولىق كاۆالەرى اتانعان جاڭاتىلەك اۋىلىندا تۋعان باتىر باقىت حايداروۆتىڭ تۋعانىنا بىلتىر 100 جىل تولدى.
ال مەكتەپتەرىمىزدىڭ ءتۇرى اناۋ.
ەندى ناتيجەلى ءىس كۇتەلىك. بيىل باياناۋىل اۋدانىندا «جۇمىسپەن قامتۋدىڭ جول كارتاسى-2025 باعدارلاماسى» اياسىندا 11 جوبا ماقۇلدانىپتى.
اۋدان اكىمىنىڭ ورىنباسارى انار بادەنوۆانىڭ ايتۋىنشا, قۇنى 656 ملن 593 مىڭ تەڭگە تۇراتىن جوبا بويىنشا, ءبىز جوعارىدا جازعان اۋىل مەكتەپتەرى كۇردەلى جوندەۋدەن وتپەك. اۋدانداعى 20 مەكتەپكە ىشكى دارەتحانالار ورناتۋ جۇمىستارى جوسپارلانىپتى.
پاۆلودار وبلىسى,
باياناۋىل اۋدانى
